ຄື​ດັ່ງ​ຮູ້​ນໍາ​ກັນ​ແລ້ວ​ວ່າ, ໃນ​ຕົ້ນ​ເດືອນ​ທັນວາ ປີ 2021 ນີ້,ໂຄງການ​ທາງ​ລົດໄຟ​ລາວ​ຈີນ​ຈະ​ໄດ້​ເປີດ​ນໍາ​ໃຊ້​ຢ່າງ​ເປັນ​ທາງ​ການ ພາຍຫຼັງ​ທີ່​ເລີ່ມ​ສ້າງ​ໃນ​ເດືອນ​ມັງກອນ ປີ 2017 ເປັນຕົ້ນ​ມາ. ເປັນ​ໂຄງການ​ທີ່​ມີ​ຄວາມ​ສຳຄັນ​ພິເສດ ແລະ ມີ​ຄວາມ​ໝາຍ​ທາງ​ດ້ານ​ປະຫວັດສາດ ແລະ ຍຸດທະສາດ​ຂອງ​ພັກ​ເຮົາ, ເປັນ​ພື້ນຖານ​ໂຄງ​ລ່າງ​ທາງ​ດ້ານ​ເສດຖະກິດ​ທີ່​ໜັກ​ແໜ້ນ ແລະ ຍືນ​ຍົງ​ຂອງ​ປະເທດ​ໃນ​ການ​ພັດທະນາ​ເສດ​ຖະ​ກິດ​-​ສັງຄົມ​ຂອງ​ຊາດ​ກໍ​ຄື​ການ​ປະຕິບັດ​ນະໂຍບາຍ​ຫັນ​ປະເທດ​ບໍ່​ມີ​ຊາຍ​ແດນ​ຕິດ​ກັບ​ທະເລ​ໃຫ້​ເປັນ​ປະເທດ​ເຊື່ອມ​ຈອດ​ກັບ​ພາກ​ພື້ນ ແລະ ສາກົນ, ເມືອງ​ຫຼວງ​ນໍ້າ​ທາ ແຂວງ​ຫຼວງ​ນໍ້າ​ທາ​ມີ​ເສັ້ນທາງ​ລົດໄຟ​ລາວ​-​ຈີນ ຜ່ານ​ມີ​ສະຖານ​ນີ 2 ແຫ່ງ ຊຶ່ງ​ຈະ​ເປັນ​ເງຶ່ອນ​ໄຂ ແລະ ໂອກາດ​ໃນ​ການ​ຍາດ​ແຍ່ງ​ເອົາ​ຜົນ​ປະໂຫຍດ​ຈາກ​ໂຄງການ​ດັ່ງກ່າວ ເຂົ້າ​ມາ​ສ້າງສາ​ພັດທະນາ​ເມືອງ​ຫຼວງ​ນໍ້າ​ທາ; ຍົກ​ສູງ​ຊີວິດ​ການ​ເປັນ​ຢູ່​ຂອງ​ປະຊາຊົນ​ບັນດາເຜົ່າ​ດີ​ຂຶ້ນ.

ສະຫາຍ ຫຼ້າ​ປະເສີດ ສີ​ປະເສີດ ກຳມະການ​ພັກ​ແຂວງ, ເລຂາ​ພັກ​ເມືອງ​-​ເຈົ້າເມືອງໆ​ຫຼວງ​ນໍ້າ​ທາ ແຂວງ​ຫຼວງ​ນໍ້າ​ທາ​ກ່າວ​ວ່າ:ເມືອງ​ຫຼວງ​ນໍ້າ​ທາ​ເປັນ​ເມືອງ​ທີ່​ຕັ້ງ​ການ​ປົກຄອງ​ຂອງ​ແຂວງ, ມີ​ເນື້ອທີ່​ທັງ​ໝົດ 230.400 ເຮັກຕາ, ມີ 78 ບ້ານ, ຈັດ​ແບ່ງ​ເປັນ 7 ກຸ່ມ​ບ້ານ​ພັດທະນາ, ມີ​ປະຊາກອນ 59. 500 ຄົນ, (ມີ11.359 ຄົວ​ເຮືອນ), ມີ 16 ຊົນເຜົ່າ;ປະຊາຊົນ​ມີ​ມູນເຊື້ອ​ດຸໝັ່ນ,ສາມັກຄີ​ປອງ​ດອງ,ມີ​ຊັບ​ພະຍາ​ກອນ​ທໍາ​ມະ​ຊາດ​ອຸດົມສົມບູນ, ອາກາດ​ເອື້ອ​ອຳນວຍ, ມີ​ທົ່ງພຽງ ແລະ ແມ່​ນໍ້າ​ຫຼາຍ​ສາຍ​ເໝາະ​ສົມ​ແກ່​ການ​ຜະລິດ​ກະສິກຳ, ມີ​ແຫຼ່ງ​ທ່ອງ​ທ່ຽວ​ປະຫວັດສາດ, ທຳ​ມະ​ຊາດ ແລະ ວັດທະນະ​ທຳ.

ເພື່ອ​ກະກຽມ​ຄວາມ​ພ້ອມ​ໃນ​ການ​ເຊື່ອມ​ໂຍງ​ເປັນ​ເມືອງ​ທາງ​ຜ່ານ​ຈາກ​ໂຄງການ​ທາງ​ລົດໄຟ​ລາວ​-​ຈີນ; ເມືອງ​ຫຼວງ​ນໍ້າ​ທາ ໄດ້​ຈັດ​ຕັ້ງ​ຄະນະ​ຮັບຜິດຊອບ​ຂຶ້ນ ພ້ອມ​ທັງ​ແບ່ງ​ຄວາມ​ຮັບຜິດຊອບ​ໃຫ້​ກັນ​ຢ່າງ​ລະອຽດ,ສ້າງ​ແຜນ​ດໍາ​ເນີນ​ງານ, ເປັນ​ໂຄງການ​ລະອຽດ;ເອົາໃຈໃສ່​ປັບປຸງ​ແບບແຜນ​ການ​ນຳພາ,ແບບແຜນ​ວິທີ​ເຮັດ​ວຽກ,ປັບປຸງ​ແບບແຜນ​ຄຸ້ມ​ຄອງ​-​ບໍລິຫານ​ລັດ; ສຸມ​ໃສ່​ກໍ່ສ້າງ​ຮາກ​ຖານ​ການເມືອງ, ພັດທະນາ​ຊົນນະບົດ​ລຶບລ້າງ​ຄວາມທຸກ​ຍາກ​ຕິດ​ພັນ​ກັບ​ວຽກ​ງານ 3 ສ້າງ, ຫັນ​ເອົາ​ພະນັກງານ​ກຳມະການ​ພັກ​ເມືອງ, ພະນັກງານ​ຫຼັກ​ແຫຼ່ງ​ຈໍາ​ນວນ 124 ສະຫາຍ, ລົງ​ກໍ່ສ້າງ​ຮາກ​ຖານ​ການເມືອງ ຮັບປະກັນ​ໃຫ້​ເມືອງ​ຫຼວງ​ນໍ້າ​ທາ​ມີ​ສະຖຽນ​ລະ​ພາບ​ທາງ​ດ້ານ​ການເມືອງ, ສັງຄົມ​ມີ​ຄວາມ​ເປັນ​ລະບຽບ​ຮຽບຮ້ອຍ,ສືບຕໍ່​ປັບປຸງ,ກໍ່ສ້າງ​ອົງຄະ​ນະ​ພັກ​ເມືອງ, ຄະນະ​ພັກ​ຮາກ​ຖານ, ໜ່ວຍ​ພັກ​ໃຫ້​ປອດ​ໃສ​ເຂັ້ມແຂງ,ໜັັກ​ແໜ້ນ ຍົກ​ສູງ​ບົດບາດ ແລະ ຄວາມ​ສາ​ມາດ​ນໍາ​ພາ​ຂອງ​ພັກ​ໃນ​ສະພາບ​ແວດ​ລ້ອມ​ໂລກາ​ພິ​ວັດ​ທາງ​ດ້ານ​ເສດຖະກິດ​ການ​ເຊື່ອມ​ໂຍງ​ກັບ​ພາຍ​ໃນ ແລະ ຕ່າງປະເທດ, ຫັນ​ການ​ຄຸ້ມ​ຄອງ​ລັດ​-​ຄຸ້ມ​ຄອງ​ສັງຄົມ​ເຂົ້າ​ສູ່​ລະບຽບ​ກົດໝາຍ​ຢ່າງ​ເຂັ້ມ​ງວດ; ເອົາໃຈໃສ່​ເຮັດ​ວຽກ​ງານ​ການເມືອງ​ນຳພາ​ແນວ​ຄິດ​ພະນັກງານ, ທະຫານ, ຕຳຫຼວດ ແລະ ປະຊາຊົນ​ບັນດາເຜົ່າ​ໃຫ້​ເຊື່ອ​ໝັ້ນ​ຕໍ່​ການ​ນຳພາ​ຂອງ​ພັກ​-​ລັດ, ປະຕິບັດ​ສິດ ແລະ ພັນທະ​ຂອງ​ພົນລະເມືອງ​ຢ່າງ​ເຂັ້ມ​ງວດ, ຍົກ​ສູງ​ສະຕິຊາດ, ເອກະລາດ, ເປັນ​ເຈົ້າ​ຕົນ​ເອງ, ໂດຍ​ສະເພາະ​ແມ່ນ​ການ​ໂຄສະນາ, ເຜີຍ​ແຜ່​ນໍາ​ພາ​ແນວ​ຄິດ​ກ່ຽວ​ກັບ​ໂຄງການ​ທາງ​ລົດໄຟ​ລາວ​-​ຈີນ​ໃຫ້​ປະຊາຊົນ​ບັນດາເຜົ່າ​ຮັບ​ຮູ້, ເຂົ້າໃຈ​ຢ່າງ​ເລິກເຊິ່ງ​ທົ່ວ​ເຖິງ.

ສ້າງ​ເມືອງ​ຫຼວງ​ນໍ້າ​ທາ​ໃຫ້​ເປັນ​ຫົວໜ່ວຍ​ແຜນການ​ແລະ​ຫົວໜ່ວຍ​ການ​ເງິນ​ໜຶຶ່ງ​ທີ່​ຂຶ້ນ​ກັບ​ແຂວງ, ສ້າງ​ແຜນ​ງົບປະມານ​ຂອງ​ເມືອງ, ສູ້​ຊົນ​ປະຕິບັດ​ລາຍ​ຮັບ​ແຕ່​ລະ​ປີ​ຕາມ​ການ​ມອບ​ໝາຍ​ຈາກ​ແຂວງ, ໃຫ້​ບັນລຸ​ຕາມ​ຄາດພັດທະນາ​ຂະແໜງ​ກະສິກຳ, ຕິດ​ພັນ​ກັບ​ອຸດສາຫະກຳ​ປຸງ​ແຕ່ງ​ເທື່ອ​ລະ​ກ້າວ, ຊຸກຍູ້, ສົ່ງເສີມ ແລະ ຍົກ​ລະດັບ​ການ​ຜະລິດ​ກະ​ສິ​ກໍາ​ທີ່​ເປັນ​ມູນເຊື້ອ ແລະ ທ່າແຮງ​ເປັນ​ສິນຄ້າ​ສະໜອງ​ຕະຫຼາດ​ພາຍ​ໃນ ແລະ ຕ່າງປະເທດ​ໂດຍ​ສະເພາະ​ແມ່ນ​ປະເພດ​ສິນຄ້າ​ກະສິກຳ​ສະອາດ, ກະສິກຳ​ປອດ​ສານພິດ ແລະ ກະສິກຳ​ອິນ​ຊີ​ໃຫ້​ໄດ້​ຕາມ​ມາດຕະຖານ, ພັດທະນາ​ອຸດ​ສາ​ຫະ​ກໍາ, ຫັດຖະກຳ​ສີໄມ້ລາຍມື, ສິນຄ້າ​ທີ່​ລະນຶກ, ສິນຄ້າ​ໜຶ່ງ​ເມືອງ​ໜຶ່ງ​ຜະລິດ​ຕະ​ພັນ(ODOP), ຫັນ​ການ​ຄ້າ​ລົງ​ສູ່​ຊົນນະບົດ, ພັດທະນາ​ການ​ຄ້າ​ຊາຍ​ແດນ, ກໍ່ສ້າງ, ປັບປຸງ​ຕະຫຼາດ,ຮ້ານ​ວາງສະແດງ ແລະ ຂາຍ​ສິນຄ້າ, ເຊື່ອມ​ໂຍງ​ການ​ຄ້າ ແລະ​ການ​ບໍລິການ​ກັບ​ບັນດາ​ເມືອງ, ແຂວງ​ພາຍ​ໃນ​ປະເທດ ແລະ ປະເທດ​ໃກ້​ຄຽງ, ປົກ​ປັກ​ຮັກສາ, ປັບປຸງ​ຍົກ​ລະດັບ​ເສັ້ນທາງ​ແຕ່​ເມືອງ​ຫາ​ບ້ານ​ໃຫ້​ສັນຈອນ​ໄປ​ມາ​ໄດ້​ສະດວກ​ໃນ​ສອງ​ລະດູ, ກວດກາ​ຄຸ້ມ​ຄອງ​ການ​ປະຕິບັດ​ລະບຽບ​ການ, ກົນ​ໄກ​ຂອດ​ບໍລິການ​ຂົນສົ່ງ​ໂດຍສານ ແລະ​ສິນຄ້າ​ໃຫ້​ທັນ​ສະໄໝ, ວ່ອງໄວ, ມີີ​ຄຸນ​ນະ​ພາບ ແລະ ເປັນ​ທຳ, ພັດທະນາ​ທີ່ຢູ່​ອາໄສ​ໃນ​ເມືອງ, ຕົວ​ເມືອງ​ນ້ອຍ​ໃນ​ຊົນນະບົດ, ກຸ່ມ​ບ້ານ​ພັດທະນາ, ບ້ານ​ໃຫ້​ມີ​ຄວາມ​ສະອາດ, ສວຍ​ງາມ, ສີຂຽວ, ທັນ​ສະໄໝ ແລະ ເປັນ​ມິດ​ກັບ​ສິ່ງແວດລ້ອມ, ສົ່ງເສີມ​ການ​ພັດທະນາ​ພື້ນຖານ​ໂຄງ​ລ່າງ​ໄປສະນີ​ໂທລະ​ຄົມມະນາຄົມ​ໃຫ້​ເປັນ​ລະບົບ​ທົ່ວ​ເຖິງ,ຄຸ້ມ​ຄອງ​-​ນຳ​ໃຊ້​ຊັບ​ພະຍາ ກອນ​ທຳ​ມະ​ຊາດ​ແບບ​ຍືນ​ຍົງ,ສຳຫຼວດ, ຈັດ​ສັນ ແລະ ຄຸ້ມ​ຄອງ​ນໍາ​ໃຊ້​ທີ່​ດິນ, ເພື່ອ​ຄຸ້ມ​ຄອງ​ສິ່ງແວດລ້ອມ ແລະ ການ​ພັດທະນາ​ເສດ​ຖະ​ກິດ​-​ສັງ​ຄົມ.

