ໃນວັນທີ 31 ຕຸລາ 2020 ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ພ້ອມດ້ວຍຄະນະ ໄດ້ລົງຢ້ຽມຢາມ ແລະ ພົບປະປະຊາຊົນ ຜູ້ທີ່ຖືກຜົນ ກະທົບ ຈາກໄພນໍ້າຖ້ວມ ຢູ່ 2 ຈຸດ ຄື: ບ້ານທ່າຂາມລຽນ, ບ້ານລະຫານໍ້າ ເມືອງສອງຄອນ ແລະ ບ້ານກອງປະທຸມວັນ ເມືອງຊົນນະບູລີ ໂດຍການເຂົ້າຮ່ວມ ຂອງ ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ, ມີບັນການນຳແຂວງ, ພະແນກການອ້ອມຂ້າງແຂວງ, ການນຳເມືອງ, ພ້ອມດ້ວຍພໍ່ແມ່ປະຊາຊົນທີ່ຖືກຜົນກະທົບຈາກໄພນໍ້າຖ້ວມ.

ຈຸດທີໜຶ່ງ, ທ່ານ ລຳຄູນ ວິລະວົງ ເຈົ້າເມືອງສອງຄອນ ໄດ້ລາຍງານສະພາບນ້ຳຖ້ວມຢູ່ເຂດເມືອງສອງຄອນໃຫ້ຮູ້ວ່າ: ເຮືອນຊານຂອງປະຊາຊົນ ໄດ້ຮັບຜົນ ເສຍຫາຍ 23 ບ້ານ, 2.628 ຄອບ ຄົວ 15.493 ຄົນ, ຜົນກະທົບຕໍ່ເນື້ອທີ່ ທຳການຜະລິດຂອງປະຊາຊົນ ເນື້ອທີ່ນາປີຖືກນໍ້າຖ້ວມ 5.416 ກວ່າ ເຮັກຕາ, ໜອງປາ 340 ໜອງ, ເນື້ອທີ່ສວນປູກພືດ 96,58 ເຮັກຕາ, ອ່າງເກັບນ້ຳ 1 ແຫ່ງ, ລະບົບຊົນລະປະທານ 9 ແຫ່ງ, ສະຖານີຈັກສູບນ້ຳ 9 ແຫ່ງ, ສັດລ້ຽງຕາຍ ແລະ ສູນຫາຍ 17 ໂຕ. ນອກຈາກນັ້ນ, ກໍຍັງມີຜົນກະທົບຕໍ່ພື້ນຖານໂຄງລ່າງ ຄື: ເສັ້ນທາງເສຍຫາຍຫລາຍກວ່າ 10 ເສັ້ນ, ໂຮງຮຽນຢຸດການຮຽນການສອນຊົ່ວຄາວ 12 ແຫ່ງ, ສຸກສາລາ 2 ແຫ່ງ, ນໍ້າສ້າງນໍ້າບາດານ 401 ໜ່ວຍ ແລະ ນໍ້າສ້າງທໍ່ 18 ໜ່ວຍ, ວິດຖ່າຍ 1.544 ຫລັງ.
ຈຸດທີສອງ: ທ່ານ ສຸວິໄລ ຫລວງຊະລາດ ເຈົ້າເມືອງຊົນນະບູລີ ໄດ້ລາຍງານໃຫ້ຮູ້ວ່າ: ເມືອງຊົນນະບູລີ ໄດ້ຮັບຜົນເສຍຫາຍນໍ້າຖ້ວມ 15 ບ້ານ, 4.436 ຫລັງຄາເຮືອນ, ເນື້ອທີ່ຖືກຖ້ວມ 7.288 ເຮັກຕາ, ເນື້ອທີ່ສວນປູກພືດ 176 ເຮັກຕາ, ໜອງປາ 369 ໜອງ, ລະບົບຊົນລະປະທານ 9 ແຫ່ງ, ປະຕູນໍ້າ 3 ແຫ່ງ, ສັດລ້ຽງຕາຍ ແລະ ສູນຫາຍ 128 ໂຕ, ໂຮງຮຽນຖືກຖ້ວມ 27 ແຫ່ງ, ສຸກສາລາ 8 ເຂດ, 13 ວັດ, ນໍ້າສ້າງ-ນໍ້າບາດານ 402 ໜ່ວຍ, ວິດຖ່າຍ 1.228, ເສັ້ນທາງ ເສຍຫາຍ 12 ເສັ້ນ.

ໂອກາດດຽວກັນ, ທ່ານ ນາງ ປານີ ຢາທໍ່ຕູ້ ກໍໄດ້ສະແດງຄວາມຍໍຍ້ອງ ອຳນາດການປົກຄອງທຸກຂັ້ນ ທີ່ເອົາໃຈໃສ່ຊ່ວຍເຫລືອປະຊາຊົນ, ພ້ອມທັງສະແດງ ຄວາມ ເປັນຫວ່ງເປັນໃຍ ປະຊາຊົນທີ່ຖືກຜົນກະທົບ ຈາກໄພພິບັດນ້ຳຖ້ວມໃນຄັ້ງນີ້, ທ່ານໄດ້ເນັ້ນໃຫ້ປະຊາຊົນ ມີສະຕິລະວົງຕົວ ກະກຽມລ່ວງໜ້າແຕ່ຫົວປີ ໃນການຮັບມືກັບນໍ້າຖ້ວມ ເນື່ອງຈາກວ່າ ເຂດບ້ານດັ່ງກ່າວ, ແມ່ນນໍ້າຖ້ວມທຸກປີ, ພ້ອມທັງ ໃຫ້ປະຊາຊົນພ້ອມພຽງກັນ ກະກຽມເຮັດນາແຊງ, ກະກຽມແນວພັນ ຜົນລະປູກອື່ນໆ ເພື່ອສືບຕໍ່ປູກໃນ ເວລາທີ່ນໍ້າລົງແລ້ວ, ໃຫ້ປະຊາຊົນຮັກສາສຸຂະອະນາໄມ ເພື່ອປ້ອງກັນບໍ່ໃຫ້ ຕິດເຊື້ອພະຍາດ, ພ້ອມກັນອະນາໄມໂຮງຮຽນ ເພື່ອໃຫ້ໄດ້ເປີດການ ຮຽນການສອນໃນໄວໆນີ້.
ນອກຈາກນັ້ນ, ຍັງໄດ້ເນັ້ນໜັກ ໃຫ້ສືບຕໍ່ເອົາໃຈໃສ່ ວຽກງານປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງພະຍາດ ໂຄວິດ-19, ບໍ່ໃຫ້ມີການເຜີຕົວ ຫລື ຖືເບົາເດັດຂາດ, ໃນສະພາບທີ່ຍັງ ມີການການບາດຂອງພະຍາດ ໂຄວິດ-19 ໃນບັນດາປະເທດຕ່າງໆ, ແຜນການ ພັດທະນາ ໃນຕໍ່ໜ້າ ໃຫ້ເອົາໃຈໃສ່ນຳໃຊ້ທ່າແຮງ ຂອງທ້ອງຖິ່ນໃຫ້ ເກີດປະໂຫຍດສູງສຸດ ໂດຍສະເພາະ ສົ່ງເສີມປະຊາຊົນເພີ່ມພູນຜະລິດຜົນ ໃຫ້ເປັນຂະບວນ ການກວ້າງ ຂວາງ ເພື່ອຫລຸດຜ່ອນ ການນຳເຂົ້າສິນຄ້າ, ການໄປໃຊ້ແຮງງານ ໃນຕ່າງປະເທດ ສ້າງລາຍຮັບ ແລະ ປັບປຸງຊີວິດການເປັນຢູ່ ຂອງເຂົາເຈົ້າໃຫ້ ນັບມື້ດີຂຶ້ນ, ໃຫ້ສືບຊ່ວຍເຫລືອ ປະຊາຊົນໃນຫລາຍດ້ານ ເປັນ ຕົ້ນອາຫານການກິນ, ນ້ຳດື່ມ, ຢາປົວພະຍາດ, ສືບຕໍ່ໃນການປຸກລະດົມ ຂົນຂວາຍເອົາເຄື່ອງໃຊ້ ເພື່ອມາຊ່ວຍເຫລືອ ຜູ້ທີ່ຖືກຜົນກະທົບຈາກໄພນ້ຳຖ້ວມ, ໃຫ້ເບິ່ງຄວາມຕ້ອງ ການຂອງປະຊາຊົນ ບໍ່ວ່າຈະເປັນແນວພັນພືດ, ແນວພັນເຂົ້າ, ດ້ານສຸກສາລາ, ວິດຖ່າຍ, ແລະ ໂຮງຮຽນ ພ້ອມທັງຈະນໍາເອົາຄໍາຄິດ ຄຳເຫັນຂອງພໍ່ແມ່ ປະຊາຊົນ ໄປສະເໜີຕໍ່ພາກສ່ວນ ທີ່ກ່ຽວຂ້ອງຄົ້ນຄວ້າ ພິຈາລະນາ ເພື່ອຫາວິທີແກ້ໄຂ. ໂອກາດທີ່ມາຢ້ຽມຢາມຄັ້ງນີ້, ທ່ານ ນາງ ປານີ ຢາທໍ່ຕູ້ ພ້ອມດ້ວຍຄະນະ ໄດ້ມອບເຄື່ອງອຸ ປະໂພກ ແລະ ບໍລິໂພກ ໃຫ້ປະຊາຊົນທີ່ຖືກຜົນກະທົບ ເມືອງສອງຄອນ, ຊົນນະບູລີ ປະກອບ ມີ: ເຂົ້າສານ, ອາຫານແຫ້ງ, ນ້ຳດື່ມ ລວມມູນຄ່າ 300 ກວ່າລ້ານກີບ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)