ຕາມຂໍ້ມູນຈາກ ກະຊວງອຸດສາຫະກຳ ແລະ ການຄ້າ ໃຫ້ຮູ້ວ່າ: ມູນຄ່າການນໍາເຂົ້າ ແລະ ສົ່ງອອກຂອງ ສປປ ລາວ ປະຈໍາເດືອນ 11 ບັນລຸໄດ້ 869 ລ້ານໂດລາສະຫະລັດ (ຍັງບໍ່ກວມເອົາມູນຄ່າການສົ່ງອອກໄຟຟ້າ).

ໃນນັ້ນ, ມູນຄ່າການສົ່ງອອກມີ 436 ລ້ານໂດລາສະຫະລັດ, ມູນຄ່າການນໍາເຂົ້າ 434 ລ້ານໂດລາສະຫະລັດ ແລະ ເກີນດຸນການຄ້າປະມານ 2 ລ້ານໂດລາສະຫາລັດ.

ສຳລັບສິນຄ້າສົ່ງອອກຫລັກປະກອບມີ: ແຮ່ທອງ, ກ້ວຍ, ເຍື່ອໄມ້ ແລະ ເສດເຈ້ຍ, ໂຄງຮ່າງ (ຊິ້ນສ່ວນກ້ອງບັນທຶກພາບ), ຄຳປະສົມ(ຄຳແທ່ງ), ເຄື່ອງນຸ່ງຫົ່ມ, ກາເຟ (ບໍ່ທັນໄດ້ປຸງແຕ່ງ), ຢາງພາລາ, ຢາສູບ ແລະ ສາລີ ໂດຍສົ່ງອອກໄປ ສປ ຈີນ, ສສ ຫວຽດນາມ, ໄທ, ອິນເດຍ ແລະ ຍີ່ປຸ່ນ. ສ່ວນຄ້ານໍາເຂົ້າ ປະກອບມີ: ພາຫະນະທາງບົກ (ນອກຈາກລົດຈັກ, ລົດ ໄຖ), ເຄື່ອງໄຟຟ້າ-ອຸປະກອນໄຟຟ້າ, ນ້ຳມັນກາຊວນ, ອຸປະກອນກົນຈັກ (ນອກຈາກເຄື່ອງກົນຈັກພາຫະນະ), ເຫລັກ ແລະ ເຄື່ອງທີ່ເຮັດດ້ວຍເຫລັກ, ເຫລັກກ້າ, ຊິ້ນສ່ວນອາໄຫລລົດ, ນ້ຳມັນແອັດຊັງ, ແອັດຊັງພິເສດ, ເຫລັກເສັ້ນ ແລະ ເຫລັກຮູບປະພັນຕ່າງໆ, ເຄື່ອງໃຊ້ທີ່ເຮັດດ້ວຍພລາສະຕິກ ແລະ ກາກ ແລະ ສິ່ງເສດເຫລືອຈາກອຸດສາຫະກຳຜະລິດອາຫານ, ເຊິ່ງສ່ວນຫລາຍແມ່ນນຳເຂົ້າຈາກ ໄທ, ສປ ຈີນ, ຍີ່ປຸ່ນ ແລະ ສະຫະລັດອາເມລິກາ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)