ສະຫາຍ ຫຼ້າ​ປະເສີດ ສີ​ປະເສີດ ກຳມະການ​ພັກ​ແຂວງ, ເລຂາ​ພັກ​ເມືອງ​-​ເຈົ້າເມືອງໆ​ຫຼວງ​ນໍ້າ​ທາ ແຂວງ​ຫຼວງ​ນໍ້າ​ທາ​ກ່າວ​ຕື່ມ​ວ່າ :ໄປ​ຄ່ຽງ​ຄູ່​ກັນ​ນີ້,ຈະ​ເອົາໃຈໃສ່​ພັດທະນາ​ວຽກ​ສື່​ມວນ​ຊົນ, ສະໜອງ​ຂໍ້​ມູນ​ຂ່າວສານ​ທີ່​ມີ​ຄຸນ​ນະ​ພາບ​ແລະ​ທັນ​ສະໄໝ, ອະນຸລັກ, ສົ່ງເສີມ​ວັດທະນະທຳ, ຮີດຄອງ​ປະເພນີ​ອັນ​ດີງາມ​ຂອງ​ຊາດ, ຂອງ​ເຜົ່າ,ປັບປຸງ​ການ​ບໍລິການ​ທ່ອງ​ທ່ຽວ​ໃຫ້​ມີ​ຄວາມ​ສະດວກ, ເປັນ​ລະບົບ​ເຊື່ອມ​ຕໍ່​ລະຫວ່າງ​ບັນດາ​ເມືອງ​ພາຍ​ໃນ​ແຂວງ,ເຊື່ອມ​ຕໍ່່​ເຂດ​ເສດຖະກິດ​ບໍ່​ເຕນ​ແດນ​ງາມ, ຕ່າງ​ແຂວງ ແລະ ປະເທດ​ໃກ້​ຄຽງ, ພັດທະນາ​ແຫຼ່ງ​ທ່ອງ​ທ່ຽວ ແລະ ກິດ​ຈະ​ກໍາ​ທ່ອງ​ທ່ຽວ​ໃຫ້​ຫຼາກ​ຫຼາຍ ແລະ ເດັ່ນ, ຕໍ່​ຍອດ ແລະ ຂະຫຍາຍ​ກິດຈະການ ແລະ ແຫຼ່ງ​ທ່ອງ​ທ່ຽວ​ພາຍ​ໃນ​ເມືອງ​ທີ່​ດີເດັ່ນ​ໄດ້​ມາດຕະຖານ​ລະດັບ​ອາ​ຊຽນ ແລະ ດັບ​ຊາດ​ໃນ​ຊຸມ​ປີຜ່ານມາ, ພັດທະນາ​ບຸກ​ຄະລາ​ກອນ​ໃຫ້​ມີ​ຄຸນ​ທາດ​ການເມືອງ, ມີ​ນໍ້າ​ໃຈ​ຮັກ​ຊາດ, ມີ​ຄວາມ​ຮູ້, ຄວາມ​ສາມາດ, ຈັດ​ຕັ້ງ​ປະຕິບັດ​ຄາດໝາຍ​ສະຫັດ​ສະ​ຫວັດ​ດ້ານ​ການ​ສຶກສາ​ໃຫ້​ບັນລຸ​ຜົນສຳເລັດ, ຍົກ​ສູງ​ຄຸນ​ນະ​ພາບ​ດ້ານ​ການ​ບໍລິການ​ປິ່ນປົວ​ສຸຂະພາບ ແລະ ຈັນ​ຍາ​ບັນ​ຂອງ​ແພດ​ໝໍ, ເຮັດ​ໃຫ້​ປະຊາຊົນ​ໄດ້​ເຂົ້າ​ໃຊ້​ການ​ບໍລິການ​ຢ່າງ​ທົ່ວ​ເຖິງ, ຫັນ​ວຽກ​ງານ​ອະນາໄມ​ກັນ​ພະຍາດ, ສົ່ງເສີມ​ສຸຂະພາບ​ໃຫ້​ເປັນ​ໜ້າທີ່​ຂອງ​ທົ່ວ​ປວງ​ຊົນ,ສູ້​ຊົນ​ບັນລຸ​ຄາດໝາຍ​ສະຫັດ​ສະ​ຫວັດ​ດ້ານ​ສາທາລະນະ​ສຸກ, ສ້າງ​ກໍາ​ລັງ​ແຮງ​ງານ​ໃຫ້​ມີ​ຄຸນ​ນະ​ພາບ,ມີ​ລະບຽບ​ການ​ອອກແຮງ​ງານ, ເພື່ອ​ຕອບ​ສະໜອງ​ຄວາມ​ຕ້ອງການ​ແຮງ​ງານ​ພາຍ​ໃນ ແລະ ສາມາດ​ແກ່ງ​ແຍ້ງ​ແຂ່ງຂັນ​ກັບ​ແຮງ​ງານ​ຕ່າງປະເທດ, ກວດກາ ແລະ ຄຸ້ມ​ຄອງ​ແຮງ​ງານ​ພາຍ​ໃນ, ຕ່າງປະເທດ ແລະ ອາຊີບ​ທີ່​ສະຫງວນ​ໄວ້​ໃຫ້​ຄົນ​ລາວ​ຢ່າງ​ເຂັ້ມ​ງວດ.

ສໍາ​ລັບ​ວຽກ​ງານ​ປ້ອງ​ກັນ​ຊາດ, ປ້ອງ​ກັນ​ຄວາມ​ສະຫງົບ ຫັນ​ລົງ​ກໍ່ສ້າງ​ຮາກ​ຖານ​ການເມືອງ, ກຳ​ແໜ້ນ​ປະຊາຊົນ, ສ້າງ​ບ້ານ​ປ້ອມ​ໝັ້ນ, ກຸ່ມ​ບ້ານ​ສູ້​ຮົບ​ຕິດ​ລ່ຽນ, ປັບ ປຸງ​ກຳລັງ​ປ້ອງ​ກັນ​ຊາດ, ປ້ອງ​ກັນ​ຄວາມ​ສະຫງົບ​ໃຫ້​ເຂັ້ມແຂງ, ຕັ້ງໜ້າ​ແກ້​ໄຂ​ປະກົດ​ການ​ຫຍໍ້ທໍ້, ໜໍ່​ແໜງ​ທີ່​ຈະ​ກໍ່ໃຫ້ເກີດ​ຄວາມ​ບໍ່​ສະຫງົບ​ທາງ​ດ້ານ​ການເມືອງ ແລະ ສັງຄົມ​ໃຫ້​ຫຼຸດ​ລົງ,ຄຸ້ມ​ຄອງ​ສໍາ​ມະໂນ​ຄົວ, ຄົນ​ເຂົ້າ​ອອກ​ເມືອງ​ຢ່າງ​ເຂັ້ມ​ງວດ, ກຽມພ້ອມ​ເຮັດ​ໜ້າທີ່​ໃນ​ທຸກ​ກໍລະນີ​ເມື່ອ​ເກີດ​ມີ​ສະພາບ​ໃຫ້​ສາມາດ​ແກ້​ໄຂ​ທັນ​ເວ​ລາ.ສໍາ​ລັບ​ວຽກ​ງານ​ດ້ານ​ວຽກ​ງານ​ກໍ່ສ້າງ​ຮາກ​ຖານ​ການເມືອງ​ຕິດ​ພັນ​ກັບ​ວຽກ​ງານ​ສາມ​ສ້າງ ແລະ ວຽກ​ພົວພັນ​ຕ່າງປະເທດ ສືບຕໍ່​ສ້າງ​ເມືອງ​ຫຼວງ​ນໍ້າ​ທາ​ໃຫ້​ເປັນ​ຫົວໜ່ວຍ​ເຂັ້ມແຂງ​ຮອບດ້ານ, ສ້າງ​ບ້ານ​ໃຫ້​ເປັນ​ຫົວໜ່ວຍ​ພັດທະນາ​ໃຫ້​ບັນລຸ​ຜົນ​ສໍາ​ເລັດ​ຕາມ 