ຄະນະຊາວໜຸ່ມ ປະຊາຊົນ ປະຕິວັດລາວ ເຊີນຊວນບັນດາການນໍາພັກ-ລັດ, ກະຊວງ, ອົງການ, ຊາວໜຸ່ມແຕ່ລະຊັ້ນແຕ່ສູນກາງລົງຮອດທ້ອງຖິ່ນ, ພໍ່ແມ່ປະຊາຊົນ, ອົງການຈັດຕັ້ງທາງສັງຄົມ ເຂົ້າຮ່ວມທ່ຽວຊົມ ບຸນມະໂຫລານຊາວໜຸ່ມ-ເຍົາວະຊົນ ເຊິ່ງຈະຈັດຂຶ້ນໃນ ລະຫວ່າງ ວັນທີ 5-13 ທັນວາ 2020 ທີ່ສູນການຄ້າລາວ-ໄອເຕັກ(ຕຶກເກົ່າ).

ທ່ານ ອາລຸນໄຊ ສູນນະລາດ ເລຂາຄະນະບໍລິຫານງານ ສູນກາງຊາວໜຸ່ມ ປະຊາຊົນ ປະຕິວັດລາວ ໄດ້ຖະແຫລງຂ່າວ ຕໍ່ສື່ມວນຊົນໃນວັນທີ 3 ທັນວາ 2020 ນີ້ວ່າ: ການຈັດບຸນມະໂຫລານຄັ້ງນີ້ ແມ່ນໜຶ່ງໃນການຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ ຜູ້ແທນຊາວໜຸ່ມລາວ ທົ່ວປະເທດ ຄັ້ງທີ VIII ທີ່ຈະໄຂຂຶ້ນໃນຕໍ່ໜ້ານີ້, ທັງເປັນກິດຈະກໍາໜຶ່ງ ທີ່ເຕົ້າໂຮມເອົາຄົນ ຮຸ້ນໜຸ່ມທຸກສາຂາອາຊີບ ໃນ ສປປ ລາວ ແລະ ຂະບວນການ ເຄື່ອນໄຫວເສດຖະກິດ, ວັດທະນະທໍາ-ສັງຄົມ ຂອງຄົນໜຸ່ມ ໄດ້ມີໂອກາດພົບປະ ສ້າງສັນແລກປ່ຽນບົດຮຽນ, ເປັນເວທີໃຫ້ຊາວໜຸ່ມ ໄດ້ຮຽນຮູ້ເຖິງປະຫວັດສາດ ແລະ ຄວາມເຕີບໃຫຍ່ເຂັ້ມແຂງ ຂອງການຈັດຕັ້ງຊາວໜຸ່ມ ປະຊາຊົນ ປະຕິວັດລາວ. ພ້ອມນີ້ ກໍເພື່ອເປັນການລະນຶກ ເຖິງມູນເຊື້ອຊາວໜຸ່ມຮຸ່ນກ່ອນ ແລະ ເສີມຂະຫຍາຍບົດບາດ ຊາວໜຸ່ມໃນຍຸກໃໝ່. ຄະນະຊາວໜຸ່ມປະຊາຊົນ ປະຕິວັດລາວ ໃນນາມທີ່ເປັນອົງການເສນາທິການ ໃຫ້ແກ່ກົມການເມືອງສູນກາງພັກ ເຮັດໜ້າທີ່ເຕົ້າໂຮມ ເອົາຄົນຮຸ່ນໜຸ່ມ ມາເຄື່ອນໄຫວໃນການຈັດຕັ້ງ, ມີບົດບາດກວ້າງຂວາງ ເຮັດໜ້າທີ່ປົກປ້ອງສິດ ຜົນປະໂຫຍດ ຂອງຄົນຮຸ່ນໜຸ່ມ, ເຮັດໜ້າທີ່ສຶກສາອົບຮົມ ເຕົ້າໂຮມຄວາມສາມັກຄີ ນໍາພາແນວຄິດ, ຊຸກຍຸ້ຂະບວນການພັດທະນາ ຄົນໜຸ່ມເດີນຕາມອຸດົມການຂອງພັກ.

ບຸນມະ​ໂຫລານຄັ້ງນີ້, ຈະມີຫລາຍກິດຈະກິດເຊັ່ນ: ເວທີສົນທະນາມູນເຊື້ອຊາວໜຸ່ມ, ແລກປ່ຽນສິລະປະ, ແຂ່ງຂັນສີມືແຮງງານ (ຊ່າງຕັດຜົມ, ຊ່າງເສີມສວຍ, ຊ່າງແຕ່ງໜ້າ), ປຸກຈິດສໍານຶກສິ່ງແວດລ້ອມ, ຄວາມປອດໄພໃນການຂັບຂີ່, ການໃຫ້ຄວາມຮູ້ ຕ້ານພະຍາດເອດ, ພະຍາດ​ຕິດ​ຕໍ່​ທາງ​ເພດ​ສຳພັນ (ພຕພ), ຕ້ານການຄ້າມະນຸດ, ແຂ່ງຂັນຮ້ອງເພງ, ແຂ່ງຂັນສຽງແຄນລາວ, ແຂ່ງຂັນແບບແຜນດຸລິຍາງ, ແປຕົວອັກສອນ, ເຕັ້ນເຊຍລິດເດີ ຂອງໄວໜຸ່ມ ແລະ ກິດຈະກໍາອື່ນໆ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)