ກອງປະຊຸມໃຫຍ່ຜູ້ແທນອົງຄະນະພັກກະຊວງແຮງງານ ແລະ ສະຫວັດດີການສັງຄົມ ຄັ້ງທີ VI ໄຂຂຶ້ນຢ່າງເປັນທາງການ ໃນວັນທີ 23 ພະຈິກ 2020, ທີ່ຫ້ອງປະຊຸມເຮືອນພັກກະຊວງແຮງງານ ນະຄອນຫລວງວຽງຈັນ ໂດຍການເປັນປະທານຂອງສະຫາຍ ຄຳແພງ ໄຊສົມແພງ ກຳມະການສູນກາງພັກ, ເລຂາຄະນະພັກ, ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ເປັນກຽດເຂົ້າຮ່ວມຂອງສະຫາຍ ພົອ. ຈັນສະໝອນ ຈັນຍາລາດ ກຳມະການກົມການເມືອງສູນກາງພັກ ລັດຖະມົນຕີກະຊວງປ້ອງກັນປະເທດ, ມີສະຫາຍຮອງເລຂາຄະນະບໍລິຫານງານພັກກະຊວງ, ພະນັກງານອາວຸໂສບຳນານ, ພ້ອມດ້ວຍຜູ້ແທນສົມບູນຈຳນວນ 125 ສະຫາຍ ຍິງ 41 ສະຫາຍ ທີ່ເປັນຕົວແທນໃຫ້ສະມາຊິກພັກທົ່ວກະຊວງ 310 ສະຫາຍ ແລະ ແຂກຖືກເຊີນເຂົ້າຮ່ວມ.


ໃນກອງປະຊຸມ ສະຫາຍ ຄຳແພງ ໄຊສົມແພງ ໄດ້ຍົກໃຫ້ເຫັນເຖິງການຈັດຕັ້ງປະຕິບັດວຽກງານມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກກະຊວງແຮງງານ ແລະ ສະຫວັດດີການສັງຄົມ 5 ປີ (2016-2020) ເຊິ່ງມີຜົນງານອັນໂດດເດັ່ນຫລາຍດ້ານ ເປັນຕົ້ນແມ່ນວຽກງານພັດທະນາສີມືແຮງງານ ແລະ ຈັດຫາງານ ໃນ 5 ປີຜ່ານມາ ຄະນະພັກໄດ້ເອົາໃຈໃສ່ຊີ້ນຳວຽກງານ ປັບປຸງພື້ນຖານໂຄງລ່າງການພັດທະນາສີມືແຮງງານ ແລະ ຝຶກວິຊາຊີບ, ສະໜອງອຸປະກອນການຮຽນການສອນ ແລະ ສິ່ງອຳນວຍຄວາມສະດວກດ້ານຕ່າງໆ ໃຫ້ສະຖາບັນພັດທະນາສີມືແຮງງານລາວ-ເກົາຫຼີ ແລະ ບັນດາສູນທັດທະນາສີມືແຮງງານ ແລະ ຝຶກວິຊາຊີບຂອງ ແຂວງ ແລະ ນະຄອນຫຼວງ ,ເຮັດໃຫ້ການດຸ່ນດ່ຽງໂຄງປະກອບກຳລັງແຮງງານຕາມຂະແໜງການເສດຖະກິດມີຄວາມສອດຄ່ອງດີຂຶ້ນ; ການສົ່ງເສີມສະຖານທີ່ພັດທະນາສີມືແຮງງານ, ບັນດາໂຮງຮຽນ, ສູນຝຶກວິຊາຊີບທັງພາກລັດ ແລະ ເອກະຊົນ, ຫົວໜ່ວຍແຮງງານຕ່າງໆ ຝຶກ ແລະ ພັດທະນາສີມືແຮງງານຫຼາຍຂຶ້ນ, ສ້າງມາດຕະຖານສີມືແຮງງານຕາມສາຂາອາຊີບຕ່າງໆ ເພື່ອສະໜອງກັບຄວາມຕ້ອງການຂອງຕະຫຼາດແຮງງານມີຄວາມຄ່ອງຕົວກ່ວາເກົ່າ, ປະສານສົມທົບກັບຂະແໜງການກ່ຽວຂ້ອງທັງພາກລັດ ແລະ ເອກະຊົນ ສະໜອງແຮງງານ ເຂົ້າສູ່ຕະຫລາດແຮງງານພາຍໃນປະເທດ ແລະ ຈັດສົ່ງແຮງງານລາວໄປເຮັດວຽກຢູ່ຕ່າງປະເທດມີຈຳນວນຫຼາຍຂຶ້ນ; ວຽກງານຄຸ້ມຄອງແຮງງານ: ຄະນະພັກໄດ້ເອົາໃຈໃສ່ ຊີ້ນຳວຽກງານຄຸ້ມຄອງແຮງງານຢ່າງຕໍ່ເນື່ອງ ເຮັດໃຫ້ສິດ ແລະ ຜົນປະໂຫຍດ ຂອງຜູ້ອອກແຮງງານ ແລະ ຜູ້ໃຊ້ແຮງງານ ໄດ້ຮັບການຄຸ້ມຄອງ ແລະ ປົກປ້ອງ ຕາມກົດໝາຍເທື່ອລະກ້າວ; ເງື່ອນໄຂ ແລະ ສະພາບແວດລ້ອມ ໃນການເຮັດວຽກຂອງຜູ້ອອກແຮງງານ ໄດ້ຮັບການປັບປຸງດີຂື້ນ, ເຮັດໃຫ້ຜູ້ອອກແຮງງານເຮັດເຮັດວຽກໃນສະພາບແວດລ້ອມທີ່ມີຄວາມປອດໄພ ແລະ ມີສຸຂະພາບແຮງງານ ສູງຂຶ້ນສາຍພົວພັນແຮງງານ ລະຫວ່າງ ຜູ້ໃຂ້ແຮງງານ ແລະ ຜູ້ອອກແຮງງານໄດ້ຮັບການສົ່ງເສີມຢ່າງຕັ້ງໜ້າ, ສະພາບການເກີດຂໍ້ຂັດແຍ່ງທາງດ້ານແຮງງານມີຈຳນວນຫຼຸດລົງເປັນກ້າວໆ; ດ້ານສະຫວັດດີການຂອງຜູ້ອອກແຮງງານ ທີ່ເຮັດວຽກ ໃນຂົງເຂດທຸລະກິດ ໄດ້ຮັບການປັບປຸງ ແລະຍົກລະດັບສູງຂື້ນເປັນລຳດັບ; ບັນຫາແຮງງານຕ່າງປະເທດ ທີ່ເຮັດວຽກແບບບໍ່ຖືກຕ້ອງຢູ່ລາວ ແລະ ບັນຫາແຮງງານລາວ ທີ່ໄປເຮັດວຽກ ແບບບໍ່ຖືກຕ້ອງຢູ່ຕ່າງປະເທດ ກໍ່ໄດ້ຮັບຄວາມເອົາ ໃຈໃສ່ແກ້ໄຂ ດ້ວຍຫຼາຍວິທີ ຢ່າງຕໍ່ເນື່ອງ ດ້ວຍການອອກບັດອະນຸຍາດເຮັດວຽກຊົວຄາວໃຫ້ແຮງງານຕ່າງປະ ເທດ ແລະ ປັບສະຖານະພາບໃຫ້ແຮງງານລາວ ຢູ່ຕ່າງປະ ເທດທີ່ເຮັດວຽກແບບບໍ່ຖືກຕ້ອງ ຊື່ງສາມາດຫັນເຂົ້າສູ່ກົນໄກການຄຸ້ມຄອງ ແລະ ປົກປ້ອງ ຕາມກົດໝາຍໄດ້ເປັນກ້າວໆ.


ວຽກງານສະຫວັດດີການ-ສັງຄົມ: ຄະນະພັກ ໄດ້ເອົາໃຈໃສ່ຊີ້ນໍາ ວຽກງານສະຫວັດດີການສັງຄົມຢ່າງມີຈຸດສຸມ ແລະ ຕໍ່ເນື່ອງ ໄດ້ເຮັດໃຫ້ລະບອບປະກັນສັງຄົມ ມີການພັດທະນາ ເປັນທັນສະໄໝ, ຮັບປະກັນຄວາມວ່ອງໄວ, ໂປ່ງໃສ, ຍຸຕິທຳ ແລະ ຄວາມຍືນຍົງ, ລະບົບການອຸດໜູນ ປະກັນສັງຄົມປະເພດຕ່າງໆ ໄດ້ຮັບການປັບປຸງ ມີຄວາມເຂັ້ມແຂງ,ມີປະສິດທິພາບສູງຂື້ນ; ວຽກງານປ້ອງກັນ ແລະ ຕອບໂຕ້ໄພພິບັດທາງທຳມະຊາດ ໄດ້ຮັບການເພີ່ມທະວີ ເຮັດໃຫ້ສັງຄົມ ໄດ້ມີສ່ວນຮ່ວມເຂົ້າໃນການບໍລິຈາກຊ່ວຍເຫຼືອດ້ານຕ່າງໆ ເປັນຂະບວນການກ້ວາງຂວາງ, ເຮັດໃຫ້ການກະ ກຽມຄວາມພ້ອມໃຫ້ແກ່ການຕອບໂຕ້ໄພພິບັດດ້ານຕ່າງໆເປັນຕົ້ນ: