ໄລຍະມໍ່ໆ ມານີ້ ສື່ອອນລາຍໄດ້ເວົ້າເຖິງຄົນຕ່າງປະເທດ ຫຼື ວ່າສື່ຕ່າງປະເທດໄດ້ອອກມາກ່າວພາດພິງ ເຖິງປະເທດພວກເຮົາ ເຊິ່ງກໍ່ໄດ້ມີການອະທິບາຍ-ຕອບໂຕ້ກັນ ຜ່ານສື່ອອນລາຍ. ກໍລະນີຈັ່ງຊີ້ມັນບໍ່ແມ່ນເລື່ອງຮູ້ເທົ່າບໍ່ເຖິງການ ຫຼື ບັງເອີນແຕ່ມັນແມ່ນການດຳເນີນການຢ່າງມີການຈັດຕັ້ງຄັກ ແນ່ນອນໃນຍຸດທະສາດຫັນປ່ຽນ ໂດຍສັນຕິ ທີ່ບໍ່ມີເວລາໃດທີ່ພວກເຂົາຈະປະຖິ້ມນະໂຍບາຍນີ້.

ກໍລະນີບົດຂຽນຂອງອະດີດນັກການທູດສິງກະໂປນັ້ນແມ່ນສະແດງໃຫ້ເຫັນເຖິງການວາງແຜນສ້າງຄວາມແຕກແຍກພາຍໃນກຸ່ມອາຊຽນ ເພື່ອຮັບໃຊ້ມະຫາອຳນາດຕາເວັນຕົກ ໃນຍຸດທະສາດອິນໂດ-ປາຊີຟິກ. ເຊິ່ງກ່ອນໜ້ານີ້ຄື ໃນວັນທີ 6 ຕຸ ລາ 2020 ທີ່ກຸງໂຕກຽວ ໄດ້ມີກອງປະຊຸມແຝດສີ່ ໂດຍໄດ້ຍົກຫົວຂໍ້ວ່າ: ເພື່ອພາກພື້ນມະຫາສະໝຸດອິນເດຍ-ປາຊີ ຟີກ ທີ່ເສລີ ແລະ ເປີດກວ້າງບົນພື້ນຖານກົດໝາຍ… ທ່ານຜູ້ອ່ານທີ່ຕິດຕາມຈະຮູ້ໂລດວ່າມະຫາອຳນາດຂອງໂລກພວມຊອກທຸກວິທີທາງເພື່ອມີບົດບາດໃນພູມລັດຖະສາດຢູ່ຂົງ ເຂດນີ້… ຜູ້ເຄີຍມີບົດບາດມາຮອດດຽວນີ້, ກໍ່ຖືກຫຼຸດລົງ ສະນັ້ນເພື່ອຮັກສາບົດບາດກໍ່ຕ້ອງມີການເຄື່ອນໄຫວ ໂດຍນຳໃຊ້ເຄື່ອງມືຕ່າງໆ ນັບທັງໃຊ້ບຸກຄົນເປັນຕົວເດີນເກມ.

ໃນຄວາມເປັນຈິງແລ້ວ ສປປ ລາວ ແລະ ກຳປູເຈຍ ຖືວ່າເປັນຜູ້ດຶງການລົງທຶນເຂົ້າອາຊຽນຫຼາຍກວ່າເພິ່ນ. ເລື່ອງນີ້ ສະຖານີຂ່າວ TNN 16 ຂອງໄທ ທີ່ອອກອາກາດໃນວັນທີ 27 ກໍລະກົດ 2020 ໃນຄໍລຳ ອາຊຽນ 4.0 ໄດ້ຍົກໃຫ້ເຫັນຢ່າງຈະແຈ້ງເຖິງການດຶງການລົງຈາກຕ່າງປະເທດເຂົ້າອາຊຽນ ບໍ່ວ່າຈາກ ສປ ຈີນ, ຍີ່ປຸ່ນ, ມາເລເຊຍ, ສິງກະໂປ ແລະ ໄທ. ສຳລັບ ສປປ ລາວ ເຂົາບອກວ່າ: ກຳລັງເນື້ອຫອມຫຼັງໂຄວິດ -19 ວ່າຊັ້ນ ຍ້ອນເຫດຜົນລາວມີຄວາມໝັ້ນຄົງດ້ານການເມືອງ; ມີນະໂຍບາຍດຶງດູດການລົງທຶນທີ່ໜ້າພໍໃຈ. ໃນຂົງ ເຂດເສດຖະກິດຂອງລາວໂດດເດັ່ນສຳລັບນັກລົງທຶນຈາກໄທ ແມ່ນເຂດເສດຖະກິດພິເສດ ສະຫວັນ-ເຊໂນ ມີນັກລົງທຶນເຂົ້າໄປລົງທຶນເຖິງ 29 ໂຄງການ, ຢູ່ແຂວງຈຳປາສັກແຮ່ງສູງມີເຖິງ 59 ໂຄງການ. ເຊິ່ງສ່ວນຫຼາຍແມ່ນລົງທຶນໃນຂົງເຂດກະສິກຳ… ຍ້ອນໜ້າເຈ້ຍຈຳກັດ ຈຶ່ງບໍ່ສາ ມາດເລົ່າລະອຽດຂໍໃຫ້ເພື່ອນຜູ້ອ່ານເຂົ້າໄປເບິ່ງເອົານໍ?… ສ່ວນລາຊະອານາຈັກກຳປູເຈຍກໍ່ເຊັ່ນດຽວກັນ ທຶນຕ່າງປະເທດຫຼັ່ງໄຫຼເຂົ້າຫຼາຍ… ເຫດຜົນນີ້ກໍ່ເປັນສ່ວນໜຶ່ງ ເຮັດໃຫ້ເພື່ອນຂອງເຮົາຢູ່ກຸ່ມອາຊຽນເກີດມີຄວາມອິດສາຕາຮ້ອນ ກໍ່ເລີຍປ່ອຍຄຳເວົ້າແບບບໍ່ສຶກສາຄວາມເປັນຈິງອອກມາເຫົ່າຫອນຄືດັ່ງກ່າວ.

