ມາຮອດປະຈຸບັນ, ລະດັບນໍ້າເຊ ແລະ ສາຍນໍ້າສາຂາຕ່າງໆ ໄດ້ຫລຸດລົງກັບເຂົ້າສູ່ສະພາບປົກກະຕິ, ແຕ່ປະຊາຊົນຜູ້ທີ່ໄດ້ຮັບຜົນກະທົບ ກໍຍັງມີຄວາມຕ້ອງການເຂົ້າປາອາຫານ ແລະ ທຶນຮອນຈຳນວນຫລາຍເພື່ອຟື້ນຟູ, ບູລະນະພື້ນຖານໂຄງລ່າງທີ່ເປ່ເພເສຍຫາຍ ເຊິ່ງການນໍາຂັ້ນສູນກາງ ກໍຄືຂັ້ນແຂວງ ກໍຍັງເປັນຫ່ວງພໍ່ແມ່ປະຊາຊົນ ແລະ ເອົາໃຈໃສ່ລົງຕິດຕາມກວດກາເປັນປະຈໍາ, ທັງນຳເອົາເຄື່ອງຊ່ວຍເຫລືອບັນເທົາທຸກໄປມອບໃຫ້ປະຊາຊົນຜູ້ທີ່ໄດ້ຮັບຜົນກະທົບຢ່າງຕໍ່ເນື່ອງ.

ແຫລ່ງຂ່າວ ຈາກເຟສບຸກສະຫວັນພັດທະນາ ໃຫ້ຮູ້ວ່າ: ໃນອາທິດທີ່ຜ່ານມານີ້, ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫລວງວຽງຈັນ ພ້ອມຄອບຄົວ ການນຳ ແລະ ພາກສ່ວນຕ່າງໆ ທັງພາກລັດ, ນັກທຸລະກິດໄດ້ນຳເຄື່ອງ ຊ່ວຍເຫລືອໄປມອບໃຫ້ ແກ່ຜູ້ປະສົບໄພ ຈາກໄພນໍ້າຖ້ວມຢູ່ ເມືອງເຊໂປນ ແຂວງສະຫວັນນະເຂດ, ໂດຍມທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ພ້ອມພະແນກແຮງງານ, ສະຫວັດດີການ-ສັງຄົມແຂວງ, ພະແນກກະສິກຳ ແລະປ່າໄມ້ ແຂວງ, ເຈົ້າເມືອງເຊໂປນ, ເຈົ້າເມືອງໆນອງ ແລະ ເຈົ້າເມືອງພີນ ເຂົ້າຮ່ວມນຳ, ສຳລັບວັດຖຸ ແລະ ປັດໄຈ ທີ່ເຈົ້າຄອງນະຄອນຫລວງວຽງຈັນ ນຳມາມອບໃນຄັ້ງນີ້ ໄດ້ຈາກນໍ້າໃຈການປະກອບສ່ວນຂອງຄະນະພັກ, ອົງການ ປົກຄອງ, ນັກທຸລະກິດ, ຄອບຄົວ ແລະ ປະຊາຊົນຊາວນະຄອນຫລວງວຽງຈັນ ຊຶ່ງປະກອບດ້ວຍ: ເຂົ້າສານ 38 ໂຕນ, ນໍ້າດື່ມ, ໝີ່, ປາກະປ໋ອງ, ເຄື່ອງນຸ່ງ, ເຄື່ອງໃຊ້ໃນຄົວເຮືອນ ແລະ ເງິນສົດ 52 ລ້ານກີບ, ລວມມູນຄ່າ ທັງໝົດ 347 ລ້ານກວ່າກີບ.

