ຕາມການລາຍງານ ຂອງທ່ານ ພັທ ກອງມະນີ ຊົມມີໄຊ ຫົວໜ້າຄະນະຄຸ້ມຄອງດ່ານສາກົນແດນສະຫັວນ ໃນວັນທີ 03/12/2020 ເວລາ 08 ໂມງ 20 ນາທີ ກ່ຽວກັບເຫດການຂອງລົດຫີນກາວ ທີ່ເກີດອັກຄີໄພໄໝ້ຢູ່ຈຸດກວດກາສິນຄ້າ ຂອງເຈົ້າໜ້າທີ່ດ່ານສາກົນແດນສະຫັວນ.

ເຫດການດັ່ງກ່າວແມ່ນເກີດຈາກລົດຂົນສົ່ງຫີນກາວ ຈຳນວນ 03 ຄັນ ເດີນທາງມາຈາກບໍ່ຫີນກາວ ໂຄກຫີນແກ້ວ ເມືອງຈຳພອນ ແຂວງສະຫັວນນະເຂດ ເພື່ອຂົນສົ່ງຫີນກາວໄປຍັງ ສ.ສ ຫວຽດນາມ ຜ່ານດ່ານສາກົນແດນສະຫັວນ ເມື່ອລົດມາຮອດສະຖານທີ່ກວດກາສິນຄ້າຂອງເຈົ້າໜ້າທີ່ພາສີປະຈຳດ່ານລົດທັງສາມຄັນກໍ່ໄດ້ແລ່ນເຂົ້າມາຈອດຢູ່ຈຸດກວດກາດັ່ງກ່າວ ເພື່ອໃຫ້ເຈົ້າໜ້າທີ່ພາສີປະຈຳສາງກວດກາສິນຄ້າເພຶື່ອສົ່ງອອກຕ່າງ ປະເທດຕາມລະບຽບການ ໃນເວລານັ້ນເຈົ້າໜ້າທີ່ພາສີໄດ້ໃຫ້ກຳມະກອນ ຈຳນວນ 08 ຄົນ ຊ່ວຍກວດຄົ້ນຫີນກາວຢູ່ເທີງລົດ ໂດຍພາຍໃຕ້ການຊີ້ນຳທາງດ້ານວິຊາສະເພາະຂອງເຈົ້າໜ້າທີ່ພາສີ ຈຸດປະສົງຂອງການກວດຄົ້ນແມ່ນກວດຄົ້ນຫາສິນຄ້າທີ່ຜິດກົດໝາຍທີ່ອາດມີການລັກລອບຊຸກເຊື່ອງມານຳພາຫະນະຈຳນວນດັ່ງກ່າວ ໃນຂະນະທີ່ກວດກາຢູ່ນັ້ນກຳມະກອນກໍ່ໄດ້ພົບເຫັນຄັວນໄຟເກີດຂື້ນຈາກທ້ອງພື້ນລົດພ້ອມດ້ວຍປະກາຍໄຟລຸກຂື້ນຢ່າງຮຸນ ແຮງ ແລະ ພາ ໃຫ້ເກີດມີສຽງແຕກດັງຂື້ນຄ້າຍຄືສຽງລະເບີດພາໃຫ້ເກີດມີໄຟໄໝ້ລຸກງາມເປັນບໍລິເວນກວ້າງ ພ້ອມດ້ວຍພຸໄຟແຕກອອກຈາກຖັງກະບະລົດຫີນກາວເປັນຈຳນວນ ຫຼາຍ ແລະ ຝົ້ງປີວໄປໃສ່ຖັງນໍ້າມັນທີ່ເຈົ້າໜ້າທີ່ພາສີຢຶດໃນສາງບໍລິເວນ ໃກ້ຄຽງກໍ່ໃຫ້ເກີດມີສຽງແຕກດັງຂື້ນຄ້າຍຄືສຽງລະເບີດ ແລະ ເປັນປະກາຍຢ່າງຮຸນແຮງ ເປັນສາເຫດໃຫ້ເກີດມີຜູ້ໄດ້ຮັບບາດເຈັບ ຈຳນວນ 08 ຄົນ ໃນນັ້ນເປັນຄົນລາວ 03 ຄົນ ຍິງ 01 ຄົນ ຄົນຫວຽດນາມ 05 ຄົນ ແລະ ເສຍຊີວິດກັບທີ່ 03 ຄົນ ຍິງ 01 ຄົນ ໃນນັ້ນມີຄົນລາວ 02 ຄົນເພດຊາດ ຄົນຫວຽດນາມ 01 ຄົນເພດຍິງ.

