ໃນວັນທີ 23 ທັນວາ 2020 ຢູ່ຫໍວັດທະນະທໍາແຫ່ງຊາດ ນະຄອນຫລວງວຽງຈັນ, ໄດ້ຈັດກອງປະຊຸມເຜີຍແຜ່ຜົນສໍາເລັດ ການເຄື່ອນໄຫວວຽກງານສະພາປະຊາຄົມວັດທະນະທໍາ-ສັງຄົມອາຊຽນ ສປປ ລາວ, ໂດຍການເປັນປະທານຂອງທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ມີຜູ້ຕາງໜ້າຈາກກະຊວງການ ຕ່າງປະເທດ ແລະ ພາກສ່ວນກ່ຽວຂ້ອງ ຈາກບັນດາຂະແໜງການທີ່ຂຶ້ນກັບປະຊາຄົມວັດທະນະທໍາ-ສັງຄົມອາຊຽນຂອງ ສປປ ລາວ ເຂົ້າຮ່ວມ.

ທ່ານ ສະຫວັນຄອນ ລາຊະມຸນຕີ ໄດ້ມີຄໍາເຫັນບາງຕອນວ່າ: ອາຊຽນ ເປັນອົງການຈັດຕັ້ງພາກພື້ນ ລະຫວ່າງ ລັດຖະບານກັບລັດຖະບານ, ຊຶ່ງໄດ້ຖືກສ້າງຕັ້ງຂຶ້ນໃນວັນທີ 8 ສິງຫາ 1967 ທີ່ບາງກອກ ປະເທດໄທ, ໂດຍການລົງນາມຖະແຫລງການອາຊຽນ ຫລື ເອີ້ນວ່າ: “ຖະແຫລງການບາງ ກອກ”, ໂດຍມີ 5 ປະເທດສະມາຊິກກໍ່ຕັ້ງ ຄື: ອິນໂດເນເຊຍ, ມາເລເຊຍ, ຟີລິບປິນ, ສິງກະໂປ ແລະ ໄທ. ໃນກາງຊຸມ ປີ 1970 ເປັນຕົ້ນມາ, ອາຊຽນໄດ້ປະຕິບັດນະໂຍບາຍ ຂະຫຍາຍສະມາຊິກຂອງຕົນ, ໂດຍຮັບເອົາ ບຣູໄນ ດາຣູຊາລາມ ເຂົ້າເປັນສະມາຊິກອາຊຽນໃນວັນທີ 8 ມັງກອນ 1984, ສສ.ຫວຽດນາມ ໃນວັນທີ 29 ກໍລະກົດ 1995, ສປປ ລາວ ແລະ ມຽນມາ ໃນວັນທີ 23 ກໍລະກົດ 1997 ແລະ ກໍາປູເຈຍ ໃນວັນທີ 30 ເມສາ 1999. ປັດຈຸບັນ, ອາຊຽນ ພວມດໍາເນີນຂັ້ນຕອນການພິຈາລະນາຂໍ້ສະເໜີຂອງ ຕີມໍ ເລສເຕ ເຂົ້າເປັນສະມາຊິກອາຊຽນ ຕາມກົດບັດອາຊຽນ ແລະ ອາຊຽນ ມີ 3 ປະຊາຄົມ ຄື: ປະຊາຄົມການເມືອງ-ຄວາມໝັ້ນຄົງ, ປະຊາຄົມເສດຖະກິດ ແລະ ປະຊາຄົມວັດ ທະນະທໍາ-ສັງຄົມ ເພື່ອເສີມຂະຫຍາຍ ແລະ ເພີ່ມທະວີການເຊື່ອມໂຍງພາຍໃນພາກພື້ນອາຊຽນ ແລະ ການຮ່ວມມືກັບພາຍນອກ, ໂດຍດໍາເນີນນະໂຍບາຍເປີດກວ້າງ ເພື່ອເສີມຂະຫຍາຍທ່ວງທ່າທີ່ດີໃນການພົວພັນກັບປະເທດຄູ່ເຈລະຈາຂອງອາຊຽນ ລວມທັງເສີມຂະຫຍາຍການພົວພັນ ກັບພາຍນອກ ອື່ນໆ.

ສະນັ້ນ, ການເຜີຍແຜ່ຜົນສໍາເລັດການເຄື່ອນໄຫວວຽກງານປະຊາຄົມວັດທະນະທໍາ-ສັງຄົມອາ ຊຽນ ເທື່ອນີ້ ກໍເພື່ອແນໃສ່ໃຫ້ພະນັກງານ ກໍຄື ຜູ້ຮັບຜິດຊອບວຽກງານອາຊຽນໃນຂະແໜງການຕ່າງໆຂອງລາວເຮົາ ໄດ້ມີຄວາມຮັບຮູ້ເຂົ້າໃຈເລິກເຊິ່ງ ແລະ ກໍາໄດ້ພາລະບົດບາດ ແລະ ໜ້າທີ່ ໃນການ ຈັດຕັ້ງປະຕິບັດ ການຮ່ວມມືໃນອາຊຽນ ເພື່ອໃຫ້ເກີດປະໂຫຍດສູງສຸດ ຕໍ່ຂະແໜງການພວກເຮົາໃຫ້ນັບມື້ກວ້າງຂວາງ ແລະ ມີປະສິດທິຜົນຍິ່ງໆຂຶ້ນ. ເວົ້າສະເພາະ ໃນຊ່ວງທີ່ປະສົບກັບການລະບາດຂອງພະຍາດໂຄວິດ-19 ເພື່ອໃຫ້ເຂົ້າໃຈເຖິງການດໍາລົງຊີວິດ ແລະ ປັບຕົວໃຫ້ສອດຄ່ອງກັບເງື່ອນໄຂ “ວິຖີການດໍາລົງຊີວິດແບບໃໝ່” ດ້ວຍຄວາມເອົາໃຈໃສ່.

ຈາກນັ້ນ, ຜູ້ຕາງໜ້າຈາກກະຊວງການຕ່າງປະເທດ ແລະ ຂະແໜງການຕ່າງໆທີ່ຂຶ້ນກັບປະຊາຄົມວັດທະນະທໍາ-ສັງຄົມ ອາຊຽນໄດ້ພັດປ່ຽນກັນ ຂຶ້ນສະເໜີຜົນງານ ແລະ ຜົນສໍາເລັດຕ່າງໆໃນຂະ ແໜງການຕົນ ເປັນຕົ້ນ: ສະພາບລວມຂອງໂລກ ແລະ ພາກພື້ນ, ຜົນສໍາເລັດຂອງກອງປະຊຸມສະພາປະຊາ ຄົມວັດທະນະທໍາ-ສັງຄົມອາຊຽນ ຄັ້ງທີ 23 ແລະ 24, ຜົນສໍາເລັດຂອງກອງປະຊຸມລັດຖະ ມົນຕີ ຮັບຜິດຊອບວຽກງານວັດທະນະທໍາ ແລະ ສິລະປະອາຊຽນ ຄັ້ງທີ 9. ຜົນກອງປະຊຸມລັດຖະມົນ ຕີຮັບຜິດຊອບວຽກງານຖະແຫລງຂ່າວອາຊຽນ ຄັ້ງທີ 15 ລວມເຖິງທິດທາງແຜນການຮ່ວມມືຂອງອາ ຊຽນໃນຕໍ່ໜ້າ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)