ວັນທີ 16 ທັນວາ 2020 ນີ້, ທ່ານ ກິແກ້ວ ໄຂຄໍາພິທູນ ລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ນາງ ອີນາ ມາຊິວລີໂອນິແຕ ພາຍຫລັງມາດຳລົງຕຳແໜ່ງເປັນເອກອັກຄະລັດຖະທູດ ແຫ່ງ ສະຫະພາເອີຣົບ ຄົນໃໝ່ ປະຈຳ ສປປ ລາວ ເພື່ອປຶກສາຫາລືກ່ຽວກັບແຜນການຮ່ວມມືໃນຕໍ່ໜ້າ ໃນຂົງເຂດວັດທະນະທຳ ແລະ ທ່ອງທ່ຽວ ໃຫ້ນັບມື້ນັບຫລາຍຂຶ້ນ.

ໂອກາດນີ້, ທ່ານ ກິແກ້ວ ໄຂຄໍາພິທູນ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍຕໍ່ ທ່ານ ນາງ ອີນາ ມາຊິວລີໂອນິແຕ ທີ່ໄດ້ຮັບການແຕ່ງຕັ້ງມາດຳລົງຕຳແໜ່ງ ເປັນເອກອັກຄະລັດຖະທູດຄົນໃໝ່ ປະຈຳ ສປປ ລາວ, ພ້ອມທັງຕີລາສູງຕໍ່ການຮ່ວມມື ລະຫວ່າງ ສປປ ລາວ ແລະ ສະຫະພາບເອີຣົບ ໂດຍສະເພາະໃນຂົງເຂດວັດທະນະທຳ ແລະ ທ່ອງທ່ຽວ ທີ່ເຫັນວ່ານັບມື້ໄດ້ຮັບການເສີມຂະຫຍາຍ ແລະ ມີຜົນສຳເລັດໃນຫລາຍໆດ້ານ, ເຊິ່ງຈະເປັນພື້ນຖານອັນສໍາຄັນ ໃຫ້ແກ່ການສືບຕໍ່ເສີມຂະຫຍາຍການຮ່ວມມືຂອງສອງຝ່າຍໃນຕໍ່ໜ້າ. ທ່ານ ລັດຖະມົນຕີ ຍັງໄດ້ສະແດງຄວາມເຊື່ອໝັ້ນວ່າ ຕະຫລອດໄລຍະການດຳລົງຕຳແໜ່ງການທູດຂອງ ທ່ານ ນາງ ອີນາ ມາຊິວລີໂອນິແຕ ຢູ່ ສປປ ລາວ ຈະເປັນການປະກອບສ່ວນອັນສໍາຄັນເຂົ້າໃນການເສີມຂະຫຍາຍ ແລະ ເພີ່ມທະວີການພົວພັນຮ່ວມມື ລະຫວ່າງ ສອງຝ່າຍໃນຕໍ່ໜ້າ ເພື່ອນຳເອົາຜົນປະໂຫຍດມາສູ່ປະຊາຊົນລາວບັນດາເຜົ່າ.

ໂອກາດດຽວກັນ, ທ່ານ ນາງ ອີນາ ມາຊິວລີໂອນິແຕ ກໍໄດ້ສະແດງຄວາມຂອບໃຈມາຍັງທ່ານລັດຖະມົນຕີ ທີ່ໃຫ້ກຽດຕ້ອນຮັບຢ່າງອົບອຸ່ນ ຕໍ່ການມາຢ້ຽມຢາມໃນຄັ້ງນີ້ ແລະ ມີຄວາມມຸ່ງຫວັງທີ່ຈະສືບຕໍ່ເຮັດໃຫ້ສາຍພົວພັນ ແລະ ການຮ່ວມມືສອງຝ່າຍ ໃຫ້ນັບມື້ນັບແໜ້ນແຟ້ນຍິ່ງຂຶ້ນ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)