ງານວາງສະແດງແນວທາງການພັດທະນາ ການທ່ອງທ່ຽວແບບຍືນຍົງອາຊຽນ 2020 ໄດ້ໄຂຂຶ້ນ ໃນວັນທີ 6-7 ພະຈິກ 2020 ຢູ່ໂຮງແຮມຄຣາວພລາຊາ ນະຄອນຫລວງວຽງຈັນ, ໂດຍມີ ທ່ານ ອຸ່ນທວງ ຂາວພັນ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ທ່ານ ນາງ ບຸນຄໍາ ວໍລະຈິດ ຮອງລັດຖະມົນຕີ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ທ່ານນາງ ນິໂກສະເຕັກແມນ ຮອງຫົວໜ້າສໍານັກງານການທູດເຢຍລະມັນ ປະຈໍາລາວ, ທ່ານ ອຸເດດສຸວັນນະວົງ ປະທານສະພາການຄ້າ ແລະ ອຸດສາຫະກໍາແຫ່ງຊາດ, ມີຜູ້ຕາງໜ້າທູຕານຸທູດ, ອົງການສາກົນ ປະຈໍາລາວ ແລະ ຜູ້ປະກອບການທ່ອງທ່ຽວເຂົ້າຮ່ວມ.

ທ່ານ ອຸ່ນທວງ ຂາວພັນ ໄດ້ຂຶ້ນມີຄໍາເຫັນກ່າວເປິດພິທີວ່າ: ງານວາງສະແດງນີ້, ແມ່ນກິດຈະກໍາໜຶ່ງ ທີ່ຈະເຮັດໃຫ້ຜູ້ປະກອບການທຸລະກິດທ່ອງທ່ຽວ ໃນຂົງເຂດອາຊຽນ ເຫັນໄດ້ຄວາມສໍາຄັນຕໍ່ແນວທາງການພັດທະນາການທ່ອງທ່ຽວແບບຍືນຍົງເພີ່ມຂຶ້ນ ເປັນຕົ້ນແມ່ນ ວິທີການຫລຸດຜ່ອນການນໍາໃຊ້ວັດສະດຸ ພລາສະຕິກແລ້ວ ນໍາເອົາສິ່ງເສດເຫລືອມາຜະລິດ ແລະ ນໍາໃຊ້ຄືນໃໝ່, ການບໍລິໂພກສິນຄ້າພາຍໃນທີ່ປອດສານພິດ ແລະ ການນໍາໃຊ້ພະລັງງານທີ່ຍືນຍົງ. ອັນສໍາຄັນງານດັ່ງກ່າວ, ຈະຊ່ວຍສົ່ງເສີມການພັດທະນາການທ່ອງທ່ຽວຢູ່ອາຊຽນພວກເຮົາມີບັນຍາກາດຟົດຟື້ນ, ເວົ້າສະເພາະຢູ່ ສປປ ລາວໃຫ້ໄປຕາມທິດການພັດທະນາການທ່ອງທ່ຽວສີຂຽວ ແລະ ຍືນຍົງ ກໍຄື ສ້າງສປປ ລາວ ໃຫ້ເປັນຈຸດໝາຍປາຍທາງການທ່ອງທ່ຽວທີ່ມີຄຸນນະພາບ.ທ່ານ ນາງ ພອນມະລີ ອິນທະພົມ ຮອງຫົວໜ້າກົມພັດທະນາການທ່ອງທ່ຽວ ໄດ້ໃຫ້ຮູ້ວ່າ: ຢູ່ ສປປ ລາວ ເຮົາໄດ້ຈັດງານວາງສະແດງລັກສະນະນີ້ມາແລ້ວ 2 ຄັ້ງ ຄື: ໃນປີ 2018 ຈັດຢູ່ແຂວງຫລວງພະບາງ ແລະ 2019 ຈັດຢູ່ນະຄອນຫລວງວຽງຈັນ ແລະ ງານຄັ້ງນີ້ ມີຜູ້ປະກອບການທ່ອງທ່ຽວປະເພດຕ່າງໆເຂົ້າຮ່ວມຫລາຍກວ່າ 35 ຫົວໜ່ວຍ.

