ໃນວັນທີ 8 ທັນວາ 2020 ສະມາຄົມນັກຂ່າວແຫ່ງ ສປປ ລາວ ໄດ້ຈັດຊຸດຝຶກອົບຮົມ ກ່ຽວກັບການເປົ່າແຄນ ໃຫ້ແກ່ບັນດາສື່ມວນຊົນລາວ ທຸກຂະແໜງການອ້ອມຂ້າງສູນກາງ ພາຍໃຕ້ຫົວຂໍ້ “ສຽງແຄນເຊື້ອຊາດລາວ ມໍລະດົກໂລກ” ຢູ່ສວນພຶກສາ ເມືອງນາຊາຍທອງ ນະຄອນຫລວງວຽງຈັນ, ໂດຍມີ ທ່ານ ສະຫວັນຄອນ ລາຊະມຸນຕີ ປະທານສະມາຄົມນັກຂ່າວແຫ່ງ ສປປ ລາວ, ຮອງລັດຖະມົນຕີ ກະຊວງ ຖວທ, ທ່ານ ພູວົງ ພະມີສິດ ເຈົ້າຂອງສວນພຶກສາ, ມີບັນດາວິທະຍາກອນ, ສໍາມະນາກອນ, ພ້ອມແຂກຖືກເຊີນ ເຂົ້າຮ່ວມ. ຊຸດຝຶກອົບຮົມໃນຄັ້ງນີ້, ບັນດາສຳມະນາກອນໄດ້ຝຶກເປົ່າແຄນຕົວຈິງ, ພ້ອມທັງໄດ້ຮຽນຮູ້ຈັງຫວະ, ສໍາພັດ ແລະ ໂນດສຽງແຄນ ແຕ່ລະຊະນິດ.

ທັງນີ້, ແນໃສ່ເຮັດໃຫ້ນັກຂ່າວ ສາມາດເປົ່າແຄນໃຫ້ເປັນຫລາກຫລາຍຈັ່ງຫວະ, ຂັບ-ລໍາ-ຮ້ອງເພງປະກອບຢ່າງກົມກືນ, ມ່ວນອອນຊອນ, ຊາບຊຶ້ງ ແລະ ປະທັບໃຈ, ທັງເຮັດໃຫ້ນັກຂ່າວກາຍເປັນນັກການທູດດ້ານວັດທະນະທໍາ ໄປໃນຕົວເພື່ອໂຄສະນາອະລິຍະທໍາຂອງລາວ ຕໍ່ຊາວຕ່າງປະເທດໃນຍຸກໃໝ່. ໂອກາດດັ່ງກ່າວ, ທ່ານ ສະຫວັນຄອນ ລາຊະມຸນຕີ ໄດ້ມີຄຳເຫັນບາງຕອນໃຫ້ຮູ້ວ່າ: ຊຸດຝຶກອົບຮົມໃນຄັ້ງນີ້, ເປັນການສະເຫລີມສະຫລອງວັນສື່ມວນຊົນ ແລະ ການພິມຈໍາໜ່າຍ ຄົບຮອບ 70 ປີ, ວັນສະຖາປານາ ສປປ ລາວ ຄົບຮອບ 45 ປີ ແລະ ວັນຄ້າຍວັນເກີດປະທານ ໄກສອນ ພົມວິຫານ ຄົບຮອບ 100 ປີ, ທັງເປັນການສະເຫລີມສະຫລອງ ອົງການອຸຍແນັດສະໂກໄດ້ຮັບຮອງເອົາສຽງແຄນລາວ ເປັນມໍລະດົກວັດທະນະທໍານາມມະທໍາ ຂອງຄົນເຊື້ອຊາດລາວ ແລະ ເປັນມໍລະດົກວັດ ທະນະທໍາ ນາມມະທໍາຂອງມວນມະນຸດໂລກ ຄົບຮອບ 3 ປີ ຄືໃນວັນທີ 7 ທັນວາ 2017.

ພ້ອມນີ້, ຍັງເປັນການສ້າງໃຫ້ນັກຂ່າວ ກາຍເປັນນັກການທູດດ້ານວັດທະນະທໍາ ໂດຍເພີ່ມຄວາມຮູ້ຄວາມສາ ມາດ ແລະ ທັກສະໃຫ້ນັກຂ່າວ ສາມາດໂຄສະນາເຜີຍແຜ່ອະລິຍະທໍາລາວ ໄດ້ຢ່າງຄ່ອງແຄ້ວທັງໃນອະດີດ, ປັດຈຸບັນ ແລະ ໃນອະນາຄົດ ເປັນຕົ້ນ. ສາມາດອະທິບາຍຄວາມເປັນມາຂອງສຽງແຄນລາວ ທີ່ອົງການອຸຍແນັດສະໂກ ໄດ້ຮັບຮອງເປັນມໍລະດົກວັດທະນະທໍານາມມະທໍາ ຂອງຄົນເຊື້ອຊາດລາວ ແລະ ເປັນມໍລະດົກວັດທະນະທໍາ ນາມມະທໍາຂອງມວນມະນຸດໂລກ.

ນອກຈາກນັ້ນ, ຍັງເຮັດໃຫ້ນັກຂ່າວ, ຂຽນຂ່າວ-ຂຽນບົດ ຊັກຊວນປະຊາຊົນລາວບັນດາເຜົ່າ ໃຫ້ຄວາມສໍາຄັນ ຕໍ່ວັດທະນະທໍາຮີດຄອງປະເພນີອັນດີງາມ ທີ່ເປັນເອກະລັກຂອງລາວ ທີ່ເປັນທັງວັດຖຸ ແລະ ບໍ່ເປັນວັດຖຸ ໂດຍສະເພາະແຄນ, ລວມໄປເຖິງປ່າໄມ້ທີ່ນໍາມາເຮັດແຄນ, ຊ່າງເຮັດແຄນ, ຄົ້ນຄວ້າສຶກສາຈັ່ງຫວະສຽງແຄນ, ການເຮັດແຄນແຕ່ລະຂະໜາດ ແລະ ສ່ວນປະກອບຂອງແຄນຂອງແຕ່ລະເຜົ່າ ມາເປັນຕໍາລາສິດສອນທຸກຊັ້ນຄົນໃນສັງຄົມ, ໂດຍສະເພາະຄົນຮຸ່ນຫລັງ ໃຫ້ເຂົ້າໃຈຢ່າງເລິກ ເຊິ່ງ, ປົກປັກຮັກສາຖະນຸຖະໜອມສຽງແຄນເຊື່ອຊາດລາວ ໃຫ້ດໍາລົງຄົງຢູ່ກັບປະຊາຊົນລາວບັນດາເຜົ່າ ແລະ ມວນມະນຸດໂລກຕະຫລອດໄປ, ພ້ອມທັງສົ່ງເສີມໃຫ້ແຄນ ກາຍເປັນຜະລິດຕະພັນທີ່ສາມາດສ້າງລາຍຮັບ ໃຫ້ແກ່ປະຊາຊົນລາວບັນດາເຜົ່າ ຄຽງຄູ່ກັບອຸດສາຫະກໍາການທ່ອງທ່ຽວທາງດ້ານວັດທະນະທໍາ ຕາມນະໂຍບາຍຂອງລັດຖະບານ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)