ບັນຍາກາດກຽມເຂົ້າສູ່ກອງປະຊຸມໃຫຍ່ ຄັ້ງທີ XI ຂອງພັກ ພວມເປັນຂະບວນຟົດຟື້ນປະຕິວັດໃນທົ່ວປະເທດ ໂດຍສະເພາະ ການຢັ່ງສຽງບຸກຄະລາກອນ ທີ່ຈະສະໝັກເຂົ້າເປັນ ຄະນະບໍລິຫານງານສູນກາງພັກ ນັ້ນ ໄດ້ດຳເນີນຮອບທີສອງແລ້ວ.

ສະນັ້ນ ພວກເຮົາຈຶ່ີງຢາກນຳສະເໜີໃຫ້ເພື່ອນຜູ້ອ່ານກຳໄດ້ ການກະກຽມເນື້ອໃນກອງປະຊຸມໃຫຍ່ ຄັ້ງທີ XI ຂອງພັກ ທີ່ມະຕິກອງປະຊຸມຄົບຄະນະ ຄັ້ງທີ 11 ຂອງຄະນະບໍລິຫານງານສູນກາງພັກ ສະໄໝທີ X ທີ່ດຳເນີນແຕ່ວັນທີ 12 ເຖິງ 16 ຕຸລາ 2020 ໄດ້ໃຫ້ທິດຊີ້ນຳ ດັ່ງນີ້:

ການກະກຽມເນື້ອໃນ ກອງປະຊຸມໃຫຍ່ ຄັ້ງທີ XI ຂອງພັກ

  • ຕໍ່ຮ່າງລາຍງານການເມືອງ:
  • – ກອງປະຊຸມເຫັນວ່າ ເນື້ອໃນເອກະສານໄດ້ຮັບການປັບປຸງ ມີຄວາມຈະແຈ້ງກວ່າເກົ່າ ແລະ ມີພື້ນຖານໜັກແໜ້ນສົມຄວນ, ໃຫ້ສືບຕໍ່ປັບປຸງ, ສັບຊ້ອນ, ຈັດລຽງປະໂຫຍກຄຳເວົ້າ, ລຳດັບໝວດວຽກ ໃຫ້ສອດຄ່ອງກົມກຽວກັນ, ບາງເນື້ອໃນທີ່ບໍ່ທັນຊັດເຈນ ຫຼື ອາດເຮັດໃຫ້ເຂົ້າໃຈບໍ່ຖືກຕ້ອງ ກໍ່ສືບຕໍ່ປັບປຸງໃຫ້ກະທັດລັດ, ຮັດກຸມ.
  • – ກ່ຽວກັບຄຳຂັວນ, ຍັງມີບາງຄວາມເຫັນ ສະເໜີໃຫ້ເພິ່ມຕື່ມບາງຈຸດ, ໃຫ້ຈັດລຽງຕື່ມ, ແປງຄວາມເວົ້າ ແລະ ອື່ນໆ ເຊິ່ງຍັງຕ້ອງສືບຕໍ່ຄົ້ນຄວ້າ ແລະ ປັບປຸງຕໍ່ໄປ, ບົນຈິດໃຈໃຫຍ່ໆທີ່ໄດ້ມີທິດຊີ້ນຳແລ້ວ ເປັນຕົ້ນ ບັນຫາຄວາມສາມັກຄີເປັນປຶກແຜ່ນ, ການຢຶດໝັ້ນ ແລະ ຜັນຂະຫຍາຍແນວທາງປ່ຽນແປງໃໝ່ເຂົ້າສູ່ລວງເລີກ, ການຮັບປະກັນສະຖຽນລະພາບຂອງປະເທດຊາດ, ການສ້າງການຫັນປ່ຽນໃໝ່ໃນການພັດທະນາ, ການຍົກສູງຄຸນນະພາບຊີວິດຂອງປະຊາຊົນ, ການຫຼຸດພົ້ນຈາກສະຖານະພາບດ້ອຍພັດທະນາ, ການກ້າວຂຶ້ນສູ່ຈຸດໝາຍສັງຄົມນິຍົມ.
  • – ສະເໜີໃຫ້ອະນຸກຳມະການເນື້ອໃນສືບຕໍ່ຄົ້ນຄວ້າ ແລະ ຂຽນໃຫ້ຊັດເຈນ, ຈະແຈ້ງຕື່ມ ເພື່ອສ່ອງແສງໃຫ້ເຫັນທິດ ກໍ່ຄື ແຜນນະໂຍບາຍໃຫຍ່ຈຳນວນໜຶ່ງທີ່ຈະເປັນພື້ນຖານເປີດທາງໃຫ້ແກ່ການຜັນຂະຫຍາຍເປັນອັນລະອຽດ ກໍ່ຄືການແກ້ໄຂບັນຫາຕົວຈິງ ເຊັ່ນ: ບັນຫາການປະຕິຮູບໂຄງສ້າງເສດຖະກິດ, ບັນຫາການປັບປຸງ ແລະ ປະຕິຮູບລັດວິສາຫະກິດ, ການສ້າງຄວາມເຂັ້ມແຂງແກ່ພາກສ່ວນເສດຖະກິດຮ່ວມມືຂອງປະຊາຊົນ; ບັນຫາປັບປຸງກົງຈັກໃຫ້ກະທັດລັດ ສົມເຫດສົມຜົນ, ແກ້ໄຂ ແລະ ກຳຈັດປັດເປ່ົາປະກົດການຫຍໍ້ທໍ້ໃນກົງຈັກ; ບັນຫາການແບ່ງຂັ້ນຄຸ້ມຄອງ, ແບ່ງຄວາມຮັບຜິດຊອບລະຫວ່າງ ບ້ານ, ເມືອງ, ແຂວງ ແລະ ສູນກາງ, ບັນຫາປັບປຸງລະບອບ, ກົນໄກ, ມາດຕະການ ເພິ່ມທະວີຄວາມສັກສິດ ແລະ ປະສິດທິຜົນຂອງການຄຸ້ມຄອງຂອງລັດຕາມກົດໝາຍ ຕິດພັນກັບການແກ້ໄຂຜົນຂອງການກວດສອບ-ກວດກາ ກໍ່ຄື ການປະຕິບັດວິໄນ ແລະ ການລົງໂທດຕໍ່ສະມາຊິກພັກ-ພະນັກງານ; ບັນຫາປະຕິຮູບລະບົບຍຸຕິທຳ, ບັນຫາການຄົ້ນຄວ້າແນວຄິດ-ທິດສະດີ; ການບຸກທະລຸວຽກຈັດຕັ້ງພັກ-ພະນັກງານ, ການຄຸ້ມຄອງ ແລະ ປ້ອງກັນພະນັກງານ; ບັນຫາກົນໄກ, ວິທີການໃຫ້ສັງຄົມ, ມະຫາຊົນ ເຂົ້າຮ່ວມປັບປຸງກໍ່ສ້າງພັກ ແລະ ອື່ນໆ…
  • ຕໍ່ຮ່າງແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX:
  • – ກອງປະຊຸມສູນກາງໄດ້ຕີລາຄາສູງ ແລະ ຊົມເຊີຍລັດຖະບານທີ່ໄດ້ຊີ້ນຳການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງ VIII ໄດ້ຮັບໝາກຜົນສຳຄັນຫຼາຍດ້ານ, ພ້ອມນັ້ນ ກໍຍັງເຫັນຂໍ້ຄົງຄ້າງຕົ້ນຕໍຈຳນວນໜຶ່ງ ເປັນຕົ້ນແມ່ນ ຖານຂໍ້ມູນຄົ້ນຄວ້າ, ຄິດໄລ່ເຂົ້າໃນການວາງແຜນການ ຍັງບໍ່ທັນຮັບປະກັນພື້ນຖານທີ່ໜັກແໜ້ນ, ຊັດເຈນ, ແທດກັບສະພາບ ແລະ ຄວາມສາມາດຕົວຈິງຂອງປະເທດເຮົາ ບວກກັບສະພາບການຜັນແປຂອງເສດຖະກິດ-ການເງິນ, ພະຍາດລະບາດຢູ່ພາກພື້ນ ແລະ ສາກົນ, ການຄຸ້ມຄອງລັດດ້ວຍກົດໝາຍບໍ່ທັນເຂັ້ມແຂງ ກໍ່ຄືການຕິດຕາມ, ກວດກາ, ປະເມີນຜົນການຈັດຕັ້ງປະຕິບັດແຕ່ລະໄລຍະ ບໍ່ທັນເຂັ້ມງວດ ອັນໄດ້ເຮັດໃຫ້ຄາດໝາຍໃຫຍ່ດ້ານມະຫາພາກ ຫຼາຍອັນບໍ່ບັນລຸຜົນສຳເລັດ, ບັນຫາການຜະລິດເປັນສິນຄ້າ, ງົບປະມານ-ການເງິນ, ໜີ້ສິນ, ການແກ້ໄຂຄວາມທຸກຍາກ, ປະກົດການຫຍໍ້ທໍ້ ກໍຄືບັນຫາດ້ານສັງຄົມ… ຍັງຕ້ອງໄດ້ເປັນຈຸດສຸມສຳຄັນຂອງການແກ້ໄຂໃນຕໍ່ໜ້າສຳລັບການກຳນົດທິດທາງພັດທະນາໃນຮ່າງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX (ສະບັບທີ 4) ຕາມທິດມີຄຸນນະພາບ, ມີຈຸດສຸມ, ຍືນຍົງ ແລະ ສີຂຽວ ແມ່ນສອດຄ່ອງກັບສະພາບເງື່ອນໄຂຂອງປະເທດເຮົາ, ແຜນດັ່ງກ່າວ ຖືເປັນແຜນຜັນຂະຫຍາຍແນວທາງການເມືອງທີ່ຖືເອົາການເສີມຂະຫຍາຍທ່າແຮງບົ່ມຊ້ອນ, ສ້າງຖານການຜະລິດ ແລະ ບໍລິການທີ່ເຂັ້ມແຂງ, ຮັບປະກັນການພັດທະນາແບບຍືນຍົງ ແລະ ເປັນເຈົ້າຕົນເອງ, ພັດທະນາຊັບພະຍາກອນມະນຸດຢ່າງແຂງແຮງ, ສ້າງສັງຄົມທີ່ປະຊາຊົນເປັນເຈົ້າ, ມີປະຊາທິປະໄຕ, ສະເໜີພາບ ແລະ ຍຸຕິທຳ.
  • – ຄະນະບໍລິຫານງານສູນກາງພັກ ໄດ້ເນັ້ນໃຫ້ຄະນະຮັບຜິດຊອບສືບຕໍ່ປັບປຸງແຜນດັ່ງກ່າວໃຫ້ຮັດກຸມ, ຈະແຈ້ງ ແລະ ປະຕິບັດໄດ້, ເປັນຕົ້ນ ແມ່ນຄວາມສອດຄ່ອງລະຫວ່າງແຜນພັດທະນາຂອງສູນກາງ ແລະ ທ້ອງຖິ່ນ; ການກຳນົດອັດຕາການຂະຫຍາຍຕົວຂອງລວມຍອດຜະລິດຕະພັນພາຍໃນ (GDP) ໃຫ້ແທດກັບສະພາບຕົວຈິງ; ບັນດາຂໍ້ມູນຕົວເລກສຳຄັນຕ່າງໆ ແລະ ປະສິດທິຜົນການລົງທຶນຂອງລັດ ຕ້ອງຮັບປະກັນການເຕີບໂຕຂອງເສດຖະກິດ ຕິດພັນກັບການຍົກສູງຄຸນະພາບຊີວິດຂອງປະຊາຊົນ, ແກ້ໄຂການແຕກໂຕນດ້ານລາຍໄດ້ຂອງປະຊາຊົນ, ອັດຊ່ອງຫວ່າງການພັດທະນາ ລະຫວ່າງ ຊົນນະບົດ ແລະ ຕົວເມືອງ, ພູດອຍ ແລະ ທົ່ງພຽງ; ບັນຫາການປົກປັກຮັກສາສິ່ງແວດລ້ອມ; ບັນຫາທຶນເພື່ອພັດທະນາ; ການແກ້ໄຂໜີ້ສິນໃນ 5 ປີຕໍ່ໜ້າ ຄວນສູ້ຊົນໃຫ້ຫຼຸດລົງຢ່າງໜ້ອຍບໍ່ໃຫ້ຫຼຸດລະດັບ 5-8% ໂດຍກຳນົດແຫຼ່ງທຶນ ແລະ ການດຸ່ນດ່ຽງແຫຼ່ງທຶນເຂົ້າໃສ່ການຈັດຕັ້ງປະຕິບັດ; ສະຫຼຸບຕີລາຄາບັນຫາການຫັນຊັບສິນເປັນທຶນ; ບັນຫານະໂຍບາຍປະຫຍັດແຫ່ງຊາດ, ສ້າງໃຫ້ມີການສະສົມທຶນຮອນ; ການຍົກສູງປະສິດທິພາບການຄຸ້ມຄອງ, ນຳໃຊ້ຊັບພະຍາກອນທຳມະຊາດ ທີ່ຍັງເຫຼືອບໍ່ຫຼາຍໃຫ້ເກີດປະສິດທິຜົນສູງຕາມທິດຫັນເປັນອຸດສາຫະກຳ ແລະ ທັນສະໄໝ ໂດຍສະເພາະແມ່ນຂະແໜງບໍ່ແຮ່ ແລະ ພະລັງງານໄຟຟ້າ ເຊິ່ງຖືເປັນຂະແໜງເສດຖະກິດທີ່ເປັນທ່າແຮງ ແລະ ປາຍແຫຼມ ດ້ວຍຄວາມລະມັດລະວັງ, ເຮັດຢ່າງມີຈຸດສຸມ; ບຸກທະລຸໃນການສ້າງ ແລະ ພັດທະນາຊັບພະຍາກອນມະນຸດ, ສ້າງສັກກາຍະພາບໃຫ້ແກ່ຄົນລາວ; ບັນຫາການຍົກລະດັບຄຸນະພາບຊີວິດເຂອງປະຊາຊົນ, ການເຂົ້າເຖິງໂຄງລ່າງຮັບໃຊ້ແກ່ການພັດທະນາ, ການດຳລົງຊີວິດ ແລະ ການແກ້ໄຂຄວາມທຸກຍາກ ກໍ່ຄືການເຂົ້າເຖິງການສຶກສາ ແລະ ສາທາລະນະສຸກທີ່ມີຄຸນນະພາບ, ສະຫວັດດີການສັງຄົມທີ່ຍຸຕິທຳ ແລະ ອື່ນໆ.

ຄະນະບໍລິຫານງານສູນກາງພັກ ມອບໃຫ້ກົມການເມືອງສູນກາງພັກ ສືບຕໍ່ຊີ້ນຳອະນຸກຳມະການເນື້ອໃນ ກໍຄື ຄະນະຮັບຜິດຊອບກະກຽມຮ່າງແຜນພັດທະນາເສດຖະກິດ-ສັງຄົມ ໃນການຄົ້ນຄວ້າ, ປັບປຸງເນື້ອໃນຂອງສອງເອກະສານໃຫ້ຄົບຖ້ວນ ແລະ ຮັດກຸມ, ພາຍຫຼັງປັບປຸງແລ້ວ ໃຫ້ຮີບຮ້ອນນຳໄປຈັດຕັ້ງສຳມະນາວິທະຍາສາດ, ທາບທາມຄວາມເຫັນທີ່ມີລັກສະນະຄົ້ນຄວ້າເຊື່ອມຊຶມຢ່າງກວ້າງຂວາງ, ເລິກເຊິ່ງ ເພື່ອກ້າວເຂົ້າສູ່ກອງປະຊຸມໃຫຍ່ຄັ້ງທີ XI ຂອງພັກ.

ຂ້າງເທິງນັ້ນຄື ຈິດໃຈຊີ້ນຳທີ່ຢາກໃຫ້ເພື່ອນຜູ້ອ່ານກຳໄດ້ນໍ.

Medialaos MMD (ແຫຼ່ງຂໍ້ມູນຈາກ: ນັກຂ່າວອາວຸໂສ)