ໃນວັນທີ 9 ພະຈິກ 2020 ນີ້ທີ່ຫໍວັດທະນະທໍາແຫ່ງຊາດ, ໄດ້ມີກອງປະຊຸມຜ່ານ ຮ່າງບົດລາຍງານການເມືອງ ແລະ ຮ່າງບົດສຳຫລວດການຊີ້ນຳ-ນຳພາ ຂອງຄະນະບໍລິຫານງານ ພັກກະຊວງຄະນະບໍລິຫານງານພັກກະຊວງ ຖະແຫລງຂ່າວ, ວັດທະນະທໍາ ແລະ ທ່ອງທ່ຽວ (ຖວທ)  ເພື່ອກະກຽມຄວາມພ້ອມດ້ານຕ່າງໆ ໃຫ້ແກ່ການດໍາເນີນກອງປະຊຸມໃຫຍ່ ອົງຄະນະພັກ ກະຊວງ ຖວທ ຄັ້ງທີ V. ໂດຍການເປັນປະທານຂອງ ສະຫາຍ ກິແກ້ວ ໄຂຄຳພິທູນ ເລຂາທິການສູນກາງພັກ, ເລ ຂາຄະນະບໍລິຫານງານພັກ, ລັດຖະມົນຕີກະຊວງ ຖວທ, ມີບັນດາຄະນະພັກ, ຮອງລັດຖະມົນຕີ, ຫົວໜ້າກົມ-ຮອງກົມ, ຫົວໜ້າພະແນກ-ຮອງພະແນກ ອ້ອມຂ້າງກະຊວງ ເຂົ້າຮ່ວມຢ່າງພ້ອມພຽງ.

ໃນໂອກາດນີ້, ສະຫາຍ ກິແກ້ວ ໄຂຄຳພິທູນ ໄດ້ກ່າວວ່າ: ເພື່ອເປັນການສືບຕໍ່ກະກຽມຄວາມພ້ອມດ້ານຕ່າງໆ ໃຫ້ແກ່ການດໍາເນີນ ກອງປະຊຸມໃຫຍ່ ອົງຄະນະພັກກະຊວງ ຖວທ ຄັ້ງທີ V ໂດຍແມ່ນການກ້າວເຂົ້າສູ່ ການທາບທາມຮອບທີ II ກ່ຽວກັບບຸກຄະລາກອນ ທີ່ຈະລົງສະໝັກເຂົ້າເປັນຄະນະພັກກະຊວງຊຸດໃໝ່; ສະນັ້ນ ພວກເຮົາຈະມີການປະກອບຄໍາຄິດຄໍາເຫັນເຂົ້າໃສ່ຮ່າງລາຍງານ ການເມືອງເປັນເອກະສານສໍາຄັນຂອງກອງປະຊຸມໃຫຍ່ ແລະ ຮ່າງບົດສໍາຫລວດການນໍາພາລວມຂອງຄະນະບໍລິຫານງານພັກກະຊວງ ຕະຫລອດໄລຍະ 5 ປີຜ່ານມາ ແລະ ພ້ອມທັງດໍາເນີນປ່ອນບັດ ທາບທາມບຸກຄະລາກອນຮອບທີ II ໃນການກໍານົດເອົາ ຈໍານວນລາຍຊື່ ບຸກຄະລາກອນສືບຕໍ່ ເຂົ້າທາບທາມ ໃນຮອບທີ III ຕໍ່ໄປ ເພື່ອກະກຽມກອງປະຊຸມໃຫຍ່ ຂອງອົງຄະນະພັກຊຸດໃໝ່. ໃນແຕ່ລະໜ້າວຽກທີ່ໄດ້ດໍາເນີນລ້ວນແລ້ວແຕ່ມີອົງປະກອບສໍາຄັນ ໃນນັ້ນ, ບັນຫາທີ່ຄວນເອົາໃຈໃສ່ ກໍແມ່ນດ້ານເນື້ອໃນຈະໄດ້ມີການປະກອບຄໍາຄິດຄໍາເຫັນ ແລະ ຕີລາຄາວຽກງານຜ່ານມາ, ທັງກໍານົດໜ້າທີ່ ການເມືອງໃນໄລຍະຕໍ່ໄປ; ອີກດ້ານໜຶ່ງ ແມ່ນຖືເອົາໂອກາດນີ້ ເພື່ອກໍາແໜ້ນ ເຊື່ອມຊຶມເນື້ອໃນສໍາຄັນຕ່າງໆ ເພື່ອຈັດຕັ້ງປະຕິບັດ ໃຫ້ເກີດຜົນເປັນຈິງ. ພ້ອມນັ້ນ ກໍໃຫ້ເອົາໃຈໃສ່ຍົກສູງຄວາມຮັບຜິດຊອບການເມືອງ, ຍົກສູງສະຕິປັນຍາເຂົ້າໃນການ ຄົ້ນຄ້ວາໃຫ້ມີຄວາມເລິກເຊິ່ງ ແລະ ມີຄວາມລະອຽດ.

ສະຫາຍ ເລຂາທິການສູນກາງພັກ ຍັງຮຽກຮ້ອງໃຫ້ບັນດາ ສະຫາຍຜູ້ເຂົ້າຮ່ວມກອງປະຊຸມ ຈົ່ງໄດ້ພ້ອມກັນເອົາໃຈໃສ່ ຕິດຕາມຮັບຟັງກໍາແໜ້ນ ແລະ ມີການຄົ້ນຄ້ວາໃຫ້ເລິກ ເຊິ່ງ ແລະ ເຊື່ອມຊຶມໃຫ້ມີຄວາມໜັກແໜ້ນ, ເພື່ອຈະໄດ້ນໍາເອົາການ ປະກອບຄໍາຄິດຄໍາເຫັນໄປສັງລວມ, ປັບປຸງຮ່າງລາຍງານ ການ ເມືອງ ແລະ ປັບປຸງຮ່າງບົດສໍາຫລວດ ໃຫ້ມີຄວາມພ້ອມ ແລະ ສົມບູນ ເພື່ອສະເໜີຕໍ່ຂັ້ນເທິງຮັບຮອງເອົາ.

ຈາກນັ້ນ, ສະຫາຍ ວັນສີ ກົວມົວ ຮອງລັດຖະມົນຕີກະຊວງ ຖວທ ໄດ້ຜ່ານຮ່າງບົດລາຍງານ ການເມືອງຂອງກະຊວງ ຖວທ ຊຶ່ງໄດ້ຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ອົງຄະນະພັກກະຊວງ ຖວທ ຄັ້ງທີ IV(2016-2020), ທິດທາງລວມ ແລະ ໜ້າທີ່ຕົ້ນຕໍໃນການນຳພາຂອງອົງຄະນະພັກກະຊວງ ຖວທ 5 ປີ(2021-2025) ແລະ ສະຫາຍ ບົວເງິນ ຊາພູວົງ ຮອງເລຂາຄະນະພັກ ຮອງລັດຖະມົນຕີກະຊວງ ຖວທ ກໍໄດ້ຂຶ້ນຜ່ານບົດສຳຫລວດການນຳພາລວມຂອງຄະນະບໍລິຫານງານພັກກະຊວງ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)