ໃນວັນທີ 19 ພະຈິກ 2020 ນີ້, ສະຫາຍ ສົມພອນ ສີຈະເລີນ, ຮອງຫົວໜ້າຄະນະພົວພັນຕ່າງປະເທດສູນກາງພັກ ພ້ອມກັບພະນັກງານຫຼັກແຫຼ່ງຈາກບັນດາກະຊວງ-ອົງການຂັ້ນສູນກາງຂອງລາວ ໄດ້ເຂົ້າຮ່ວມກອງປະຊຸມແລກປ່ຽນບົດຮຽນທາງໄກ ກັບ ຄະນະພົວພັນຕ່າງປະເທດສູນກາງພັກກອມມູນິດຈີນ.

ໃນກອງປະຊຸມ, ສະຫາຍ ຫວັງ ຢາຈຸນ, ຮອງຫົວໜ້າຄະນະພົວພັນຕ່າງປະເທດສູນກາງພັກຂອງຈີນ ໄດ້ແຈ້ງໃຫ້ ຄະນະຝ່າຍລາວຮັບຊາບ ກ່ຽວກັບເນື້ອໃນຕົ້ນຕໍຂອງກອງປະຊຸມຄົບຄະນະ ຄັ້ງທີ 5 ສະໄໝທີ XIX ຂອງຄະນະກໍາມະການສູນກາງພັກກອມມູນິດຈີນ ທີ່ຈັດຂຶ້ນໃນທ້າຍເດືອນຕຸລາ ຜ່ານມານີ້

ໂດຍໄດ້ຍົກໃຫ້ເຫັນເຖິງຄວາມໝາຍສໍາຄັນ ແລະ ຈຸດປະສົງຂອງກອງປະຊຸມດັ່ງກ່າວ ໂດຍສະເພາະແມ່ນການຄົ້ນຄວ້າປະກອບຄໍາເຫັນຂອງພາກສ່ວນຕ່າງໆໃນທົ່ວສັງຄົມ ເຂົ້າໃນການຄົ້ນຄວ້າພິຈາລະນາ ແລະ ຮັບຮອງເອົາຮ່າງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 14 ແລະ ຮ່າງແຜນຍຸດທະສາດການພັດທະນາຮອດປີ 2035 ເພື່ອເປັນທິດທາງໃນການພັດທະນາ ສປ ຈີນ ໃນຍຸກສະໄໝໃໝ່.

ສະຫາຍ ສົມພອນ ສີຈະເລີນ ໄດ້ຕາງໜ້າໃຫ້ແກ່ ຄະນະຜູ້ແທນຝ່າຍລາວຕີລາຄາສູງຕໍ່ຜົນສໍາເລັດຂອງກອງປະຊຸມຄົບຄະນະ ຄັ້ງທີ 5 ສະໄໝທີ XIX ຂອງຄະນະກໍາມະການສູນກາງພັກກອມມູນິດຈີນ ກໍຄື ການຮັບຮອງເອົາຮ່າງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 14 ແລະ ຮ່າງແຜນຍຸດທະສາດການພັດທະນາຮອດປີ 2035 ຂອງ ສປ ຈີນ ຊຶ່ງສອງແຜນຍຸດທະສາດດັ່ງກ່າວ ແມ່ນມີຄວາມສໍາຄັນຫຼາຍຕໍ່ພາລະກິດການສ້າງສັງຄົມນິຍົມທີ່ມີສີສັນພິເສດຂອງ ສປ ຈີນ ໃນຍຸກສະໄໝໃໝ່, ເປັນແຜນພັດທະນາເສດຖະກິດ-ສັງຄົມ ທີ່ທົ່ວພັກ ແລະ ປະຊາຊົນຈີນອ້າຍນ້ອງ ຈະໄດ້ພ້ອມກັນຈັດຕັ້ງປະຕິບັດພາຍຫຼັງບັນລຸເປົ້າໝາຍການສ້າງສັງຄົມອິ່ມໜໍາສໍາລານຮອບດ້ານໂດຍພື້ນຖານ ແລະ ບັນລຸເປົ້າໝາຍເຫດການຮ້ອຍປີຄັ້ງທີໜຶ່ງ, ທັງເປັນການເປີດສັກກະລາດໃໝ່ບົນເສັ້ນທາງເພື່ອບັນລຸເປົ້າໝາຍສ້າງສັງຄົມນິຍົມທີ່ມີສີສັນພິເສດຂອງຈີນ ໃຫ້ກ້າວສູ່ຄວາມທັນສະໄໝຮອບດ້ານ ແລະ ບັນລຸເປົ້າໝາຍ “100 ປີ ຄັ້ງທີສອງ”.

ໃນກອງປະຊຸມ, ພະນັກງານຫຼັກແຫຼ່ງຈາກກະຊວງ-ອົງການຂັ້ນສູນກາງທີ່ກ່ຽວຂ້ອງ ເຊັ່ນ: ຫ້ອງວ່າການສູນກາງພັກ, ຫ້ອງວ່າການສຳນັກງານນາຍົກລັດຖະມົນຕີ, ຄະນະຈັດຕັ້ງສູນກາງພັກ, ຄະນະກວດກາສູນກາງພັກ, ຄະນະໂຄສະນາອົບຮົມສູນກາງພັກ, ຄະນະພົວພັນຕ່າງປະເທດສູນກາງພັກ, ສະພາທິດສະດີສູນກາງພັກ, ສະຖາບັນການເມືອງ-ການປົກຄອງແຫ່ງຊາດ, ສະຖາບັນຄົ້ນຄວ້າເສດຖະກິດ-ສັງຄົມແຫ່ງຊາດ, ກະຊວງການຕ່າງປະເທດ ແລະ ກະຊວງແຜນການ ແລະ ການລົງທຶນ ຈໍານວນ 50 ກວ່າສະຫາຍ ຍັງໄດ້ຮັບຟັງບາງທັດສະນະທີ່ເປັນພື້ນຖານ ແລະ ມາດຕະການໃນການພັດທະນາເສດຖະກິດຂອງຈີນ ໃນໄລຍະໃໝ່ ແລະ ແລກປ່ຽນບົດຮຽນກັບບັນດາຊ່ຽວຊານ-ນັກຄົ້ນຄວ້າ ຈາກໂຮງຮຽນພັກສູນກາງພັກກອມມູນິດຈີນ, ຄະນະກໍາມະການປະຕິຮູບ ແລະ ການພັດທະນາແຫ່ງຊາດຈີນ.

Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)