ນອກນີ້, ຍັງມີຜູ້ປະກອບການ ການທ່ອງທ່ຽວຢູ່ຕ່າງປະເທດໄດ້ເຂົ້າຮ່ວມວາງສະແດງແບບທາງໄກ (ຜ່ານລະບົບອອນລາຍ) ຢູ່ບັນດາປະເທດອາຊຽນ ເຊັ່ນ: ສສ.ຫວຽດນາມ, ອິນໂດເນເຊຍ, ສິງກະໂປ, ມາເລເຊຍ, ໄທ, ອົດສະຕລາລີ, ຝລັ່ງ ແລະ ແອດສະປາຍອີກຈໍານວນ 20 ກວ່າຫົວໜ່ວຍ, ໂດຍຜະລິດຕະພັນສ່ວນຫລາຍທີ່ນໍາມາວາງສະແດງ ແລະ ນໍາສະເໜີ ແມ່ນບັນດາສະຖານທີ່ພັກແຮມ, ສະຖານທີ່ທ່ອງທ່ຽວ, ຜະລິດຕະພັນອິນຊີ, ເຕັກໂນໂລຊີການຜະລິດ ແລະ ການນໍາໃຊ້ຄືນໃໝ່, ລະບົບນໍ້າ ແລະ ພະລັງງານທີ່ເປັນມິດກັບສິ່ງແວດລ້ອມ ແລະ ຜະລິດຕະພັນເຄື່ອງທີ່ລະນຶກ ທີ່ເຮັດດ້ວຍມືດັ່ງນີ້ເປັນຕົ້ນ.

ນອກຈາກນີ້, ຍັງມີການສໍາມະນາແລກປ່ຽນຄໍາຄິດ ຄໍາເຫັນເພື່ອການພັດທະນາການທ່ອງທ່ຽວແບບຍືນຍົງ ໃນຫລາຍຫົວຂໍ້ ເປັນຕົ້ນ: ທິດທາງການພັດທະນາການ ທ່ອງທ່ຽວຂອງອາຊຽນ, ການຕິດຕໍ່ສື່ສານການທ່ອງທ່ຽວໃນໄລຍະວິກິດການ ຢູ່ຈຸດໝາຍປາຍທາງການ ທ່ອງທ່ຽວ, ການນໍາໃຊ້ເຕັກໂນໂລຊີ ເພື່ອປັບປຸງທຸລະກິດການທ່ອງທ່ຽວ ແລະ ການຕ້ອນຮັບ, ການສະໜັບສະໜູນການທ່ອງທ່ຽວທີ່ປະຊາຊົນທ້ອງຖິ່ນມີສ່ວນຮ່ວມ, ການຫລຸດຜ່ອນການນໍາໃຊ້ວັດສະດຸພລາສະຕິກ ແລະ ການຮັກສາຄວາມປອດໄພຂອງນັກທ່ອງທ່ຽວ, ການປະຢັດຕົ້ນທຶນການບໍລິຫານຂອງທຸລະກິດການທ່ອງທ່ຽວ ໂດຍການປະຢັດພະລັງງານໄຟຟ້າ, ການຟື້ນຟູການທ່ອງທ່ຽວຄືນໃໝ່, ເສດຖະກິດໝູນ ວຽນໃນຂະແໜງການທ່ອງທ່ຽວ ແລະ ລະບົບບໍາບັດນໍ້າເປື້ອນໃນສະຖານທີ່ພັກແຮມ.

ສະນັ້ນ, ຈຶ່ງຂໍເຊີນຊວນປະຊາຊົນບັນດາເຜົ່າ ຕະຫລອດຮອດຜູ້ປະກອບການ ການທ່ອງທ່ຽວ ທຸກພາກສ່ວນ ແລະ ຜູ້ທີ່ສົນໃຈໃນວຽກງານການທ່ອງທ່ຽວ ທັງພາຍໃນ ແລະ ຕ່າງປະເທດ ໃຫ້ເຂົ້າຮ່ວມຊົມງານວາງສະແດງດັ່ງກ່າວ ໂດຍບໍ່ເສຍຄ່າໄດ້ຕະຫລອດການຈັດງານ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)