4 ເນື້ອ​ໃນ 4 ຄາດໝາຍ, ເພື່ອ​ສ້າງ​ຄວາມ​ເຂັ້ມແຂງ​ພາຍ​ໃນ​ໃຫ້​ມີ​ຄວາມ​ສາມາດ,ມີ​ຄວາມ​ພ້ອມ​ຮອບດ້ານ​ເຊື່ອມ​ໂຍງ​ກັບ​ພາຍ​ໃນ ແລະ ຕ່າງປະເທດ​ຢ່າງ​ມີ​ປະສິດ​ທິ​ຜົນ,ສາມາດ​ຍາດ​ແຍ່ງ​ຜົນ​ປະໂຫຍດ​ຈາກ​ໂຄງການ​ທາງ​ລົດໄຟ​ລາວ​-​ຈີນ ມາ​ພັດທະນາ​ເສດ​ຖະ​ກິດ​-​ສັງຄົມ​ຂອງ​ເມືອງ, ຍົກ​ສູງ​ຊິວິດ​ການ​ເປັນ​ຢູ່​ຂອງ​ປະຊາຊົນ​ນັບ​ມື້​ໃຫ້​ດີ​ຂຶ້ນ, ເພີ່ມ​ທະວີ​ການ​ພົວພັນ, ຮ່ວມ​ມື​ກັບ​ປະເທດ​ເພື່ອນ​ມິດ​ຍຸດທະສາດ, ປະເທດ​ຄູ່​ຮ່ວມ​ສະ​ຕາ​ກຳ, ປະເທດ​ໃກ້​ຄຽງ, ຊຸກຍູ້​ບັນດາ​ຂະແໜງການ​ຂອງ​ເມືອງ​ໂດຍ​ສະເພາະ​ແມ່ນ​ເມືອງ​ທີ່​ມີ​ຊາຍ​ແດນ​ຕິດ​ຈອດ​ກັນ ພົວພັນ​ຮ່ວມ​ມື​ກັນ​ເປັນ​ປົກກະຕິ,ເພື່ອ​ພັດທະນາ, ບົນ​ພື້ນຖານ​ແນວທາງ​ນະໂຍບາຍ​ການ​ຕ່າງປະເທດ​ຂອງ​ພັກ​ເຮົາ.

ໃນ​ພາລະກິດ​ປົກ​ປັກ​ຮັກ​ສາ​-​ສ້າງສາ​ພັດທະນາ ແລະ​ການ​ເຊື່ອມ​ໂຍງ​ເປັນ​ເມືອງ​ທາງ​ຜ່ານ​ຈາກ​ໂຄງການ​ທາງ​ລົດໄຟ​ລາວ​-​ຈີນ, ເຮັດ​ໃຫ້​ເມືອງ​ຫຼວງ​ນໍ້າ​ທາ​ມີ​ສະຖຽນ​ລະ​ພາບ​ທາງ​ດ້ານ​ການເມືອງ, ສັງຄົມ​ມີ​ຄວາມ​ສະຫງົບ, ເປັນ​ລະບຽບ​ຮຽບຮ້ອຍ, ເສດຖະກິດ​ຂະຫຍາຍຕົວ​ໝັ້ນ​ທ່ຽງ, ຖືກ​ທິດ​ຊີວິດ​ການ​ເປັນ​ຢູ່​ຂອງ​ປະຊາຊົນ​ບັນດາເຜົ່າ​ໄດ້​ຮັບ​ການ​ພັດທະນາ​ດີ​ຂຶ້ນ​ຢ່າງ​ບໍ່​ຢຸດ​ຢັ້ງ.

Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)