ກອງປະຊຸມໃຫຍ່ ຜູ້ແທນສະໂມສອນອະດີດຊາວໜຸ່ມລາວ ໂຄງການຊາວໜຸ່ມເດີນທະເລອາ ຊຽນ-ຍີ່ປຸ່ນ(LaoSAA) ຄັ້ງທີ III ໄດ້ໄຂຂຶ້ນໃນວັນທີ 12 ທັນວາ 2020 ຜ່ານມານີ້ ທີ່ນະຄອນຫລວງວຽງຈັນ ແລະ ສໍາເລັດລົງໃນວັນດຽວກັນ.

ເຊິ່ງໃນກອງປະຊຸມ ໄດ້ສະເໜີບົດລາຍງານການເມືອງສະຫລຸບຕີລາຄາສະພາບການຈັດຕັ້ງປະຕິບັດການເຄື່ອນໄຫວນໍາພາ ແລະ ຊີ້ນໍາຂອງຄະນະບໍລິຫານງານສະໂມສອນອະດີດຊາວໜຸ່ມລາວດັ່ງກ່າວ ໃນໄລຍະ 9 ປີຜ່ານມາ(2011-2020) ແລະ ວາງທິດທາງການເຄື່ອນໄຫວ 05 ປີ ໃນຕໍ່ໜ້າ(2021–2025), ທັງມີການໃຊ້ສິດປ່ອນບັດເລືອກຕັ້ງເອົາຄະນະຊຸດໃໝ່ຈໍານວນ 13 ສະຫາຍ ຈາກທີ່ມີຜູ້ລົງສະໝັກ 16 ສະຫາຍ ໂດຍກອງປະຊຸມມີຜູ້ແທນສົມບູນ 66 ສະຫາຍ ໄດ້ເປັນເອກະສັນເລືອກເອົາສະຫາຍ ຢາງປາວ ປ່າເຍວີ ເປັນປະທານສະໂມສອນຄົນໃໝ່, ສະຫາຍ ພູວົງ ມະນີວົງ, ສະຫາຍ ທອງສະນິດ ພັນແພງດີ, ສະຫາຍ ອິດສະລະ ສຸວັນສິງ ເປັນຮອງ ແລະ ໄດ້ເລືອກເອົາສະຫາຍ ພູວົງ ມະນີວົງ ເປັນປະທານກວດກາ, ສະຫາຍ ທັດສະພອນ ເລີດຖາວອນ, ສະຫາຍຄໍາປະສິດ ເທບວົງສາ, ສະ ຫາຍບຸນເຮັງ ສຸດທິຈັກ, ສະຫາຍ ນາງ ດວງມາລາ ມາດມະນີສອນ ເປັນຮອງປະທານກວດກາ.

ສະຫາຍ ທັດສະພອນ ເລີດຖາວອນ ຄະນະບໍລິຫານງານສະໂມສອນອະດີດຊາວໜຸ່ມລາວໂຄງການຊາວໜຸ່ມເດີນທະເລອາຊຽນ-ຍີ່ປຸ່ນ ຊີ້ໃຫ້ເຫັນຮວ່າ: (LaoSAA) ເປັນອົງການຈັດຕັ້ງທາງສັງຄົມທີ່ເຄື່ອນໄຫວພາຍໃຕ້ການນຳພາ-ຊີ້ນຳ ຂອງຫ້ອງການສູນກາງຊາວໜຸ່ມປະຊາຊົນປະຕິວັດລາວ, ສ້າງຕັ້ງຂື້ນໃນເດືອນກຸມພາ 2009. ມາຮອດປັດຈຸບັນໂຄງການດັ່ງກ່າວມີສະມາຊິກທັງໝົດ 670 ກວ່າສະຫາຍ, ຍິງ 290 ກວ່າສະຫາຍ.

ສະໂມສອນດັ່ງກ່າວມີພາລະບົດບາດເພື່ອເຕົ້າໂຮມເອົາບັນດາອະດີດຊາວໜຸ່ມລາວ ທີ່ເຄີຍເຂົ້າຮ່ວມໂຄງ ການຊາວໜຸ່ມເດີນທະເລອາຊຽນ-ຍີ່ປຸ່ນ ແລະ ໂຄງການເດີນອາກາດ ລາວ-ຍີ່ປຸ່ນ ເຂົ້າໃນການຈັດຕັ້ງເຄື່ອນໄຫວກິດຈະກຳອາສາສະໝັກ ແລະ ຊ່ວຍເຫລືຶອສັງຄົມ, ເຂົ້າຮ່ວມເຄື່ອນໄຫວກັບສະມາຄົມ ແລະ ສະໂມສອນອະດີດຊາວໜຸ່ມໂຄງການຊາວໜຸ່ມເດີນທະເລ ອາຊຽນ-ຍີ່ປຸ່ນ ຂອງບັນດາປະເທດສະມາຊິກອາຊຽນ ແລະ ຍີ່ປຸ່ນ ໂດຍແນໃສ່ເພື່ອຮັດແໜ້ນຄວາມສາມາຄີ, ແລກປ່ຽນບົດຮຽນ ແລະ ຍາດແຍ່ງການຊ່ວຍເຫລືຈາກສາກົນ.

ໃນໄລຍະການເຄື່ອນໄຫວຜ່ານມາ ໂຄງການດັ່ງກ່າວ ຍັງໄດ້ປະກອບສ່ວນຮັບໃຊ້ໃນວັນສໍາຄັນຕ່າງໆຂອງພັກ-ຂອງຊາດເປັນຕົ້ນ: ຮັບໃຊ້ໃນງານມະຫາກໍາກິລາຊີແກັມຄັ້ງທີ 25 ທີ່ສປປ ລາວເປັນເຈົ້າພາບ, ຮັບໃຊ້ກອງປະຊຸມອາແຊັມ ຄັ້ງທີ 9, ຮັບໃຊ້ງານສະເຫລີມຫລອງວັນສະຖາປະນາ ນະຄອນຫລວງວຽງຈັນຄົບຮອບ 450 ປີ ແລະ ວັນສໍາຄັນອື່ນໆ.

ໃນໂອກາດນີ້, ກອງປະຊຸມຍັງໄດ້ຮັບຟັງການໂອ້ລົມ ແລະ ຊີ້ທິດເຍືອງທາງຈາກ ສະຫາຍ ອາລຸນໄຊ ສູນນະລາດ ກຳມະການສຳຮອງສູນກາງພັກ, ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)