ສະພາ​ທິດ​ສະ​ດີ​ສູນ​ກາງ​ພັກ, ຄະນະ​ຮັບຜິດຊອບ​ການ​ຄົ້ນຄວ້າ​ແນວ​ຄິດ ໄກສອນ ພົມວິຫານ, ສະ​ຖາ​ບັນ​ການ ເມືອງ ​ແລະ ​ການ​ປົກຄອງ​ແຫ່ງ​ຊາດ ແລະ ວິທະຍາຄານ​ປ້ອງ​ກັນ​ຊາດ ​ໄກສອນ ພົມວິ ຫານ ໄດ້​ຮ່ວມ​ກັນ​ຈັດ​ກອງ​ປະ​ຊຸມ​ສໍາ​ມະ​ນາ​ວິທະຍາສາດ​ລະດັບ​ຊາດ ພາຍ​ໃຕ້​ຫົວຂໍ້: ”ແນວຄິດ ​ໄກສອນ​ພົມວິຫານ ກ່ຽວ​ກັບ​ການ​ປ່ຽນແປງ​ໃໝ່​ໃນ​ຂົງເຂດ​ວຽກ​ງານ​ປ້ອງ​ກັນ​ຊາດ ”ໃນ​ວັນ​ທີ 4 ພະຈິກ​ນີ້ ທີ່​ສະໂມສອນ​ໃຫຍ່​ວິທະຍາຄານ​ປ້ອງ​ກັນ​ຊາດ​ໄກສອນ ພົມ​ວິ​ຫານ ໂດຍ​ການ​ເປັນ​ປະທານ​ຂອງ ທ່ານ ສົມ​ສະຫວາດ ເລັ່ງ​ສະ​ຫວັດ ອະ​ດີດ​ກໍາ​ມະ​ການ​ກົມ​ການເມືອງ​ສູນ​ກາງ​ພັກ ທີ່​ປຶກສາ​ຄະນະ​ບໍລິຫານ​ງານ​ສູນ​ກາງ​ພັກ ສະ ໄໝ​ທີ X.

ຈຸດປະສົງ​ໃນ​ການ​ຈັດ​ສໍາ​ມະ​ນາ​ຄັ້ງ​ນີ້, ເພື່ອ​ສ້າງ​ກິດ​ຈະ​ກໍາ​ສະເຫຼີມສະຫຼອງ​ວັນ​ບຸນ​ໃຫຍ່​ຂອງ​ຊາດ ປີ 2020 ຄື: ວັນ​ສ້າງຕັ້ງ​ພັກ​ປະຊາຊົນ ປະຕິວັດ​ລາວ ຄົບຮອບ 65 ປີ, ວັນ​ສະຖາປະນາ​ສາທາລະນະ​ລັດ ປະຊາທິປະໄຕ ປະຊາຊົນ​ລາວ ຄົບຮອບ 45 ປີ, ວັນ​ເກີດ​ປະທານ​ ໄກສອນ ພົມວິຫານ ຄົບຮອບ 100 ປີ ແລະ ວັນ​ສໍາ​ຄັນ​ອື່ນໆ​ຂອງ​ຊາດ​-​ຂອງ​ພັກ. ທ່ານ ສົມ​ສະຫວາດ ເລັ່ງ​ສະ​ຫວັດ ໄດ້​ກ່າວ​ວ່າ: ແນວ​ຄິດ​ໄກສອນ ພົມວິຫານ ກ່ຽວ​ກັບ​ວຽກ​ງານ​ປ້ອງ​ກັນ​ຊາດ ນັ້ນ​ແມ່ນ​ແນວ​ຄິດ​ປົດ​ປ່ອຍ​ຊາດ, ປົດ​ປ່ອຍ​ຊົນ​ຊັ້ນ ໂດຍ​ການ​ປະສານ​ສົມທົບ ລະຫວ່າງ ການ​ເສີມ​ຂະຫຍາຍ​ກຳລັງ​ແຮງ​ຂອງ​ຊາດ ກັບ​ການ​ຍາດ​ແຍ່ງ​ກຳລັງ​ແຮງ​ຂອງ​ຍຸກ​ສະໄໝ, ກ່ຽວ​ກັບ​ການ​ສ້າງ ແລະ​ເຕົ້າ​ໂຮມ​ກໍາ​ລັງ​ແຮງ​ຂອງ​ມະຫາຊົນ​ເຂົ້າ​ເປັນ​ກ້ອນ​ກຳລັງ​ມະຫາ​ສາມັກຄີ​ທົ່ວ​ປວງ​ຊົນ​ໃນ​ການ​ຕໍ່ສູ້​ກູ້​ຊາດ.

