ວັນທີ 21 ທັນວາ 2020 ທີ່ຫ້ອງວ່າການສູນກາງພັກ, ອົງຄະນະພັກຫ້ອງວ່າການສູນກາງພັກ ໄດ້ຈັດກອງປະຊຸມສະມາຊິກພັກ ເພື່ອເລືອກຕັ້ງເອົາຜູ້ແທນສົມບູນ ແລະ ສຳຮອງ ໄປເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ, ໂດຍການເປັນປະທານ ຂອງ ສະຫາຍ ທອງສະລິດ ມັງໜໍ່ເມກ ກໍາມະການສູນກາງພັກ ເລຂາຄະນະບໍລິຫານງານພັກ ຫົວໜ້າຫ້ອງວ້າການສູນກາງພັກ, ຊຶ່ງມີຄະນະບໍລິຫານງານພັກ ພ້ອມດ້ວຍບັນດາສະຫາຍສະມາຊິກພັກທົ່ວຫ້ອງວ່າການສູນກາງພັກ ເຂົ້າຮ່ວມ.

ສະຫາຍ ທອງສະລິດ ມັງໜໍ່ເມກ ໄດ້ກ່າວເປີດກອງປະຊຸມ ພ້ອມຜ່ານບົດສະຫລຸບຕີລາຄາ ການເຄື່ອນໄຫວຊີ້ນໍາ-ນໍາພາ ຂອງອົງຄະນະພັກຫ້ອງວ່າການສູນກາງພັກ ຕະຫລອດໄລຍະ 5 ປີຜ່ານ ມາ ແລະ ທິດທາງແຜນການ 5 ປີຕໍ່ໜ້າ, ຊຶ່ງມີເນື້ອໃນສຳຄັນໃນບາງຕອນວ່າ: ຕະຫລອດໄລຍະ 5 ປີ ຜ່ານມາ ອົງຄະນະພັກຫ້ອງວ່າການສູນກາງພັກ ໄດ້ເປັນເຈົ້າການເຄື່ອນໄຫວຊີ້ນໍາ-ນໍາພາ ປະຕິບັດບັນດາຄາດໝາຍໝາຍສູ້ຊົນ ກໍຄືເນື້ອໃນຂອງມະຕິກອງປະຊຸມໃຫຍ່ ຄັ້ງທີ VI ຂອງອົງຄະນະພັກຫ້ອງວ່າການສູນກາງພັກ ທີ່ໄດ້ກໍານົດໄວ້ຢ່າງເປັນລະບົບ ແລະ ມີຜົນສໍາເລັດດີພໍສົມຄວນ ເປັນຕົ້ນແມ່ນການເອົາໃຈໃສ່ປັບປຸງພັກ ຕາມທິດສ້າງພັກໃຫ້ປອດໃສ, ເຂັ້ມແຂງ ແລະ ໜັກແໜ້ນ, ຊຶ່ງໃນ 5 ປີ ຜ່ານມາ ສາມາດຮັບຮອງເປັນໜ່ວຍພັກເຂັ້ມແຂງ-ຮູ້ນຳພາຮອບດ້ານ ກໍຄື ໜ່ວຍພັກປອດໃສ, ເຂັ້ມ ແຂງ, ໜັກແໜ້ນ ໄດ້ 5 ໜ່ວຍພັກ;

ອັນພົ້ນເດັ່ນ ແມ່ນໄດ້ເປີດອະນຸສອນສະຖານ ທ່ານ ໜູຮັກພູມສະຫວັນ, ເປັນເຈົ້າການປະກອບສ່ວນກະກຽມ ແລະ ຮັບໃຊ້ວັນສໍາຄັນປະຫວັດສາດ ຂອງພັກ-ຂອງຊາດ ໃນປີ 2020 ໂດຍສະເພາະແມ່ນການສະເຫລີມສະຫລອງວັນສ້າງຕັ້ງພັກ ຄົບຮອບ 65 ປີ, ວັນສະຖາປະນາ ສປປ ລາວ ຄົບຮອບ 45 ປີ, ວັນເກີດປະທານ ໄກສອນ ພົມວິຫານ ຄົບຮອບ 100 ປີ ແລະ ວັນອື່ນໆ ດ້ວຍຜົນສໍາເລັດອັນຈົບງາມ ແລະ ຍັງມີຜົນສຳເລັດອື່ນໆ ອີກຫລາຍດ້ານ.

ຈາກນັ້ນກອງປະຊຸມ ໄດ້ດຳເນີນວາລະການປ່ອນບັດເລືອກຕັ້ງ ໂດຍມີການແນະນໍາລະບຽບການ ແລະ ວິທີການປ່ອນບັດເລືອກຕັ້ງ ເອົາຜູ້ແທນສົມບູນ ແລະ ສຳຮອງ ເພື່ອໄປເຂົ້າຮ່ວມກອງປະ ຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກ. ການປ່ອນບັດເລືອກຕັ້ງຄັ້ງນີ້, ມີຜູ້ລົງສະໝັກຮັບເລືອກຕັ້ງ 9 ສະຫາຍ, ຍິງ 1 ສະຫາຍ ຈາກຈໍານວນສະມາຊິກພັກທັງໝົດ 197 ສະຫາຍ, ຍິງ 64 ສະຫາຍ, ເລືອກເອົາຜູ້ແທນສົມບູນ 5 ສະຫາຍ ແລະ ຜູ້ແທນສໍາຮອງ 2 ສະຫາຍ.