ຫຼາຍທ່ານອາດເຄີຍໄດ້ໄປທ່ອງທ່ຽວມາແລ້ວ ສຳລັບຕາດຮ້ອຍຄົວ ເຊິ່ງເປັນສະຖານທີ່ທ່ອງທ່ຽວທາງທໍາມະຊາດ ໄລຍະນີ້ “ລາວທ່ຽວລາວ” ໄດ້ຫລຸດຄ່າແບບພິເສດຄື: ການບໍລິການບັນດາກິດຈະກໍາທີ່ມີລົງ 50% ຈາກລາຄາປົກກະຕິ ເພື່ອສົ່ງເສີມ ແລະ ກະຕຸ້ນການທ່ອງທ່ຽວລາວທ່ຽວລາວ ກໍຄື ເຮັດໃຫ້ນັກທ່ອງທ່ຽວພາຍໃນປະເທດເຂົ້າໄປທ່ຽວຊົມຕາດແຫ່ງນີ້ນັບມື້ເພີ່ມຂຶ້ນ. ໃນຂະນະທີ່ຜູ້ບໍລິຫານສະຖານທີ່ທ່ອງທ່ຽວດັ່ງກ່າວ ມີແຜນຈະພັດທະນາອີກຫລາຍກິດຈະກໍາໃຫ້ສໍາເລັດພາຍໃນປີ 2021.

ທ່ານ ອາຄົມ ພົມມະຫາປະທານບໍລິສັດທ່ອງທ່ຽວ ລາວກຣີນ, ຜູ້ສໍາປະທານຕາດຮ້ອຍຄົວ ໃຫ້ຮູ້ວ່າ: “ບໍລິສັດ ທ່ອງທ່ຽວ ລາວກຣີນ ໄດ້ເຂົ້າມາພັດທະນາຕາດຮ້ອຍຄົວເລີ່ມແຕ່ປີ 2015 ແລະ ໄດ້ເປີດບໍລິການນັກທ່ອງທ່ຽວຢ່າງ ເປັນທາງການ ນັບແຕ່ເດືອນສິງຫາປີ 2018 ເປັນຕົ້ນມາ ໂດຍໃຫ້ບໍລິການຫລາຍກິດຈະກໍາ ເຊັ່ນ: ຊົມນໍ້າຕົກຕາດ, ຂີ່ສະລິງຊົມສວນດອກໄມ້, ຍ່າງຂົວບ້ວງຢູ່ລະຫວ່າງກາງຕົ້ນໄມ້ໃຫຍ່, ໄຕ່ເຊືອກໄປຕາມຕົ້ນໄມ້ຕ່າງໆ, ໄຕ່ຂົວໄມ້ທີ່ເຊື່ອມຕໍ່ລະຫວ່າງຕາດຜ່ານປ່າດົງໃຫຍ່ໄປຫາສວນອຸທະຍານທີ່ປະດັບໄປດ້ວຍດອກໄມ້ຫຼາຍສີສັນນາໆ ຊະນິດ.

ນອກຈາກນີ້ ຍັງມີບໍລິການເຕັ້ນ, ຫ້ອງພັກ, ສ້າງຕະຫລາດຊຸມຊົນໂດຍບໍ່ເສຍຄ່າ ແລະ ອື່ນໆ. ໃນໄລຍະເບື້ອງຕົ້ນທີ່ເປີດໃຫ້ບໍລິການມີນັກທ່ອງທ່ຽວໃຫ້ຄວາມສົນໃຈເຂົ້າມາທ່ອງທ່ຽວຫລາຍສົມຄວນ, ສະເລ່ຍປະມານ 300-350 ຄົນຕໍ່ວັນ, ໃນນີ້ 70% ແມ່ນນັກທ່ອງທ່ຽວພາຍໃນ ແລະ 30% ແມ່ນນັກທ່ອງທ່ຽວຕ່າງປະເທດ, ແຕ່ຫລັງຈາກເກີດການລະບາດຂອງພະຍາດໂຄວິດ-19 ນັບແຕ່ທ້າຍປີ 2019 ເປັນຕົ້ນມາ ນັກທ່ອງທ່ຽວທີ່ເຂົ້າມາທ່ຽວຊົມນ້ຳຕົກຕາດຮ້ອຍຄົວຫຼຸດລົງຢ່າງຕໍ່ເນື່ອງ ແລະ ໄດ້ປິດກິດຈະການຊົ່ວຄາວໄລຍະໜຶ່ງຕາມມາດຕະການທີ່ລັດຖະບານວາງອອກເພື່ອປ້ອງກັນການລະບາດຂອງພະຍາດໂຄວິດ-19.