ເພື່ອ​ເຮັດ​ໃຫ້​ແນວ​ຄິດ​ດັ່ງກ່າວ​ປະກົດ​ເປັນ​ຈິງ ເພິ່ນ​ໄດ້​ມີ​ຄວາມ​ປີ​ຊາ​ສາມາດ​ໃນ​ການ​ປຸກລະດົມ​ນ້ຳໃຈ​ຮັກ​ຊາດ ແລະ ຈັດ​ຕັ້ງ​ປວງ​ຊົນ​ບັນດາເຜົ່າ, ບັນດາ​ຊັ້ນ​ຄົນ​ຢູ່​ໃນ​ທົ່ວ​ປະເທດ​ໃຫ້​ລຸກຂຶ້ນ​ດ້ວຍ​ຄວາມ​ຕື່ນ​ຕົວ ແລ້ວ​ສາມັກຄີ​ກັນ​ຕີ​ເອົາ​ຊະນະ​ສັດ​ຕູ.ປັດຈຸບັນ, ພາລະກິດ​ປະ ຕິວັດ ​ຂອງ​ປະຊາຊົນ​ເຮົາ ກຳ ລັງ​ກ້າວ​ເຂົ້າ​ສູ່​ໄລຍະ​ການ​ຂະ ຫຍາຍຕົວ​ໃໝ່ ທີ່​ມີ​ທັງກາລະ​ໂອກາດ ແລະ ສິ່ງ​ທ້າ​ທາຍ​ບໍ່​ໜ້ອຍ​ສະຫຼັບສັບຊ້ອນ​ກັນ.ໜ້າທີ່​ໃນ​ການ​ປົກ​ປັກ​ຮັກສາ​ປະເທດ​ຊາດ, ປົກ​ປັກ​ຮັກສາ​ໝາກຜົນ​ຂອງ​ການ​ປະຕິວັດ​ທີ່​ປະຊາຊົນ​ເຮົາ​ໄດ້​ຕໍ່ສູ້​ຍາດ​ມາ​ໄດ້ ດ້ວຍ​ເລືອດ​ເນື້ອ​ບໍ່​ຈັກ​ວ່າເທົ່າໃດ ຕິດ​ພັນ​ຢ່າງ​ແໜ້ນ​ແຟ້ນ​ກັບ​ພາລະກິດ​ສ້າງສາ​ພັດ ທະນາ​ປະເທດ​ຊາດ. ຕໍ່ໜ້າ​ສະ ພາບ​ການ​ດັ່ງກ່າວ ມັນ​ຮຽກຮ້ອງ ​ໃຫ້​ພວກ​ເຮົາ​ຕ້ອງ​ໄດ້​ສືບຕໍ່​ລົງ​ ເລິກ​ຄົ້ນຄວ້າ, ໝູນ​ໃຊ້​ຢ່າງ​ປະ ດິດ​ສ້າງ​ແນວ​ຄິດ​ ໄກສອນ ພົມ ວິຫານ ເຂົ້າ​ໃນພາລະກິດ​ການ​ສ້າງ​ກຳລັງ​ປ້ອງ​ກັນ​ຊາດ ໃຫ້​ມີ​ຄວາມ​ເຂັ້ມແຂງ, ໜັກ​ແໜ້ນ ແລະ​ ນັບ​ມື້​ນັບ​ທັນ​ສະ​ໄໝ.

