ໃນວັນທີ 2 ພະຈິກ 2020 ນີ້, ບໍລິສັດທີ່ປຶກສາ ດ້ານການລົງທຶນ ແລະ ການກໍ່ສ້າງເຄື່ອນໄຟຟ້າ ຈຳກັດຜູ້ດຽວ, ບໍລິສັດອາເມັດຊິ້ງລາວ ຈຳກັດຜູ້ດຽວ ໄດ້ນຳເອົາເງິນ ຈຳນວນ 300 ລ້ານກີບ ມາມອບ ເພື່ອປະກອບສ່ວນຊຸກຍູ້ ກອງປະຊຸມໃຫຍ່ຄັ້ງທີ V ຂອງອົງຄະນະພັກ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ທີ່ຈະຈັດຂຶ້ນ ໃນໄວໆນີ້.

ຕາງໜ້າມອບເງິນໃນຄັ້ງນີ້, ໂດຍທ່ານ ປີຊາໄຊ ແກ້ວໄຊຍະຈັກ ປະທານທີ່ປຶກສາ ດ້ານການລົງທຶນ ແລະ ການກໍ່ສ້າງເຄື່ອນໄຟຟ້າ ຈຳກັດຜູ້ດຽວ ແລະ ບໍລິສັດອາເມັດຊິ້ງລາວ ຈຳກັດຜູ້ດຽວ ແລະ ຕາງໜ້າຮັບໂດຍທ່ານ ກິແກ້ວ ໄຂຄຳພິທູນ ລັດຖະມົນຕີ ກະຊວງ ຖວທ ໂດຍມີພາກສ່ວນກ່ຽວຂ້ອງຂອງທັງສອງຝ່າຍ ເຂົ້າຮ່ວມ ເປັນສັກຂີພິຍານ.

ໂອກາດດັ່ງກ່າວ, ທ່ານ ກິແກ້ວ ໄຂຄຳພິທູນ ໄດ້ສະແດງຄວາມຂອບໃຈຢ່າງຈິງໃຈ ຕໍ່ບໍລິສັດດັ່ງກ່າວ, ທີ່ໄດ້ນຳເອົາເງິນ ມາມອບໃຫ້ໃນຄັ້ງນີ້, ເຊິ່ງເປັນການປະກອບສ່ວນອັນສຳຄັນ ເຮັດໃຫ້ກອງປະຊຸມໃຫຍ່ອົງຄະນະພັກ ກະຊວງ ຖວທ ກຳເນີນໄປດ້ວຍຜົນສຳເລັດອັນຈົບງາມ, ພ້ອມທັງຢືນຍັງວ່າ ຈະນຳເອົາເງິນຈຳນວນດັ່ງກ່າວ, ໄປໝູນໃຊ້ ໃຫ້ເກີດຜົນປະໂຫຍດສູງສຸດ ກໍຄື ນຳໄປໃຊ້ຈ່າຍ ເຂົ້າໃນກອງປະຊຸມໃຫຍ່ຂອງອົງຄະນະພັກ ກະຊວງ ຖວທ ໃຫ້ດຳເນີນໄປດ້ວຍດີ ຕາມທີ່ໄດ້ກຳນົດໄວ້ຢ່າງຈົບງາມ.