ດ້ານງົບປະມານ, ກຳລັງພົນ, ພາຫະນະ, ສະບຽງອາຫານ, ເຄື່ອງອຸປະໂພກ, ບໍລິໂພກ, ທີ່ຢູ່ອາໃສຊົວຄາວອື່ນໆໄດ້ໂດຍພື້ນຖານ ສາມາດເຮັດໃຫ້ການຊ່ວຍເຫຼືອບັນ ເທົາທຸກ ສຸກເສີນໃຫ້ແກ່ຜູ້ປະສົບໄພທໍາມະຊາດ ແລະ ຜູ້ດ້ອຍໂອກາດໃນສັງຄົມ ໄດ້ທັນເວລາ; ວຽກງານນະໂຍບາຍ ຕໍ່ຜູ້ມີຜົນງານ, ຜູ້ພິການ ແລະ ອາຍຸສູງ ເຖິງວ່າມີຄວາມຫຍຸ້ງຍາກໃນຫຼາຍດ້ານ ເປັນຕົ້ນແມ່ນດ້ານງົບປະມານ, ແຕ່ການປະຕິບັດນະໂຍບາຍ ສະແດງຄວາມກະຕັນຍູ ຮູ້ບຸນຄຸນ ຕໍ່ພະນັກງານປະຕິວັດອາວຸໂສ ແລະ ຜູ້ມີຄຸນງາມ ຄວາມດີຕໍ່ການປະຕິວັດຊາດ ປະຊາທິປະໄຕ ໄດ້ຮັບການຈັດຕັ້ງປະຕິບັດເປັນປົກກະຕິຕໍ່ເນື່ອງ ແລະ ສາມາດແກ້ໄຂນະໂຍບາຍໃຫ້ເປົ້າໝາຍຕ່າງໆມີຈຳນວນເພີ່ມຂື້ນ;
ວຽກງານກາແດງ ກໍໄດ້ຮັບການຈັດຕັ້ງເຄື່ອນໄຫວ ປະຕິບັດພາລະບົດບາດໜ້າທີ່ຂອງຕົນ ຢ່າງຕັ້ງໜ້າຕໍ່ເນື່ອງ ແລະ ມີຜົນສຳເລັດໃນຫຼາຍດ້ານ ແລະ ມີບາງດ້ານລື່ນຄາດໝາຍ, ໄດ້ເຮັດໃຫ້ວຽກງານໂຄສະນາ ປຸກລະດົມການບໍລິ ຈາກເລືອດ ເປັນຂະ ບວນການກ້ວາງຂວາງ ສາມາດສະໜອງເລືອດທີ່ປອດໄພ ໃຫ້ສົງຄົມໄດ້ໂດຍພື້ນຖານ; ແລະ ວຽກງານແກ້ໄຂບັນຫາລະເບີດບໍ່ທັນແຕກ ທີ່ຕົກຄ້າງຢູ່ໃນ ສປປ ລາວ ໄດ້ຮັບການຈັດຕັ້ງເຄື່ອນໄຫວປະຕິ ບັດຢ່າງຕໍ່ເນື່ອງ ເຮັດໃຫ້ການສຳຫຼວດ ແລະ ກວດກູ້ ລະເບີດບໍ່ທັນແຕກ ອອກຈາກພື້ນທີຈຸດສຸມພັດທະນາ ມີຜົນສຳ ເລັດຢ່າງມີປະສິດທິຜົນສູງ ເຮັດໃຫ້ບຸກຄົນ ແລະ ຊຸມຊົນ ດຳລົງຊີວິດໃນສະພາບແວດລ້ອມ ທີ່ປອດໄພຫຼາຍຂື້ນກ່ວາເກົ່າ, ຫຼຸດຜ່ອນການເກີດອຸປະຕິ ເຫດ ຈາກລະເບີດບໍ່ທັນແຕກລົງເປັນເທື່ອກ້າວໆ.
ພ້ອມນີ້ໃນກອງປະຊຸມ ສະຫາຍ ນາງ ໃບຄຳ ຂັດຕິຍະ ຮອງເລຂາຄະນະພັກ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ຍົກໃຫ້ເຫັນເຖິງແຜນພັດທະນາແຮງງານ ແລະ ສະຫວັດດີການສັງຄົມ ໃນ 5 ປີ ຕໍ່ໜ້າ ແຕ່ 2021-2025 ຕໍ່ກອງປະຊຸມ ແລະ ໃນກອງປະຊຸມຍັງຈະໄດ້ປ່ອນບັດເລືອກຕັ້ງເອົາຜູ້ແທນຊຸດໃໝ່ ຈຳນວນ 11 ສະຫາຍ ເພື່ອສືບຕໍ່ຊີ້ນຳ-ນຳພາວຽກງານຂອງກະຊວງແຮງງານ ແລະ ສະຫວັດດີການສັງຄົມ ແລະ ປ່ອນບັດເລືອກເອົາຜູ້ແທນສົມບູນ ເພື່ອໄປເຂົ້າຮ່ວມກອງປະຊຸມໃຫຍ່ຄັ້ງທີ XI ຂອງພັກ.

#ພາບ-ຂ່າວ: ມີເດຍລາວ