ເຟ​ສ​ບຸກ (Facebook) ຮ່ວມ​ມື​ກັບ​ນັກ​ສ້າງ​ວີ​ດີ​ໂອ ເພື່ອ​ສ້າງ​ໂຄງການ “ລາວ​ຊ່ວຍ​ລາວ (Lao Help Lao” ຊຸກຍູ້ໃຫ້​ຄົນ​ລາວ​ຄົ້ນ​ຫາ​ປະເທດ​ລາວ​ຕື່ມ ແລະ ຊ່ວຍ​ສະໜັບສະໜູນເສດຖະກິດທ້ອງຖິ່ນ. ໄດ້​ນໍາ​ສະເໜີ ແຄມ​ເປນ “ລາວ​ຊ່ວຍ​ລາວ” ຂຶ້ນ​ເມື່ອ​ບໍ່​ດົນ​ມາ​ນີ້ ທີ່​ຮ້ານ​ຄອມ​ມອນ ກຣາວ ຄອບ ນະຄອນຫຼວງ​ວຽງ​ຈັນ ຊຶ່ງ​ມີ​ບັນດາ​ສື່​ມວນ​ຊົນ​ຈາກ​ຫຼາຍ​ພາກສ່ວນ​ເຂົ້າ​ຮ່ວມ.

ທ່ານ ແພັກ​ເດ ເຮັງ (Phaekdey Heng) ຫົວໜ້າ​ນະໂຍບາຍ​ສາທາລະນະກຳປູເຈຍ ແລະ ລາວໄດ້ກ່າວເປີດ​ ແຄມ​ເປນ ຜ່ານ​ທາງ​ອອນ​ລາຍ ໂດຍ​ທ່ານ​ໄດ້​ເວົ້າ​ເຖິງ​ແນວ​ຄວາມ​ຄິດ​ຫຼັກ ພາຍ ໃຕ້​ໂຄງການ “ລາວ​ຊ່ວຍ​ລາວ” ນອກຈາກ​ຄວາມ​ພະຍາຍາມ​ຢ່າງ​ຕໍ່​ເນື່ອງ​ທີ່​ເຮົາ​ມີ ເພື່ອ​ຊ່ວຍ​ຮັກສາຄວາມ​ປອດ​ໄພ​ຂອງ​ປະຊາຊົນ ແລະ ສະໜອງ​ຂໍ້​ມູນ​ທີ່ແທ້​ຈິງ ໃນ​ໄລຍະ​ເວລາ​ນີ້, Facebook ມີ​ຄວາມ​ມຸ່ງ​ໝັ້ນ ທີ່​ຈະ​ໃຫ້ການ​ສະໜັບສະໜູນທຸລະ​ກິດ ແລະ ຊຸມ​ຊົນ​ທ້ອງຖິ່ນ​ໃນ​ລາວ​ໃຫ້​ໄດ້​ຫຼາຍ​ທີ່​ສຸດ.

ແຄມ​ເປ​ນ​ອອນ​ລາຍ “ລາວ​ຊ່ວຍ​ລາວ” ຈະ​ໄດ້​ເຜີຍແຜ່​ເນື້ອ​ຫາ​ວີ​ດີ​ໂອ​ທີ່​ຜະລິດ ແລະ ແຕ່ງ​ໂດຍ​ນັກ​ສ້າງວີດີ​ໂອ​ການທ່ອງທ່ຽວ​ຊັ້ນ​ນຳ​ໃນ Facebook ຂອງ​ລາວ​ປະກອບ​ມີ “ເພຈ ປີ​ລະ​ທ່ຽວ” ເປັນ​ຜົນງານ ຂອງ​ທ້າວ ນັດ​ທະ​ພົນ ຈັນທະ​ກຸມມານ; “ເພຈ ໝໍ​ແຂ້ວ​ພາ​ທ່ຽວ” ຜົນງານ​ຂອງ​ທ້າວ ແສງຕາ​ວັນ ລໍ່າ​ວິຈິດ ພ້ອມ​ກັບ​ຊ່ຽວຊານ​ທາງ​ດ້ານ​ອາຫານ ແລະ ນັກ​ສ້າງ​ວີ​ດີ​ໂອ​ຄື “ເພຈ ທ້ອງ​ແຕກ” ຜົນງານ​ຂອງ​ນາງ ພາ​ວິ​ນາ ເດດ​ວົງສາ ຜ່ານ Facebook Watch- ແຫຼ່ງ​ວີດີ​ໂອ ໃນ​ແພັດ​ຟອມ Facebook ໂດຍ​ແຕ່ລະ​ເພ​ຈ​ຈະ​ມີ​ການ​ນຳ​ສະເໜີ​ເນື້ອ​ຫາ​ທີ່​ແຕກ​ຕ່າງ​ກັນ​ໄປ ໃນ​ຮູບ​ແບບ​ຂອງ​ຕົນ ຊຶ່ງ​ມີ​ການ​ທ່ຽວ​ຊົມສະຖານທີ່​ທ່ອງ​ທ່ຽວ​ພາຍ​ໃນ​ທ້ອງຖິ່ນ, ສະຖານທີ່​ເໝາະ​ກັບ​ການ​ຖ່າຍຮູບ​ລົງ Instagram, ລວມ​ທັງອາຫານ ແລະ ເຄື່ອງ​ດື່ມ ຈົນ​ເຖິງ​ທຸລະ​ກິດ​ຂະໜາດ​ນ້ອຍ ທີ່​ທຸກ​ຄົນ​ສາມາດ​ຄົ້ນ​ຫາ​ໃນ Facebook ຊຶ່ງ​ຈະ​ເລີ່ມ​ຕັ້ງແຕ່​ວັນ​ທີ 9 ທັນວາ ເຖິງ​ວັນ​ທີ 26 ທັນວາ ໂດຍ​ການ​ຕິດຕາມ​ຜ່ານ ເພຈ ປີ​ລະ​ທ່ຽວ (Pee La Thiao) ຜົນງານ​ຂອງ ທ້າວ ນັດ​ທະ​ນົນ ຈັນທະ​ກຸມມານ; ເພຈ ໝໍ​ແຂ້ວ​ພາ​ທ່ຽວ (Dentist Adventure) ຜົນງານ ທ້າວ ແສງຕາ​ວັນ ລໍ່າ​ວິຈິດ ແລະ ເພຈ ທ້ອງ​ແຕກ (Thong Taek) ໃນ ເຟ​ສ​ບຸກ (Facebook) ແລະ http://www.facebook. com/ hashtag/laohelplao.

Medialaos MMD (ແຫຼ່ງຂໍ້ມູນຈາກ: ໜັງສືພິມປະຊາຊົນ)