ໃນວັນທີ 20 ທັນວາ 2020 ນີ້ ຢູ່ສະຖານີເກັບເງິນ ນະຄອນຫລວງວຽງຈັນ ໄດ້ມີພິທີເປີດນຳໃຊ້ເສັ້ນທາງດ່ວນນະຄອນຫລວງວຽງຈັນ-ວັງວຽງ ເຊິ່ງເປັນໄລຍະທີ 1 ຂອງທາງດ່ວນນະຄອນຫລວງວຽງຈັນ ຫາ ດ່ານຊາຍແດນບໍ່ເຕັນ-ບໍ່ຫານ ຢ່າງເປັນທາງການ ໂດຍໃຫ້ກຽດເຂົ້າຮ່ວມຂອງ ທ່ານ ບຸນຍັງ ວໍລະຈິດ ປະທານປະເທດແຫ່ງ ສປປ ລາວ ພ້ອມດ້ວຍການນຳຂັ້ນສູງ, ອະດີດການນຳພັກ-ລັດ ແລະ ພາກສ່ວນກ່ຽວຂ້ອງຂອງ ລາວ-ຈີນ ເຂົ້າຮ່ວມ.


ເສັ້ນທາງດ່ວນນະຄອນຫລວງວຽງຈັນ-ວັງວຽງ ໄລຍະທີ 1 ໄດ້ເລີ່ມກໍ່ສ້າງແຕ່ວັນທີ 30 ທັນວາ 2018 ເປັນຕົ້ນມາ ເຊິ່ງຖືວ່າໃຊ້ເວລາກໍ່ສ້າງ 2 ປີ, ມີມູນຄ່າການກໍ່ສ້າງ 1 ຕື້ກວ່າໂດລາສະຫະລັດ, ມີລວງຍາວ 109 ກິໂລແມັດ, ກວ້າງ 23 ແມັດ ເປັນເສັ້ນທາງຄູ່ຂະໜານ, ມີ 4 ຊ່ອງທາງຈະລາຈອນ ແລະ 2 ແລວໄປ-ກັບ, ສ່ວນຄວາມໄວຢູ່ໃນລະດັບແຕ່ 80-100 ກິໂລແມັດ/ຊົ່ວໂມງ, ມີວົງວຽນຈຸດເຊື່ອມຕໍ່ເຂົ້າ-ອອກ 7 ຈຸດ, ອຸມົງ 1 ແຫ່ງ (ເຂດພູພະນັງ), ຂົວ 34 ແຫ່ງ, ເຊິ່ງຂ້າມທາງເລກທີ 13 ເໜືອ 3 ຈຸດ, ຂ້າມທາງລົດໄຟ 4 ຈຸດ ແລະ ຂ້າມາງເຂົ້າບ້ານ 23 ຈຸດ

ທາງດວ່ນຈາກນະຄອນຫຼວງວຽງຈັນ ແລະ ມີປາຍທາງສີ້ນສຸດຢູ່ເມືອງວັງວຽງ, ຊື່ງເປັນເມືອງທີ່ມີທິວທັດອັນສວຍສົດງົດງາມ ແລະ ມີທ່າແຮງສູງທາງດ້ານການທ່ອງທ່ຽວ ທາງດ່ວນດັ່ງກ່າວຈະສ້າງສິ່ງອຳນວຍຄວາມສະດວກໃຫ້ແກ່ການຄົມມະນາຄົມ-ຂົນສົ່ງ, ສ້າງທາງເລືອກໃຫ້ແກ່ປະຊາຊົນ ແລະ ພາກທຸລະກິດ ລວມເຖິີງນັກທ່ອງທ່ຽວທັງພາຍໃນ ແລະ ຕ່າງປະເທດ ໃນການເດີນທາງສູ່ຈຸດໝາຍເດີນທາງດວ້ຍຄວາມສະດວກສະບາຍ, ແລະ ວ່ອງໄວ ແລະ ຮັບປະກັນຂຶ້ນກວ່າເກົ່າ, ທາງດ່ວນດັ່ງກ່າວເຊິ່ງຈະປະກອບສ່ວນສຳຄັນໃນການສົ່ງເສີມການທ່ອງທ່ຽວ, ການຄ້າ ແລະ ການລົງທຶນ ໂດຍສະເພາະການທ່ອງທ່ຽວ ລາວທ່ຽວລາວ ແລະ ກະຕຸ້ນໃຫ້ແກ່ການຂະຫຍາຍຕົວຂອງເສດຖະກິດ ຂອງນະຄອນຫລວງວຽງຈັນ ແລະ ແຂວງວຽງຈັນກໍ່ຄື ສປປ ລາວ ຜ່ານການນໍາໃຊ້ໂຄງການນີ້ຈະສາມາດເຮັດໃຫ້ພວກເຮົາເຫັນໄດ້ໃນລະດັບຫນຶ່ງວ່າ: ການສ້າງທາງດ່ວນນັ້ນ ສາມາດກະຕຸ້ນການພັດທະນາເສດຖະກິດ-ສັງຄົມໄດ້ຫຼາຍ.