ໃນວັນທີ 4 ພະຈິກ 2020 ຢູ່ໂຮງແຮມຄລາວພາຊາ, ນະຄອນຫລວງວຽງຈັນ ໄດ້ມີພິທີຖະແຫລງຂ່າວງານວາງສະແດງແນວທາງການພັດທະນາການທ່ອງທ່ຽວແບບຍືນຍົງ ອາຊຽນ 2020, ໂດຍການຖະແຫລງຂອງ ທ່ານ ນາງ ພອນມະລີ ອິນທະພົມ ຮອງຫົວໜ້າກົມພັດທະນາການທ່ອງທ່ຽວ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ພ້ອມດ້ວຍຜູ້ຕາງໜ້າຈາກອົງການສາກົນຕ່າງໆປະຈຳລາວ ແລະ ສື່ມວນຊົນທັງພາຍໃນ ແລະ ຕ່າງປະເທດເຂົ້າຮ່ວມ. ທ່ານ ນາງ ພອນມະລີ ອິນທະພົມ ກ່າວວ່າ: ງານວາງສະແດງດັ່ງກ່າວ, ຈະຈັດຂຶ້ນແຕ່ວັນທີ 5-7 ພະຈິກ 2020 ຢູ່ໂຮງແຮມຄລາວພາຊາ ນະຄອນຫລວງວຽງຈັນ ແລະ ຖືເປັນຄັ້ງທີ 2 ທີ່ ສປປ ລາວ ໄດ້ເປັນເຈົ້າພາບຈັດງານດັ່ງກ່າວ, ໂດຍຄັ້ງທຳອິດຈັດຂຶ້ນໃນປີ 2018 ຢູ່ແຂວງຫລວງພະບາງ. ກິດຈະກຳພາຍໃນງານປະກອບມີ: ວັນທີ 5-6 ພະຈິກ ແມ່ນງານວາງສະແດງ ແລະ ສຳມະນາທາງໄກຜ່ານລະບົບອອນລາຍ, ສ່ວນວັນທີ 7 ພະຈິກ ແມ່ນມີການແຂ່ງຂັນປຸງແຕ່ງອາຫານລາວ. ສຳລັບງານວາງສະແດງນີ້, ຈະມີຜູ້ປະກອບການທ່ອງທ່ຽວປະເພດຕ່າງໆ ຫລາຍຫົວໜ່ວຍຈາກ ສປປ ລາວ, ຫວຽດນາມ, ອິນໂດເນເຊຍ, ມາເລເຊຍ, ອົດສະຕຣາລີ, ຝຣັ່ງ ແລະ ປະເທດອື່ນໆ ຈາກອາຊີຕາເວັນອອກສຽງໃຕ້ເຂົ້າຮ່ວມວາງສະແດງ. ສະເພາະຫ້ອງວາງສະແດງຢູ່ໂຮງແຮມຄລາວພາຊາຈະມີທັງໝົດ 35 ຫົວໜ່ວຍ ໂດຍເຂົ້າຮ່ວມແບບບໍ່ເສຍຄ່າ.

ທ່ານ ນາງ ພອນມະລີ ອິນທະພົມ ກ່າວຕື່ມວ່າ: ຕະຫລອດການຈັດງານ ແມ່ນຈະມີເວທີສົນທະນາ ແລະ ສຳມະນາທາງໄກຫລາຍຫົວຂໍ້ສຳຄັນ ຄື: ທິດທາງການພັດທະນາການທ່ອງທ່ຽວຂອງອາຊຽນ, ການຕິດຕໍ່ສື່ສານການທ່ອງທ່ຽວ ໃນໄລຍະວິກິດການຢູ່ຈຸດໝາຍປາຍທາງການທ່ອງທ່ຽວ, ການນຳໃຊ້ເຕັກໂນໂລຊີ ເພື່ອປັບປຸງທຸລະກິດທ່ອງທ່ຽວ ແລະ ການຕ້ອນຮັບ, ການສະໜັບສະໜູນການທ່ອງທ່ຽວ ທີ່ປະຊາຊົນທ້ອງຖິ່ນມີສ່ວນຮ່ວມ, ການຫລຸດຜ່ອນການນຳໃຊ້ວັດສະດຸປລາສະຕິກ ແລະ ການຮັກສາຄວາມປອດໄພຂອງນັກທ່ອງທ່ຽວ, ການປະຢັດຕົ້ນທຶນການບໍລິຫານຂອງທຸລະກິດການທ່ອງທ່ຽວ ໂດຍການປະຢັດພະລັງງານໄຟຟ້າ, ການຟື້ນຟູການທ່ອງທ່ຽວຄືນໃໝ່, ເສດຖະກິດໝູນວຽນໃນຂະແໜງການທ່ອງທ່ຽວ ແລະ ລະບົບບຳບັດນ້ຳເປື້ອນສຳລັບທຸລະກິດສະຖານທີ່ພັກແຮມ. ງານວາງສະແດງນີ້, ຈັດຂຶ້ນເພື່ອນຳສະເໜີຜະລິດຕະພັນ ທີ່ເປັນມິດກັບສິ່ງແວດລ້ອມໃຫ້ບັນດາທຸລະກິດການທ່ອງທ່ຽວ, ປະກອບສ່ວນປະຕິບັດເປົ້າໝາຍການພັດທະນາແບບຍືນຍົງຂອງ ສປປ ລາວ, ທັງເປັນການໂຄສະນາອາຊຽນ ເປັນຈຸດໝາຍປາຍທາງການທ່ອງທ່ຽວທີ່ຍືນຍົງ, ໂດຍໄດ້ຮັບການສະໜັບສະໜູນ ຈາກໂຄງການເຊື່ອມໂຍງເສດຖະກິດລາວສູ່ເສດຖະກິດອາຊຽນ, ໂຄງການຂອງລັດຖະບານເຢຍລະມັນ (GIZ) ແລະ ໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ (USAID LBE), ໂຄງການທັກສະດ້ານການທ່ອງທ່ຽວ, ໂຄງການ Lao/029 ແລະ ພາກສ່ວນອື່ນໆ ຕື່ມອີກ.

#ຂ່າວ: ສຸພາສະຫວັນ ສີຊະນະມຸງຄຸນ

#ຮູບພາບ: ຂັນໄຊ