ກອງ​ປະຊຸມ​ສຳ​ມະ​ນາ​ວິ ທະຍາສາດ​ລະດັບ​ຊາດ ພາຍ​ໃຕ້​ຫົວຂໍ້: “ແນວ​ຄິດ​ໄກສອນ ພົມວິຫານ ກັບ​ການ​ປ່ຽນແປງ​ໃໝ່ ໃນ​ຂົງເຂດ​ວຽກ​ງານ​ປ້ອງ​ກັນ​ຊາດ” ໃນ​ເທື່ອ​ນີ້ ແມ່ນ​ເປັນ​ກອງ​ປະຊຸມ ທີ່​ມີ​ຄວາມ​ໝາຍ​ສຳຄັນ​ທັງ​ໃນ​ດ້ານ​ທິດ​ສະ​ດີ ແລະ​ ພຶດຕິ​ກຳ ແລະ​ ເປັນ​ປະໂຫຍດ​ອັນ​ໃຫຍ່​ຫຼວງ​ແທດ​ຕົວ​ຈິງ​ຮັບ​ໃຊ້​ໃຫ້​ແກ່​ການຈັດຕັ້ງ​ປະຕິບັດ​ແນວທາງ​ນະໂຍບາຍ​ຂອງ​ພັກ​-​ລັດ​ເຮົາ ໃຫ້​ປະກົດ​ຜົນ​ເປັນ​ຈິງ.ທ່ານ ສົມ​ສະຫວາດ ເລັ່ງ​ສະ​ຫວັດ ຍັງ​ຮຽກຮ້ອງ​ມາ​ຍັງ​ບັນດາ​ນັກວິທະຍາສາດ ຈົ່ງ​ຍົກ​ສູງ​ຄວາມ​ຮັບຜິດຊອບ​ການເມືອງ, ຄົ້ນຄວ້າ​ໃຫ້​ເລິກ, ເຮັດໃຫ້​ສຸດ​ຂຸດ​ໃຫ້​ເຖິງ ເພື່ອ​ຊອກ​ໃຫ້​ເຫັນ​ໄດ້​ເຖິງ​ແກນ​ເຖິງ​ແອ້​ກະທິ​ແນວ​ຄິດ​ທິດ​ສະ​ດີ​ຂອງ​ເພິ່ນ ເພື່ອ​ກາຍເປັນ​ຄັງ​ສາງ​ທິດ​ສະ​ດີ. ແນວ​ຄິດ​ຊີ້​ນຳ​ທີ່​ມີ​ບົດບາດ​ຕັດສິນ​ພາລະກິດ​ປະຕິວັດ ຂອງ​ປະເທດ​ພວກ​ເຮົາ​ໃນ​ໄລຍະ​ໃໝ່; ບັນດາ​ທ່ານ​ທີ່​ເຂົ້າ​ຮ່ວມ ກໍ​ໃຫ້​ເອົາໃຈໃສ່​ໃນ​ການ​ຄິດ​ຫງຳ, ໃຫ້ການ​ປະກອບ​ຄຳ​ເຫັນ​ຢ່າງ​ກົງ​ໄປ​ກົງ​ມາ​ຕາມ​ຄຳ​ຖາມເຈາະ​ຈີ້ມ​ທີ່​ຄະນະ​ຮັບຜິດຊອບ​ໄດ້​ສົ່ງ​ໃຫ້​ກ່ອນ​ແລ້ວ​ນັ້ນ, ເຮັດ​ແນວໃດ​ໃຫ້​ເນື້ອ​ໃນ​ບົດ​ຄົ້ນຄວ້າ, ສຳ​ມະ​ນາ​ວິທະຍາສາດ​ໃນ​ຄັ້ງ​ນີ້​ສາມາດ​ຮັບປະກັນ ໄດ້​ທັງ​ລັກສະນະ​ພັກ, ລັກສະນະ​ວິທະຍາສາດ ແລະ ແທດ​ຕົວ​ຈິງ (ຖືກຕ້ອງ​ຕາມ​ຄວາມ​ເປັນ​ຈິງ).

Medialaos MMD (ແຫຼ່ງຂໍ້ມູນຈາກ: ໜັງສືພິມປະຊາຊົນ)