ບໍລິສັດ ລາວ ບຶງທາດຫລວງ ຕະຫລາດການຄ້າ ກະສິກຳສາກົນ ຈຳກັດ ເປີດຕະຫລາດນັດ ເພື່ອສົ່ງເສີມກະສິກຳ-ຫັດຖະກຳ ບຶງທາດຫລວງ ຄັ້ງທີ I ໃນລະຫວ່າງວັນທີ 22-31 ທັນວາ 2020 ຢູ່ເຂດເສດຖະກິດພິເສດບຶງທາດຫລວງ (ເດີ່ນຕະຫລາດນັດບຶງທາດຫລວງ) ນະຄອນຫລວງວຽງຈັນ, ເຊິ່ງໄດ້ນຳເອົາຜະລິດຕະພັນພື້ນບ້ານ ຂອງກະສິກອນ ຢູ່ນະຄອນຫລວງວຽງຈັນ ແລະ ແຂວງໃກ້ຄຽງ ເຂົ້າມາວາງສະແດງ ແລະ ຈຳໜ່າຍ, ຄາດວ່າຈະມີຜູ້ປະກອບການ, ຫ້າງຮ້ານ, ບໍລິສັດ ນຳເອົາສິນຄ້າເຂົ້າມາວາງສະແດງ ຫລາຍກວ່າ 70 ຫ້ອງ.

ທ່ານ ທະນົງໄຊ ຄຸດໄພທູນ ຫົວໜ້າຄະນະຄຸ້ມຄອງເຂດເສດຖະກິດພິເສດ ນະຄອນຫລວງວຽງຈັນ ລາຍງານໃຫ້ຮູ້ໃນພິທີເປີດຕະຫລາດນັດດັ່ງກ່າວ, ໃນວັນທີ 22 ທັນວາ 2020 ນີ້ວ່າ: ການ ຈັດງານຕະຫລາດໃນຄັ້ງນີ້, ເພື່ອປະຕິບັດຕາມແນວທາງນະໂຍບາຍຂອງພັກ-ລັດຖະບານ ໃນການຈັດສັນເຂດເສດຖະກິດພິເສດ ນະຄອນຫລວງວຽງຈັນ ກໍຄື ການພັດທະນາເຂດຄຸ້ມຄອງ ເສດຖະກິດພິເສດ ບຶງທາດຫລວງ ໃຫ້ກາຍເປັນນະຄອນແຫ່ງໜຶ່ງ ຂອງບັນດານະຄອນຕ່າງໆໃນ ສປປ ລາວ, ເພື່ອຈະກ້າວໄປສູ່ການພັດທະນາຕະຫລາດ ໃຫ້ກາຍເປັນສູນກາງການຄ້າ ດ້ານການນຳເຂົ້າ ແລະ ສົ່ງອອກຜະລິດຕະພັນອຸປະໂພກ ໂດຍສະເພາະ ເຮັດໃຫ້ເປັນສູນກາງແຫ່ງການຜະລິດ ແລະ ຈຳໜ່າຍສິນຄ້າກະສິກຳ-ຫັດຖະກຳ ຕະຫລອດເຖິງ ປະເພດສິນຄ້າກະສິກຳປອດສານພິດຕ່າງໆ ໃນອະນາຄົດ, ທັງເປັນການໂຄສະນາເຜີຍແຜ່ ໃຫ້ບັນດາສະມາຊິກ ສຄອຊ, ສື່ມວນຊົນ, ສັງຄົມ ແລະ ບັນດາຫົວໜ່ວຍທຸລະກິດຂະໜາດກາງ-ຂະໜາດນ້ອຍ ຕະຫລອດເຖິງຜູ້ປະກອບການລາຍໃໝ່ ໃຫ້ສາມາດເຂົ້າມາມີສ່ວນຮ່ວມໃນການລົງທຶນ ເຂົ້າໃນຕະຫລາດ, ທັງເປັນການສ້າງກິດຈະກຳ ແລະ ສ້າງຂະບວນການ ເພື່ອເຮັດໃຫ້ຕະຫລາດ ມີບັນຍາກາດອັນຟົດຟື້ນ ທີ່ເຕັມໄປດ້ວຍການຊື້-ຂາຍແລກປ່ຽນສິນຄ້າເຊິ່ງກັນ ແລະ ກັນ.

ທ່ານ ທະນົງໄຊ ຄຸດໄພທູນ ໃຫ້ຮູ້ອີກວ່າ: ຕະຫລາດບຶງທາດຫລວງ ມີເນື້ອທີ່ທັງໝົດປະມານ 35 ພັນຕາແມັດ, ມີຫ້ອງຂາຍເຄື່ອງທັງໝົດ 668 ລ໋ອກ, ເປັນບ່ອນຈຳໜ່າຍຜະລິດຕະພັນກະສິກຳ, ຊື້-ຂາຍແລກປ່ຽນ, ຂາຍສົ່ງ-ຂາຍຍ່ອຍ, ຮັບປະກັນຄວາມສົດໃໝ່, ທັງເປັນພື້ນທີ່ສະໜອງຜະລິດຕະ ພັນການກະເສດສີຂຽວ ແບບຄົບວົງຈອນແຫ່ງໃໝ່ ໂດຍອີງໃສ່ການຄ້າຂາຍ ຜະລິດຕະພັນກະສິກຳເປັນຫລັກ, ເປັນບ່ອນຮອງຮັບສິນຄ້າ ແລະ ບໍລິການກິດຈະການຕ່າງໆ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)