ສຳລັບຕົວຂອງຜູ້ຂຽນເອງແມ່ນເປັນຄັ້ງທຳອິດທີ່ໄດ້ໄປສຳພັດກັບນໍ້າຕົກຕາດຮ້ອຍຄົວ ພ້ອມກັບສວນອຸທິຍານນີ້ມີເນື້ອທີ່ຫຼາຍກວ່າ 20 ເຮັກຕາທີ່ເຕັມໄປດ້ວຍພູຜາປ່າດົງດິບທີ່ໃຫ້ຄວາມສົດຊື່ນເຢັນສະບາຍ, ເໝາະສົມໃນການໄປທ່ຽວຊົມ ແລະພັກຜ່ອນຢ່ອນອາລົມ, ພ້ອມນັ້ນ ຍັງໄດ້ພົບກັບຄວາຍດອນທີ່ມີອາຍຸ 38 ປີ ແລະ ທາງຜູ້ປະກອບການໄດ້ເອົາຄວາຍດອນໂຕນັ້ນເປັນສັນຍາລັກທີ່ຕັ້ງຢູ່ດ້ານໜ້າທາງເຂົ້າຕາດຮ້ອຍຄົວ.

ສ່ວນທິດທາງແຜນການໃນຕໍ່ໜ້າ ຈະເພີ່ມກິດຈະກໍາທີ່ເປັນການພະຈົນໄພໃຫ້ຫລາຍຂຶ້ນ ເພາະນັກທ່ອງທ່ຽວພາຍໃນປະເທດ ເລີ່ມໃຫ້ຄວາມສົນໃຈກິດຈະກໍາປະເພດນີ້ ແລະ ຈະເພີ່ມຫ້ອງພັກ, ສ້າງສວນນໍ້າເພື່ອຄວາມສວຍງາມໃຫ້ສໍາເລັດພາຍໃນປີ 2021 ໂດຍຕິດພັນພັນຄວາມຍືນຍົງ ແລະ ສີຂຽວຕະຫລອດໄປ.

 ຕາດຮ້ອຍຄົວ ຕັ້ງຢູ່ເຂດສວນປ່າດົງດິບ ເຂດບ້ານປາກຫລືງ ຫ່າງຈາກເທດສະບານເມືອງຈອມເພັດ, ແຂວງຫລວງພະບາງ ປະມານ 12 ກິໂລແມັດ, ຖືເປັນນໍ້າຕົກ ຕາດທີ່ຫາຊົມໄດ້ຍາກ ເພາະເປັນຕາດທີ່ປະກອບດ້ວຍຕາດນ້ອຍຫຼາຍໆ ຊັ້ນທີ່ມີນໍ້າໃສໄຫຼເຢັນຢູ່ຕະຫຼອດປີ, ມີຄວາມສູງປະມານ 90 ແມັດ. ສວນອຸທິຍານນີ້ມີເນື້ອທີ່ຫຼາຍກວ່າ 20 ເຮັກຕາທີ່ເຕັມໄປດ້ວຍພູຜາປ່າດົງດິບທີ່ໃຫ້ຄວາມສົດຊື່ນເຢັນສະ ບາຍ, ເໝາະສົມໃນການໄປທ່ຽວຊົມ ແລະພັກຜ່ອນຢ່ອນອາລົມ.

Medialaos MMD