ສອງຄະນະກຳມະການຮ່ວມມື ລາວ-ຫວຽດນາມ ແລະ ຫວຽດນາມ-ລາວ ໄດ້ຈັດກອງປະຊຸມພົບປະເຮັດວຽກຮ່ວມກັນ ໃນລະຫວ່າງ ວັນທີ 20-21 ພະຈິກ 2020 ທີ່ດ່ານນໍ້າພາວ-ເກົາແຈວເພື່ອປຶກສາຫາລືບັນດາເນື້ອໃນເອກະສານຮັບໃຊ້ກອງປະຊຸມ ຄັ້ງທີ 43 ຂອງຄະນະກຳມະການຮ່ວມມືທະວິພາຄີ ລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສສ ຫວຽດນາມ ປະຈຳປີ 2021 ເຊິ່ງຄາດວ່າ ຈະໄດ້ຈັດຂຶ້ນໃນຕົ້ນເດືອນທັນວາ 2020 ນີ້.

ພາຍໃຕ້ການເປັນປະທານຮ່ວມ ຂອງ ທ່ານ ຄຳເຜີຍ ແກ້ວກິນນາລີ ຮອງປະທານຜູ້ປະຈຳການ ຄະນະກຳມະການຮ່ວມມື ລາວ-ຫວຽດນາມ ແລະ ທ່ານ ຫງວຽນ ວັນ ຈຸງ ຮອງລັດຖະມົນຕີ ກະຊວງແຜນການ ແລະ ການລົງທຶນ, ຮອງປະທານຄະນະກໍາມະການຮ່ວມມື ຫວຽດນາມ-ລາວ, ໂດຍມີຜູ້ຕາງໜ້າຈາກບັນດາກະຊວງ, ອົງການຈາກສູນກາງ ແລະ ທ້ອງຖິ່ນ ຂອງສອງຝ່າຍເຂົ້າຮ່ວມ 80 ກວ່າທ່ານ.ກອງປະຊຸມຄັ້ງນີ້, ສອງຝ່າຍໄດ້ຕີລາຄາສູງເຖິງໝາກຜົນ ຂອງການພົວພັນຮ່ວມມືໃນໜຶ່ງປີຜ່ານມາ ເຖິງວ່າເກີດມີການລະບາດຂອງພະຍາດໂຄວິດ-19 ແຕ່ສອງຝ່າຍ ກໍບໍ່ໄດ້ເຮັດໃຫ້ການແຜ່ລະບາດຂອງພະ ຍາດດັ່ງກ່າວ ເປັນໂຕຂັດຂວາງການພົວພັນຮ່ວມມື ລະຫວ່າງສອງປະເທດ.

ພ້ອມກັນນັ້ນ, ສອງຝ່າຍ ໄດ້ຮ່ວມກັນປັບປຸງຮ່າງເນື້ອໃນຍຸດທະສາດການຮ່ວມມື ລາວ-ຫວຽດນາມ ໄລຍະ 10 ປີ (2021-2030), ສັນຍາຮ່ວມມື ໄລຍະ 5 ປີ (2021-2025), ພ້ອມທັງສະຫລຸບຕີລາຄາຄືນ ສະພາບການພົວພັນຮ່ວມມືລົງທຶນ ລາວ-ຫວຽດນາມ ປີ 2020 ແລະ ກຳນົດທິດທາງການຮ່ວມມືປະຈຳປີ 2021.

ນອກຈາກນັ້ນ, ສອງຝ່າຍໄດ້ເຊັນບົດບັນທຶກໃນການເຮັດວຽກ ເພື່ອເປັນເອກະພາບ ໃນການກະກຽມເນື້ອໃນໃຫ້ແກ່ກອງປະຊຸມຄັ້ງທີ 43 ປະຈຳ ປີ 2021 ຂອງຄະນະກຳມະການຮ່ວມມືທະວິພາຄີ ລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສສ ຫວຽດນາມ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)