ພິທີ​ແຂ່ງຂັນ ຖາມ​-ຕອບ ຄວາມ​ຮູ້​ກ່ຽວ​ກັບ​ອາ​ຊຽນ ລະດັບ​ຊາດ ຄັ້ງ​ທີ 9 ປະຈໍາ​ປີ 2020 ​ໄດ້​ຈັດ​ຂຶ້ນ ​ໃນ​ວັນ​ທີ 4 ທັນວາ 2020 ນີ້, ຢູ່ ​ໂຮງຮຽນ ມສ ວຽງ​ຈັນ ນະຄອນ​ຫລວງ​ວຽງ​ຈັນ, ​ມີ​ນັກຮຽນ​ເຂົ້າ​ຮ່ວມ​ ແຂ່ງຂັນ​ທັງໝົດ 13 ຄົນ ທີ່​ມາ​ຈາກ​ແຂວງ​ຫລວງ​ພະ​ບາງ, ສະຫວັນ​ນະ​ເຂດ ​ແລະ ​ແຂວງຈຳປາ​ສັກ, ​ແຂວງ​ລະ 3 ຄົນ ​ແລະ ນະຄອນຫລວງ​ວຽງຈັນ 4 ຄົນ ​ເຊິ່ງຈະ​ຄັດເລືອກ​ເອົາ 3 ຄົນ ​ເພື່ອ​ເປັນ​ຕົວ​ແທນ​ໃຫ້​ແກ່ ສປປ ລາວ ໄປຮ່ວມແຂ່ງຂັນລະດັບພາກພື້ນ ທີ່ຈະຂຶ້ນ​ໃນ​ລະຫວ່າງວັນທີ 16-17 ທັນວາ 2020 ໂດຍຜ່ານລະບົບສືສານແບບທາງໄກ ​ເຊິ່ງເປັນເຈົ້າພາບໂດຍ ປະເທດສິງກະໂປ.

ການ​ແຂ່ງຂັນ​ໃນ​ຄັ້ງ​ນີ້ ​​ແມ່ນເລັ່ງ​ໃສ່​ບັນດາ​ນ້ອງ​ນັກຮຽນ ລະ​ດັບ​ການ​ສຶກສາຂັ້ນມັດທະຍົ​ມຕອນ​ປາຍ ທີ່​ມີ​ອາຍຸສະ​ເລ່ຍ 14 ຫາ 18 ປີ​, ການ​ແຂ່ງຂັນແບ່ງ​ອອກ​ເປັນ 4 ຮອບ, ຕອບ​ຄຳ​ຖາມ​ໃນ 4 ໝວດຄວາມ​ຮູ້​ ໂດຍ​ຈະ​ມີ ຄຳ​ຖາມ​ປະ​ເພດ​ຫລາຍ ​ຄຳ​ຕອບ​ໃຫ້​ເລືອກ (​ແບບ​ປາ​ລະ​ໄນ), ຄຳ​ຖາມ​ແບບ​ເປີດ-ປິດ ​ແລະ ຄຳ​ຖາມ​ແບບ​ຕື່ມ​ຄຳ​ໃສ່​ບ່ອນ​ວ່າງ ​ເຊິ່ງຄຳ​ຖາມ​ທັງໝົດ ຈະ​ເປັນ​ພາສາ​ອັງກິດ. ຜ່ານ​ການ​ແຂ່ງຂັນ ສາມາດ​ຄັດ​ເລືອ​ກ​ໄດ້ອັນ​ດັບ 1 ​ແມ່ນ ທ້າວ ກິດ​ສະ​​ໄນ ພົມມະ​ວົງສາ ຈາກ​ນະຄອນ ຫລວງ​ວຽງຈັນ, ອັນ​ດັບ 2 ທ້າວ ອຳ​ມະນາ ສຸດທິ​ຈັກ ຈາກ​ນະຄອນຫລວງ​ວຽງຈັນ ​ແລະ ອັນ​ດັບ​ 3 ນາງ ປາ​ວິ​ນາ ວໍລະ​ຈຳປາ ຈາກ​ນະຄອນຫລວງ​ວຽງຈັນ.

