ພິທີມອບ-ຮັບ ແລະ ເປີດນຳໃຊ້ ໂຄງການກໍ່ສ້າງຕ້ານເຈື່ອນແຄມນ້ຳຂອງ ແລະໂຄງການກໍ່ສ້າງຮ່ອງລະບາຍນ້ຳເປື້ອນຫ້ວຍລົງກົງ ແຂວງສະຫວັນນະເຂດ ມີຂຶ້ນໃນວັນທີ 18 ທັນວາ 2020 ທີ່ບໍລິເວນແຄມຂອງນະຄອນໄກສອນ ພົມວິຫານ ພາຍຫຼັງທີ່ໄດ້ກໍ່ສ້າງສຳເລັດຕາມແຜນການ.

ເຂົ້າຮ່ວມໃນພິທີມີທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ, ທ່ານ ນາງ ວິໄລຄຳ ໂພສາລາດ ຮອງລັດຖະມົນຕີກະ ຊວງໂຍທາທິການ ແລະຂົນສົ່ງ(ຍທຂ), ມີບັນດາທ່ານຄະນະການນຳຂອງແຂວງສະຫວັນນະເຂດ, ຮອງເຈົ້າແຂວງຄຳມ່ວນ, ຄະນະກົມ, ຄະນະພະແນກການກ່ຽວຂ້ອງ, ຄະນະນໍານະຄອນໄກສອນ ພົມວິຫານ, ອຳນາດການປົກຄອງບ້ານ ແລະແຂກທີ່ມາຈາກສູນກາງ ແລະທ້ອງຖິ່ນເຂົ້າຮ່ວມ.

ໃນພິທີ, ທ່ານ ໄຊຍະເສນ ແກ້ວວິໄລສັກ ຫົວໜ້າພະແນກ ຍທຂ ແຂວງ ໄດ້ກ່າວລາຍງານໂດຍສັງເຂບວ່າ: ໂຄງການພັດທະນາຕົວເມືອງ ເປັນໂຄງການເງິນກູ້ຢືມ ແລະ ຊ່ວຍເຫຼືອລ້າຈາກທະນາ ຄານພັດທະນາອາຊີ ມີມູນຄ່າທັງໝົດ 47.740.000 ໂດລາ, ໜ້າວຽກທີ່ປະຕິບັດລວມມີ 7 ໜ້າວຽກ, ກວມເອົາ 3 ຕົວເມືອງຂອງແຂວງສະຫວັນນະເຂດຄື: ນະຄອນໄກ ສອນ ພົມວິຫານ, ເທສະບານເມືອງພີນ ແລະບ້ານແດນສະຫວັນ ເມືອງເຊໂປນ; ສຳລັບໂຄງການກໍ່ສ້າງກັນເຈື່ອນ ນະຄອນໄກສອນ ພົມວິຫານ ແມ່ນໜຶ່ງໃນໂຄງການທີ່ຈັດຕັ້ງປະຕິບັດສຸດທ້າຍມີຄວາມຍາວ 980 ແມັດ ຍື່ນອອກໄປຈາກຂອບທາງຖະໜົນທ່າແຮ່ 50 ແມັດ, ມູນຄ່າການກໍ່ສ້າງ ລວມມີກັນເຈື່ອນ ແລະເສັ້ນທາງ 4.506.063 ໂດລາ.

ນອກນັ້ນ ຍັງມີໜ້າວຽກເພີ່ມເສັ້ນທາງຄອນກີດ ແຕ່ທ່າບັກຫາສວນສາທາລະນະໜູຮັກພູມສະຫວັນ ແລະເສັ້ນທາງສຸຂາວະດີ(ເສັ້ນດອນຫໍ) ເພີ່ມເຂົ້າຕື່ມໄລຍະຄວາມຍາວ 751 ແມັດ ມີມູນຄ່າ 609.989 ໂດລາ, ລວມມູນຄ່າ ທັງໝົດ 5.116.052 ໂດລາ ໂດຍແມ່ນບໍລິສັດລາວມີໄຊກໍ່ສ້າງ ເປັນຜູ້ຮັບເໝົາການກໍ່ສ້າງ.

Medialaos MMD (ແຫຼ່ງຂໍ້ມູນຈາກ: ໜັງສືພິມ ເສດຖະກິດ-ການຄ້າ)