ໃນວັນທີ 11-13 ທັນວາ 2020 ຜ່ານມານີ້, ຄະນະຊີ້ນໍາລະດັບຊາດ ສະເຫລີມສະຫລອງ ວັນສໍາຄັນຂອງພັກ-ຂອງຊາດ ປະຈຳປີ 2020, ຄະນະບໍລິຫານງານສູນກາງພັກ, ລັດຖະບານ, ສະພາແຫ່ງຊາດ, ສູນກາງແນວລາວສ້າງຊາດ, ອົງການຈັດຕັ້ງມະຫາຊົນ, ຄອບຄົວພົມວິຫານ, ອົງການປົກຄອງແຂວງ-ນະຄອນຫລວງວຽງຈັນ ແລະ ປະຊາຊົນລາວບັນດາເຜົ່າ ໄດ້ພ້ອມກັນ ຕັ້ງກອງບຸນ-ກອງບວດ ຂຶ້ນ 13 ກອງ ​ເພື່ອອຸທິດຫາ ດວງວິນຍານ ທ່ານ ປະທານ ໄກສອນ ພົມວິຫານ ຜູ້ນໍາທີ່ເຄົາລົບຮັກ ຂອງປວງຊົນລາວທັງຊາດ ເນື່ອງໃນໂອກາດ ວັນຄ້າຍວັນເກີດຄົບຮອບ 100 ປີ (13/12/1920-13/12/2020) ຢູ່ ຫໍພິພິຕະພັນ ໄກສອນ ພົມວິຫານ ນະຄອນຫລວງວຽງຈັນ ​ໂດຍ​ມີບັນດາການນຳພັກ, ລັດ ນຳໂດຍທ່ານ ບຸນຍັງ ວໍລະຈິດ ປະທານປະເທດ, ທ່ານ ພັນຄຳ ວິພາວັນ ຮອງປະທານປະເທດ ພ້ອມດ້ວຍ ຊາວພຸດສາສະນິກະຊົນລາວບັນດາເຜົ່າ ໄດ້ເຂົ້າຮ່ວມ.

ໂອກາດດັ່ງກ່າວ, ທ່ານ ບຸນຍັງ ວໍລະຈິດ ໄດ້ຕາງໜ້າໃຫ້ການນຳພັກ, ລັດ ແລະ ຄອບຄົົວ ພົມວິຫານ ຂຶ້ນໄຕ້ທຽນບູຊາ ພຣະຣັດຕະນະໄຕຣ, ຫລັງຈາກນັ້ນ, ບັນດາການນຳພັກ, ລັດ ແລະ ຊາວພຸດສາສະນິກະຊົນ ໄດ້ຮ່ວມໂມທະນາບຸນ, ຟັງທຳມະເທດສະໜາ ໂດຍມີ ພະສົງ 113 ອົງ, ພ້ອມທັງ ໄຫວ້ພະຮັບສິນອາຣາທະນາສູດ ແລະ ອື່ນໆ.

ພ້ອມນັ້ນ, ພາຍໃນງານຍັງໄດ້ສາຍຮູບເງົາ ມູນເຊື້ອປະຫວັດ ແລະ ການເຄື່ອນໄຫວ ຂອງທ່ານປະທານ ໄກສອນ ພົມວິຫານ ​ແລະ ຄົບງັນຕາມ​ຮີດຄອງ​ປະ​ເພນີ ໂດຍ​ໄດ້​ມີ​ການເສບດົນຕີພື້ນເມືອງລາວ ແລະ ຂັບລຳທ້ອງຖິ່ນຕ່າງໆເພື່ອສ້າງບັນຍາກາດເຮັດໃຫ້ການສະເຫລີມສະຫລອງ ວັນຄ້າຍວັນເກີດຂອງປະທານ ໄກສອນ ພົມວິຫານ ຄົບຮອບ 100 ໃຫ້ມີບັນຍາກາດອັນຄຶກຄື້ນ, ຮັກສາໄດ້ຄວາມເປັນລະບຽບຮຽບຮ້ອຍ, ສະຫງົບ, ປອດໄພ ແລະ ອື່ນໆ.

ການຈັດກອງບຸນ​ໃນຄັ້ງນີ້, ເພື່ອອຸທິດສ່ວນບຸນ, ສ່ວນກຸສົນ ທັງເປັນການສະແດງຄວາມເຄົາລົບຮັກ, ຄວາມກະຕັນຍູຮູ້ບຸນຄຸນ, ຄຸນງາມຄວາມດີ ແລະ ຜົນງານອັນໃຫຍ່ຫລວງ ຂອງປະທານ ໄກສອນ ພົມວິຫານ ວິລະບູລຸດຜູ້ຍິງໃຫຍ່ ​ເຊິ່ງໄດ້ອຸທິດຕົນຍອມເສຍສະລະສ່ວນຕົວເພື່ອຜົນປະໂຫຍດສ່ວນລວມ, ເພື່ອປະເທດຊາດ ແລະ ການປະຕິວັດໃນໄລຍະຜ່ານມາຈົນສາມາດປົດປ່ອຍປະເທດຊາດໄດ້ຢ່າງສົມບູນ ແລະ ສະຖາປະນາເປັນ ສາທາລະນະລັດ ປະຊາທິປະໄຕ ປະຊາຊົນລາວ ຈົນມາຮອດປັດຈຸບັນ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)