ຖະແຫຼງຂ່າວຂອງຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂ ພະຍາດ​ອັກ​ເສບ​ປອດ​ທີ່​ເກີດ​ຈາກ​ເຊື້ອຈຸລະ​ໂລກ​ສາຍ​ພັນໃໝ່ COVID-19 ປະຈໍາວັນພະຫັດ ວັນທີ 24 ທັນວາ ປີ 2020 ໂດຍການເປັນປະທານ ຂອງທ່ານ ດຣ. ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ, ຕາງໜ້າໃຫ້ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະ ບາດຂອງພະຍາດ COVID-19 ຂໍອະນຸຍາດລາຍງານ:  

ສະພາບການລະບາດ​ຂອງ​ພະ​ຍາດ COVID-19 ຂອງບັນ​ດາປະເທດໃກ້ຄຽງ ແລະ ໃນໂລກ ມາຮອດວັນທີ 24 ທັນວາ 2020, ທົ່ວໂລກມີການລາຍງານການລະບາດ ທັງໝົດ 218 (ປະເທດ/ເຂດ); ເຊິ່ງມີການຢັ້ງຢືນຜູ້ຕິດເຊື້ອພະຍາດ COVID-19 ແມ່ນ 78,980,477 ຄົນ; ເສຍຊິວິດ 1,735,724 ຄົນ ເຊິ່ງກວມເອົາ 2.19 % ຂອງຜູ້ຕິດເຊື້ອທັງໝົດ; ປີ່ນປົວຫາຍ 55,560,779 ຄົນ ເຊິ່ງກວມເອົາ 70.3 % ຂອງຜູ້ຕິດເຊື້ອທັງໝົດ

ຜົນກວດວິເຄາະທັງໝົດ ແມ່ນບໍ່ພົບເຊື້ອ, ໝາຍຄວາມວ່າ ວັນທີ 23 ທັນວາ 2020 ບໍ່ພົບຜູ້ຕິດເຊື້ອໃໝ່ ແລະ ສັງລວມການກວດວິເຄາະ ແຕ່ເດືອນມັງກອນ ຮອດວັນທີ 23 ທັນວາ 2020 ໄດ້ເກັບຕົວຢ່າງມາກວດທັງໝົດ 89,013 ຕົວຢ່າງກວດພົບເຊື້ອສະສົມ 41 ຄົນ .

ປັດຈຸບັນມີຂໍ້ຕົກລົງຂອງລັດຖະມົນຕີກະຊວງສາທາລະນະສຸກ, ສະບັບເລກທີ 3439/ສທ, ລົງວັນທີ 22 ທັນວາ 2020 ວ່າດ້ວຍການເກັບຄ່າບໍລິການປີ່ນປົວ ແລະ ເກັບຄ່າກວດວິເຄາະຫາເຊື້ອພະຍາດ COVID-19.

  • ການຕິດຕາມປີ່ນປົວຄົນເຈັບຢູ່ໂຮງໝໍ

ຄົນເຈັບຕິດເຊື້ອ COVID-19 ທີ່ນອນຕິດຕາມຢູ່ໂຮງໝໍ, ຖ້າຜົນກວດໃຫ້ຜົນລົບຕິດຕໍ່ກັນ 02 ຄັ້ງ ແມ່ນຈະໄດ້ຮັບອະນຸຍາດໃຫ້ອອກໂຮງໝໍໄດ້; ມາຮອດປະຈຸບັນ ຍັງມີຄົນເຈັບຕິດເຊື້ອພະຍາດ COVID-19 ຈຳນວນ 04 ຄົນ ທີ່ຍັງສືບຕໍ່ນອນປິ່ນປົວຢູ່ໂຮງໝໍທີ່ຖືກກຳນົດໄວ້, ທຸກຄົນແມ່ນມີອາການເບົາບາງ, ບໍ່ມີອາການສົນຫຍັງ ແລະ ສະພາບການລະບາດຂອງ COVID-19 ໃນທົ່ວໂລກ ສຳລັບເດືອນທັນວາ ແມ່ນຖືວ່າໜັກໜ່ວງ