ກໍລະນີບຸກຄົນ; ສື່ມວນຊົນຈາກປະເທດໄທ ທີ່ອອກມາເວົ້າພາດພິງປະເທດເຮົາມັນກໍ່ບໍ່ແມ່ນເລື້ອງບັງເອີນ ຫຼື ຮູ້ເທົ່າບໍ່ເຖິງການດອກ. ມັນແມ່ນການຈັດຕັ້ງຄັກແນ່? ຂອງກຸ່ມຄົນບໍ່ດີໃນໄທ ທີ່ຫວັງມ້າງເພຄວາມສຳພັນຮ່ວມມືລະຫວ່າງສອງປະເທດ ເຊິ່ງປີນີ້ແມ່ນມີວາລະຄົບຮອບ 70 ປີ ແຫ່ງວັນສ້າງຕັ້ງສາຍພົວພັນການທູດ ລາວ-ໄທ (19 ທັນວາ 1950 – 19 ທັນວາ 2020) ເຊິ່ງລັດຖະບານສອງປະເທດ ເພິ່ນມີແຜນສະຫຼອງໃຫ້ຄຶກຄື້ນ.

ເລິ່ມຕົ້ນການປະຕິບັດການຂອງກຸ່ມຄົນບໍ່ດີໃນປີສຳຄັນນີ້ແມ່ນກໍລະນີ ທ້າວ ຈັດທິມະ ຜູ້ອ່ານຂ່າວຢູ່ໂທລະພາບຊ່ອງ one 31 ຂອງໄທ ໄດ້ນຳສະເໜີຂໍ້ມູນບໍ່ຖືກຕ້ອງກ່ຽວກັບການຮັບມືພະຍາດໂຄວິດ-19 ແລະ ວິພາກວິຈານແບບປາກສຸ ນັກຕໍ່ລະບົບສາທາລະນະສຸກຂອງລາວ ໃນເດືອນມີນາ 2020; ຕໍ່ມາໃນວັນທີ 4 ກັນຍາ 2020 ສື່ໄທໂດຍສະເພາະ ໂພສທູເດ ສະບັບວັນທີ 4 ກັນຍາ 2020 ກໍ່ອອກຂ່າວໃນຫົວຂໍ້: “ລາວຍອມໃຫ້ຈີນຄຸມເຂື່ອນ” ແຊກແຊງເຂົ້າການລົງທຶນຮ່ວມມືລະຫວ່າງ ລາວ-ຈີນ ແລະ ຫຼ້າສຸດໃນວັນທີ 20ຕຸລາ 2020  ໂທລະພາບຊ່ອງ 3 ໄທ ໄດ້ຍົກເອົາປະເດັນໃນສື່ອອນລາຍທີ່ອ້າງວ່າເປັນຂອງຄົນລາວມີເນື້ອໃນເປັນພາສາໄທລັກສະນະວ່າ: ຖ້າການເມືອງລາວດີ…ເປັນຫຍັງຈຶ່ງມີປະກົດການຫຍໍ້ທໍ້ຫຼາຍຢ່າງຢູ່ລາວ.

ກໍລະນີບຸກຄົນ ແລະ ສື່ໄທນີ້ເປັນເລື້ອງຊຳເຮື້ອບານປາຍມາຫຼາຍຄັ້ງ ແລະ ຫຼາຍປີຕິດຕໍ່ກັນ ສຸດທ້າຍພວກເຂົາກໍ່ອອກມາຂໍໂທດແລ້ວເລື່ອງກໍ່ມິດງຽບໄປ ເຫດການແບບນີ້ມີຜູ້ໃຫ້ທັດສະນະວ່າ ພວກເຮົາແຕ່ໃດມາເປັນຄົນໃຈດີ ແລະ ຈິງໃຈຕໍ່ເພື່ອນບ້ານ ໂດຍສະເພາະໃນກຸ່ມອາຊຽນ ແຕ່ກົງກັນຂ້າມເພື່ອນພັດປະຕິບັດຫຼາຍຢ່າງທີ່ບໍ່ເໝາະສົມ ແຕະຕ້ອງກຽດສັກສີຂອງປະເທດເຮົາ ທີ່ເປັນປະເທດທີ່ມີເອກະລາດ; ສະນັ້ນພວກເພິ່ນຈຶ່ງສະເໜີວ່າ: ມີບາງກໍລະນີກໍ່ຕ້ອງມີໃຈແດ່? ເດັດຂາດ-ເຂັ້ມແຂງ ເຊັ່ນໃນກໍລະນີກ່າວມາຂ້າງເທິງນັ້ນເຫັນສົມຄວນຈັດກຸ່ມຄົນດັ່ງກ່າວ, ສື່ສຳນັກຂ່າວທີ່ພົວພັນເຂົ້າໃນບັນຊີດຳອງບຸກຄົນ; ສຳນັກງານທີ່ບໍ່ເພິ່ງປາດຖະໜາສຳລັບປະເທດເຮົາ… ບໍ່ອະນຸຍາດໃຫ້ບຸກຄົນ; ສຳນັກງານດັ່ງກ່າວເຂົ້າມາດິນແດນ ສປປ ລາວ ຢ່າງເດັດຂາດ.

#ໂດຍ: ນັກຂ່າວອາວຸໂສ