ສ່ວນຜົນເສຍຫາຍທາງດ້ານຊັບສິນໃນເບື້ອງຕົ້ນທີ່ເກີດຂື້ນຈາກເຫດໄຟລຸກໄໝ້ຢູ່ລົດຫີນກາວຄັ້ງນີ້: ມີສາງກາງແຈ້ງ ຈຳນວນ 02 ຫຼັງ, ສາງສຳລັບໄວ້ລົດເອັກສະເລ 01 ຫຼັງ, ຫ້ອງ ການບ່ອນເຮັດວຽກກວດກາຂອງເຈົ້າໜ້າທີ່ພາສີ 01 ຫຼັງ, ພາຫະນະຂົນສົ່ງສິນຄ້າ 04 ຄັນ, ພາຫະນະປະເພດລົດກະບະຂອງລັດ 01 ຄັນ ແລະ ລົດກະບະສ່ວນບຸກຄົນ 01 ຄັນ.

ຕໍ່ກັບເຫດການທີ່ເກີດຂື້ນໃນຄັ້ງນີ້ເຈົ້າໜ້າທີ່ອົງການສືບສວນ-ສອບສວນ ກອງບັນຊາການ ປກສ ແຂວງ, ເຈົ້າໜ້າທີ່ກອງບັນຊາການ ປກສ ເມືອງເຊໂປນ ແລະ ພາກສ່ວນທີ່ກ່ຽວຂ້ອງຂອງດ່ານສາກົນແດນສະຫັວນ ກຳລັງດຳເນີນການເກັບກຳຂໍ້ມູນ ແລະ ດຳເນີນການສືບສວນ-ສອບສວນ ສ່ວນລາຍລະອຽດມີຄວາມຄືບໜ້າຄືແນວໃດ? ແມ່ນຈະລາຍງານໃຫ້ຮັບຊາບຕື່ມ.

ຕໍ່ກັບສະພາບການເຫດການທີ່ເກີດຂື້ນຄັ້ງນີ້ແມ່ນເກີດຂື້ນຍ້ອນອຸບັດຕິເຫດ ບໍ່ແມ່ນການວາງລະເບີດແຕ່ຢ່າງໃດ.

ດັ່ງນັ້ນ ທາງຄະນະຄຸ້ມຄອງດ່ານສາກົນແດນສະຫັວນ ຈື່ງຂໍຊີ້ແຈງຄວາມເປັນຈີງໃນເຫດການທີ່ເກີດຂື້ນໃນຄັ້ງນີ້ເພື່ອໃຫ້ສັງຄົມໄດ້ຮັບຮູ້ ແລະ ເຂົ້າໃຈ ເພື່ອບໍ່ຢາກໃຫ້ສັງຄົມຮັບຮູ້ຂໍ້ມູນຂ່າວສານທີ່ບໍ່ຖືກຕ້ອງ ແລະ ບໍ່ມີມູນຄວາມຈີງທີ່ໄດ້ສົ່ງອອກໄປກ່ອນໜ້ານີ້ທາງສື່ອອນລາຍນັ້ນ.

ສ່ວນລາຍລະອຽດມີຄວາມຄືບໜ້າເປັນແນວໃດ? ທາງຄະນະຄຸ້ມຄອງດ່ານສາກົນຂອງພວກເຮົາຈະຖະແຫຼງການໃຫ້ສັງຄົມຮັບຮູ້ຕື່ມອີກຕາມພາຍຫຼັງ.