ເມືອງເຊໂປນ ຖືກນໍ້າຖ້ວມ 51 ບ້ານ, 2.859 ຫລັງຄາ 3.266 ຄອບຄົວ, ເຮືອນກວ່າ 30 ຫລັງ ຖືກນ້ຳໄຫລຊຸໜີ, ເນື້ອທີ່ນາຖືກນໍ້າຖ້ວມ 2.205 ເຮັກຕາ, ສວນປູກເຂົ້າ 1.560 ເຮັກຕາ, ສວນກ້ວຍ 1.560 ເຮັກຕາ, ສວນມັນຕົ້ນ 52 ເຮັກຕາ, ໜອງປາ 271 ໜອງ, ຄວາຍຕາຍ 6 ໂຕ, ງົວຕາຍ 116 ໂຕ, ແບ້ 302 ໂຕ, ສຸກສາລາຖືກນໍ້າຖ້ວມ4 ແຫ່ງ, ວິດຖ່າຍ 961 ໜ່ວຍ, ນໍ້າບາດານ 1 ພັນກວ່າບໍ່, ໂຮງຮຽນ 21 ຫລັງ ແລະ ພື້ນຖານຕ່າງໆເຊັ່ນເສັ້ນ ທາງ, ຂົວ, ທໍ່, ລະບົບຊົນລະປະທານອື່ນໆ.

ທ່ານ ບຸນລົບ ໂຄດຫລັກຄຳ ຫົວໜ້າພະແນກແຮງງານ, ສະຫວັດດີການ-ສັງຄົມ ລາຍງານວ່າ: ທົ່ວແຂວງສະຫວັນນະເຂດ, ມີ 8 ເມືອງ 147 ບ້ານທີ່ຖືກນໍ້າຖ້ວມ, ເນື້ອທີ່ນາ 29.590 ເຮັກຕາ, ສວນ ແລະ ພືດຜັກຕ່າງໆ 600 ກວ່າເຮັກຕາ, ໜອງປາ 2.683 ໜອງ, ສັດລ້ຽງຕາຍ ແລະ ສູນຫາຍມີຄວາຍ 84 ໂຕ, ງົວ 185 ໂຕ, ແບ້ 294 ໂຕ, ໝູ 594 ໂຕ, ໂຮງຮຽນຖືກນໍ້າຖ້ວມ 90 ແຫ່ງ, ມີຫລາຍແຫ່ງຢຸດການຮຽນ-ການສອນຊົ່ວຄາວ; ນອກນີ້ ຍັງມີພື້ນຖານໂຄງລ່າງຕ່າງໆອີກຈຳນວນຫລາຍເສຍຫາຍ.

ໂອກາດນີ້, ທ່ານເຈົ້າແຂວງ ສະຫວັນນະເຂດ ໄດ້ກ່າວຂອບໃຈຕໍ່ທ່ານເຈົ້າ ຄອງນະຄອນຫລວງວຽງຈັນ ທີ່ໄດ້ໃຫ້ການປະກອບສ່ວນ ເຂົ້າໃນພາລະກິດ ຊ່ວຍເຫລືອບັນເທົາທຸກ ແກ່ຜູ້ປະສົບໄພນໍ້າຖ້ວມຄັ້ງນີ້, ສຳລັບເຄື່ອງອຸປະໂພກ-ບໍລິໂພກ ແລະ ປັດໄຈເຫລົ່ານີ້ ທາງອຳນາດການປົກຄອງແຂວງ ແລະ ເມືອງ ຈະໄດ້ນຳໄປມອບຕໍ່ໃຫ້ປະຊາຊົນບ້ານຕ່າງໆທີ່ໄດ້ຮັບຜົນກະທົບໃຫ້ທົ່ວເຖິງ.

ຈາກນັ້ນ, ໃນຕອນບ່າຍຂອງວັນດຽວກັນທ່ານເຈົ້າ ຄອງນະຄອນຫລວງວຽງຈັນ ກໍໄດ້ສືບຕໍ່ໄປມອບເຄື່ອງຊ່ວຍເຫລືອໃຫ້ ເມືອງພີນຕື່ມອີກລວມ ມູນຄ່າ 78 ລ້ານກວ່າ ກີບ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)