ພິທີເຊັນບົດບັນທຶກຄວາມເຂົ້າໃຈເພື່ອສຶກສາຄວາມເປັນໄປໄດ້ໂຄງການປະກັນໄພສຳລັບນັກທ່ອງທ່ຽວຢູ່ ສປປ ລາວ ລະຫວ່າງ ທ່ານ ບົົວໄລ ພານຸວົງ ວ່າການຫົວ ໜ້າຫ້ອງການ ກະຊວງ ຖະແຫລງຂ່າວ, ວັດທະນະທໍາ ແລະ ທ່ອງທ່ຽວ(ຖວທ) ແລະ ທ່ານ ເສົາວັນນາ ອໍ ຜູ້ອຳ ນວຍການບໍລິສັດ ຟໍເຕໂຕໂກ ຈຳກັດ, ໄດ້ຈັດຂຶ້ນໃນວັນທີ 17 ທັນວາ 2020 ນີ້ທີກະຊວງ ຖວທ .

ໂດຍມີທ່ານ ກິແກ້ວ ໄຂຄຳພິທູນ ລັດຖະມົນຕີກະຊວງຖະແຫລງຂ່າວ, ວັດທະ ນະທຳ ແລະ ທ່ອງທ່ຽວ, ມີເອກອັກຄະຣາຊະທູດກຳປູເຈຍປະຈຳ ລາວ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພິຍານນຳ.

ທ່ານ ເສົາວັນນາ ອໍ ກ່າວວ່າ: ໂຄງການປະກັນໄພນັກທ່ອງ ທ່ຽວເປັນສ່ວນໜຶ່ງທີ່ສຳຄັນໃນການຊ່ວຍເຫລືອອຸດສາ ຫະກຳການທ່ອງທ່ຽວໃຫ້ມີສະຖຽນລະພາບ ໂດຍຈະຊ່ວຍໃຫ້ນັກທ່ອງທ່ຽວມີຄວາມສະບາຍໃຈ ໝົດຄວາມກັງວົນ ແລະ ຢູ່ໃນການປົກປ້ອງຢູ່ສະເໝີ ແລະ ຈະເປັນສ່ວນໜຶ່ງເພື່ອປະກອບສ່ວນເຮັດໃຫ້ລັດຖະບານມີລາຍຮັບເພີ່ມຂຶ້ນ ເພື່ອນຳໄປພັດທະນາແຫລ່ງທ່ອງທ່ຽວ ແລະ ອື່ນໆ.

ທ່ານ ກ່າວອີກວ່າ: ບໍລິສັດ ຟໍເຕໂຕໂກ ຈະເປັນຜູ້ສຶກສາສຳ ຫລວດຄວາມເປັນໄປໄດ້ໃນການປະກັນໄພສຳລັບນັກທ່ອງ ທ່ຽວຢູ່ ສປປ ລາວ ແລະ ຈະຕັ້ງໃຈສຶກສາ ເພື່ອຮັບປະ ກັນວ່າໂຄງການດັ່ງກ່າວນີ້ ຈະມີປະສິດທິພາບ ແລະ ມີຜົນປະ ໂຫຍດສູງສຸດສຳລັບນັກທ່ອງທ່ຽວ ແລະ ລັດຖະບານ ໂດຍຈະຕັ້ງໃຈສຶກສາໃຫ້ສຳເລັດເພື່ອກ້າວສູ່ການເຊັນສັນຍາກັບລັດຖະບານໃນອະນາຄົດ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)