ໃນວັນທີ 16 ທັນວາ 2020 ຢູ່ຫ້ອງວ່າການປະທານປະເທດ, ໄດ້ດໍາເນີນກອງປະຊຸມສະມາຊິກພັກ ເພື່ອເລືອກເອົາຜູ້ແທນສົມບູນ ແລະ ສໍາຮອງ ໄປຮ່ວມກອງປະຊຸມໃຫຍ່ ຜູ້ແທນທົ່ວປະ ເທດຄັ້ງທີ XI ຂອງພັກ, ໂດຍການເປັນປະທານຂອງ ສະຫາຍ ຄໍາເມີງ ພົງທະດີ ກໍາມະການສູນກາງພັກ, ເລຂາຄະນະພັກ, ລັດຖະມົນຕີ, ຫົວໜ້າຫ້ອງວ່າການ ປະທານປະເທດ, ມີບັນດາສະມາຊິກພັກ ພາຍໃນຫ້ອງວ່າການດັ່ງກ່າວ, ເຂົ້າຮ່ວມຢ່າງພ້ອມພຽງ.

ສະຫາຍ ຄໍາເມີງ ພົງທະດີ ໄດ້ມີຄໍາເຫັນກ່າວໄຂ ກອງປະຊຸມມີບາງຕອນສຳຄັນວ່າ: ຫ້ອງວ່າການປະທານປະເທດ ແມ່ນອົງການຊ່ວຍວຽກ ຂອງປະທານປະເທດ ແລະ ຮອງປະທານປະເທດ ມີພາລະບົດບາດ ເປັນເສນາທິການ ໃນການຄົ້ນຄວ້າ-ສັງລວມ ແລະ ບໍລິຫານ ໃຫ້ແກ່ການ ເຄື່ອນໄຫວ ລັດຖະກິດຂອງປະທານປະເທດ ແລະ ຮອງປະທານປະເທດ ຕາມທີ່ລະບຸໄວ້ໃນລັດຖະທໍາມະນູນ ແລະ ກົດໝາຍ. ຕະຫລອດໄລຍະ 5 ປີຜ່ານມາ, ພາຍໃຕ້ການຊີ້ນໍາ-ນໍາພາ ຂອງຄະນະພັກພວກເຮົາ ທີ່ໄດ້ເອົາໃຈໃສ່ ຢ່າງຕັ້ງໜ້າປະຕິບັດ ຕາມພາລະບົດບາດ, ໜ້າທີ່ ແລະ ຄວາມຮັບຜິດຊອບຂອງຕົນ ເຮັດໃຫ້ສະມາຊິກພັກ, ພະນັກງານ-ລັດຖະກອນ ຫ້ອງວ່າການປະທານ ປະເທດ ໄດ້ມີຄວາມສາມັກຄີ ຊ່ວຍເຫລືອເຊິ່ງກັນ ແລະ ກັນ ໃນການປະຕິບັດໜ້າທີ່ ການເມືອງຢ່າງມີຜົນສໍາເລັດໃນຫລາຍດ້ານ.

ປັດຈຸບັນ ຫ້ອງວ່າການປະທານປະເທດ ມີໜຶ່ງອົງຄະນະພັກ ຂຶ້ນກັບຄະນະເລຂາ ທິການສູນກາງພັກ, ປະກອບມີ 5 ໜ່ວຍພັກ ຄື: ໜ່ວຍພັກກົມບໍລິຫານ ແລະ ຄຸ້ມຄອງ, ໜ່ວຍພັກກົມ ຄົ້ນຄວ້າສັງລວມ, ໜ່ວຍພັກກົມພົວພັນ ຕ່າງປະເທດ, ໜ່ວຍພັກກົມກົດໝາຍ ແລະ ໜ່ວຍພັກກົມຈັດຕັ້ງ, ກວດກາ ແລະ ໂຄສະນາ, ໂດຍມີຄະນະພັກ 5 ສະຫາຍ, ຍິງ 2 ສະຫາຍ, ມີສະມາຊິກພັກທັງໝົດ 56 ສະຫາຍ, ຍິງ 22 ສະຫາຍ. ໃນນັ້ນ, ສະມາຊິກພັກບໍານານ 8 ສະຫາຍ, ຍິງ 2 ສະຫາຍ.

ສະຫາຍ ເພັດສະໝອນ ພັນທະວົງ ຮອງເລຂາຄະນະພັກ, ຮອງລັດຖະມົນຕີ, ຮອງຫົວໜ້າຫ້ອງວ່າການ ປະທານປະເທດ ໄດ້ຂຶ້ນຜ່ານ ມາດຖານ, ເງື່ອນໄຂຜູ້ທີ່ລົງສະໝັກ ຮັບເລືອກຕັ້ງເປັນຜູ້ແທນໄປຮ່ວມ ກອງປະຊຸມໃຫຍ່ ຄັ້ງທີ XI ຂອງພັກ. ຈາກນັ້ນ, ກໍໄດ້ດໍາເນີນການປ່ອນບັດ, ນັບຄະແນນ ແລະ ປະກາດຜົນການເລືອກຕັ້ງ ຜູ້ແທນສົມບູນ, ສໍາຮອງເຂົ້າຮ່ວມກອງປະຊຸມ ໃຫຍ່ຄັ້ງທີ XI ຂອງພັກ.

ໃນຕອນທ້າຍພິທີດັ່ງກ່າວ, ໄດ້ມີພິທີປະດັບຫລຽນລະນຶກ 70 ປີ ໃຫ້ພະນັກງານບໍານານ ຈໍານວນ 17 ທ່ານ ຕື່ມອີກ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)