ສະເພາະ ສປປ ລາວ ເຮົາ ແມ່ນມີຄວາມສ່ຽງສູງທີ່ຈະມີຜູ້ຕິດເຊື້ອຈາກຕ່າງປະເທດ ເຂົ້າມາແຜ່ເຊື້ອ ແລະ ເກີດການລະບາດຮອບໃໝ່ ໃນປະເທດຂອງພວກເຮົາ. ສະນັ້ນ ພວກເຮົາທຸກຄົນຕ້ອງເປັນເຈົ້າການຮ່ວມກັນ ໃນການປະຕິບັດມາດຕະການທີ່ຄະນະສະເພາະກິດວາງອອກຢ່າງເຂັ້ມງວດ ກໍ່ຄືແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ, ສະບັບເລກທີ 1414/ຫສນຍ, ລົງວັນທີ 23 ທັນວາ 2020 ແລະ ຄຳແນະນຳຂອງຂະແໜງການກ່ຽວຂ້ອງ ເພື່ອສະກັດກັ້ນ ການລະບາດແຕ່ຫົວທີ ບໍ່ໃຫ້ຂະຫຍາຍເປັນວົງກວ້າງ ສະນັ້ນ ຈຶ່ງຂໍຮຽກຮ້ອງມາຍັງທຸກພາກສ່ວນໃນສັງຄົມ ໃຫ້ຄວາມຮ່ວມມືມີນ້ຳໃຈສາມັກຄີເປັນອັນໜຶ່ງດຽວກັນ, ມີຄວາມຮັບຜິດຊອບຕໍ່ຕົນເອງ ແລະ ສັງຄົມ ປະຕິບັດມາດຕະການປ້ອງກັນການຕິດເຊື້ອຢ່າງເຄັ່ງຄັດ ແລະ ເປັນປະຈຳ ເປັນຕົ້ນ ແມ່ນ ໃສ່ຜ້າອັດປາກ-ດັງ, ໝັ່ນລ້າງມືເລື້ອຍໆ ດ້ວຍນ້ຳສະອາດໃສ່ສະບູ ຫຼື ເຈວລ້າງມື, ຮັກສາໄລຍະຫ່າງ 1-2 ແມັດຂຶ້ນໄປ, ຫຼີກລ້ຽງການເດີນທາງໄປຍັງສະຖານທີ່ແອອັດ, ບໍ່ໃຊ້ເຄື່ອງຮ່ວມກັນ ເພື່ອຫຼຸດຜ່ອນໂອກາດໃນການແຜ່ເຊື້ອ ພ້ອມດຽວກັນນັ້ນ ກໍ່ໃຫ້ໝັ່ນສັງເກດອາການຂອງຕົນເອງ ຫາກມີອາການຫາຍໃຈຝືດ, ດັ່ງບໍ່ໄດ້ກິ່ນ, ລິ້ນບໍ່ໄດ້ລົດຊາດ ໃຫ້ທ່ານໄປພົບແພດທັນທີເພື່ອທຳການເກັບຕົວຢ່າງກວດຊອກຫາເຊື້ອ;

ໃນວັນທີ 23 ທັນວາ 2020  ສປປ ລາວ ເຮົາ ແມ່ນ ມີຜູ້ຕິດເຊື້ອທັງໝົດ 04 ກໍລະນີ ແລະ ມີຜູ້ເສຍຊີວິດ 00 ຄົນ;

ສຳລັບລາຍລະອຽດຄຳແນະນຳ, ຂໍ້ມູນທີ່ເປັນທາງການ, ທ່ານສາມາດຕິດຕາມໄດ້ຈາກເວັບໄຊ www.covid19.gov.la ແລະ ເຟດບຸກຂອງສູນສື່​ສານ​ເພື່ອ​ສຸ​ຂະ​ພາບ ແລະ ສຸຂະສຶກສາ ແລະ ສາຍດ່ວນ 165, 166.