ໂອກາດ​ນີ້, ທ່ານ ໂພສີ ແກ້ວມະນີວົງ ຜູ້ອຳນວຍການໃຫຍ່ ວິທະຍຸກະຈາຍສຽງແຫ່ງຊາດ ​ໄດ້​ຂຶ້ນ​ມີ​ຄຳ​ເຫັນບາງ​ຕອນ​ໃຫ້​ຮູ້​ວ່າ: ໂຄງການແຂ່ງຂັນຖາມ-ຕອບ ຄວາມຮູ້ກ່ຽວກັບອາຊຽນ ແມ່ນໜຶ່ງກິດຈະກຳທີ່ນອນຢູ່ໃນ ຂົງເຂດວຽກງານການຮ່ວມມື ດ້ານວັດທະນະທຳ ແລະ ຖະແຫລງຂ່າວອາຊຽນ ​ເຊິ່ງເປັນ ການສົ່ງເສີມຄວາມຮັບຮູ້ ແລະ ຄວາມເຂົ້າໃຈກ່ຽວກັບ ປະຊາຄົມອາຊຽນ ໂດຍສະເພາະ ປະຊາຄົມການເມືອງ-ຄວາມໝັ້ນຄົງ, ເສດຖະກິດ ແລະ ວັດທະນະທຳ-ສັງຄົມ ໃຫ້ແກ່ນ້ອງນັກຮຽນໃນອາຊຽນ ກໍຄື ສປປ ລາວ ໃຫ້ນັບມື້ນັບກວ້າງຂວາງຂຶ້ນ. ໃນໄລຍະຜ່ານມາ ສປປ ລາວ ກໍໄດ້ຮັບກຽດເປັນເຈົ້າພາບຈັດການແຂ່ງຂັນ ຖາມ-ຕອບ ຄວາມຮູ້ກ່ຽວກັບອາຊຽນລະດັບພາກພື້ນ ຄັ້ງທີ 7 ໃນປີ 2016 ທີ່ ນະຄອນຫລວງວຽງຈັນ ​ເຊິ່ງນັກຮຽນຈາກ ສປປ ລາວ ສາມາດຍາດໄດ້ອັນດັບທີ 1 ຂອງອາຊຽນ. ພ້ອມ​ນັ້ນ, ຍັງຍາດໄດ້ອັນດັບ 2 ໃນການແຂ່ງຂັນ ຖາມ-ຕອບ ຄວາມຮູ້ກ່ຽວກັບອາຊຽນລະດັບພາກພື້ນ ຄັ້ງທີ 8 ທີໄດ້ຈັດຂຶ້ນຢູ່ ບາຫລີ ປະເທດອິນໂດເນເຊຍ ໃນປີ 2018 ​ເຊິ່ງຖືໄດ້ວ່າເປັນຜົນງານ ແລະ ຜົນສໍາເລັດອັນຫຍິ່ງໃຫຍ່ຂອງ ສປປ ລາວ ໃນໄລຍະຜ່ານມາ.

​ໂຄງການ​ແຂ່ງຂັນ​ຖາມ-ຕອບ​ຄວາມ​ຮູ້​ອາຊຽນ ​ເປັນ​​ໂຄງການໜຶ່ງທີ່​ລິ​ເລີ່​ມຂຶ້ນ ​​ໂດຍ​ຄະນະ​ກຳມະການ ວັດທະນະທຳ ​ແລະ ຖະ​ແຫລ​ງຂ່າວ ຂອງ​ອາຊຽນ, ​ເປັນ​ການ​ແຂ່ງ​ຂັນ ທົດ​ສອບ​ຄວາມ​ຮູ້​ກ່ຽວກັບ​ອາຊຽນ ​ເຊິ່ງຈັດ​ຂຶ້ນ​ໂດຍ​ການ ​ເຂົ້າ​ຮ່ວມ​ຂອງ​ບັນດາ​ ນ້ອງ​ນັກຮຽນ ຈາກ​​ໂຮງຮຽນ ມັດທະຍົມ​ຕອນ​ປາຍ ທັງ​ພາກ​ລັດ ​ແລະ ​ເອກະ​ຊົນ ຂອງ 10 ປະ​ເທດ​ອາຊຽນ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)