ຫ້ອງການສຶກສາທິການ ແລະ ກິລາ ເມືອງເມິງ ແຂວງບໍ່ແກ້ວ (ສກມ ເມິງ) ສຳເລັດການສອບເສັງຄັດເລືອກ ນັກຮຽນເກັ່ງ ຊັ້ນປະຖົມສຶກສາ ຂັ້ນ ປ5 ແລະ ຊັ້ນມັດທະຍົມສຶກສາຕອນຕົ້ນ ຂັ້ນ ມ.4 ລະດັບເມືອງ ປະຈຳສົກຮຽນ 2020-2021 ເມື່ອບໍ່ດົນມານີ້, ທີ່ຫ້ອງປະຊຸມ ຫ້ອງການສຶກສາທິການ ແລະ ກິລາ ເມືອງເມິງ ໂດຍການເປັນປະທານຂອງທ່ານ ຄໍາເປົາ ແກ້ວພັນທອງ ຫົວໜ້າຫ້ອງການສຶກສາທິການ ແລະ ກິລາ ເມືອງເມິງ, ມີພາກສ່ວນກ່ຽວຂ້ອງເຂົ້າຮ່ວມ.

ພິທີສອບເສັງຄັດເລືອກນັກຮຽນເກັ່ງດັ່ງກ່າວ, ມີນັກສອບເສັງມາຈາກໂຮງຮຽນປະຖົມສຶກສາ ( ປ5 ) ຈໍານວນ 6 ກຸ່ມໂຮງຮຽນທົ່ວເມືອງ ຈໍານວນ 18 ຄົນ, ຍິງ 12 ຄົນ, ຊັ້ນມັດທະຍົມສຶກສາຕອນຕົ້ນ (ມ4) 5 ແຫ່ງ ທົ່ວເມືອງ ມີຈໍານວນ 20 ຄົນ, ຍິງ 15 ຄົນ ເຂົ້າຮ່ວມແຂ່ງຂັນ. ການສອບເສັງຄັດເລືອກນັກຮຽນເກັ່ງຂັ້ນເມືອງ ຄັ້ງນີ້ ປະກອບມີ 2 ຂັ້ນຄື: ຊັ້ນປະຖົມສຶກສາ ຂັ້ນ ປ5 ສອບເສັງໃນ 3 ວິຊາຫຼັກຄື: ວິຊາ ຄະນິດສາດ, ວິຊາ ພາສາລາວ ແລະ ວິຊາ ໂລກອ້ອມຕົວ ແລະ ຊັ້ນມັດທະຍົມສຶກສາຕອນຕົ້ນ ຂັ້ນ ມ4 ສອບເສັງໃນ 4 ວິຊາຫຼັກຄື: ວິຊາ ພາສາລາວ-ວັນນະຄະດີ, ວິຊາ ຄະນິດສາດ, ວິຊາ ເຄມີສາດ ແລະ ວິຊາ ຟີຊິກສາດ.

ຜ່ານການສອບເສັງ ສາມາດສະຫຼຸບ ໄດ້ດັ່ງນີ້: ຊັ້ນປະຖົມສຶກສາ ຂັ້ນ ປ5 ວິຊາ ພາສາລາວ ໄດ້ແກ່ ນາງ ຈັນສະໝອນ ເຢມະນີ ຈາກໂຮງຮຽນປະຖົມສຶກສາສົມບູນ ນໍ້າເມິງ; ວິຊາ ຄະນິດສາດ ທ້າວ ຢົງມົວ ຈາກໂຮງຮຽນປະຖົມສຶກສາສົມບູນ ນໍ້າຍູ້ ແລະ ວິຊາ ໂລກອ້ອມຕົວ ນາງ ຊົມພູ ຈາກໂຮງຮຽນປະຖົມສຶກສາສົມບູນ ນໍ້າເມິງ. ຊັ້ນມັດທະຍົມສຶກສາຕອນຕົ້ນ ຂັ້ນມ4 ວິຊາ ຄະນິດສາດ ໄດ້ແກ່ ນາງ ອໍ ຈາກໂຮງຮຽນນໍ້າຍູ້, ວິຊາ ພາສາລາວ-ວັນນະຄະດີ ນາງ ຈັນດີ ແອມະນີ ໂຮງຮຽນ ມ.ຕົ້ນ ຫົວນໍ້າຄາ, ວິຊາ ຟີຊິກສາດ ນາງ ສີການດາ ອິນທະພອນ ຈາກໂຮງຮຽນ ມ.ສ ນໍ້າເມິງ ແລະ ວິຊາ ເຄມີສາດ ນາງ ແພງ ຕອງຟອງ ຈາກໂຮງຮຽນ ມ.ສ ນໍ້າເມິງ.ໃນພິທີທ່ານ ຄໍາເປົາ ແກ້ວພັນທອງ ປະທານການສອບເສັງ ຍັງໄດ້ກ່າວວ່າ: “ການສອບເສັງຄັດເລືອກນັກຮຽນເກັ່ງລະດັບເມືອງຄັ້ງນີ້ ແມ່ນເປັນການຄັດເລືອກນັກຮຽນດີ-ນັກຮຽນເກັ່ງ ເພື່ອເປັນຕົວແທນຂອງເມືອງ ເຂົ້າຮ່ວມການສອບເສັງນັກຮຽນເກັ່ງລະດັບແຂວງ ອີກທັງເປັນການຈັດຕັ້ງບຸກທະລຸ 4 ດ້ານຂອງຂະແໜງການສຶກສາໂດຍສະເພາະແມ່ນດ້ານການພັດທະນາຊັບພະຍາກອນມະນຸດ, ເອົາໃຈໃສ່ປະຕິບັດ 5 ຫຼັກມູນຂອງການສຶກສາ ແລະ 3 ຂໍ້ແຂ່ງຂັນຂອງກະຊວງສຶກສາທິການ ແລະ ກິລາວາງອອກ ແລະ ທ່ານ ຍັງໄດ້ຍ້ອງຍໍຊົມເຊີຍນັກຮຽນທີ່ສາມາດຍາດໄດ້ອັນດັບທີ 1, 2 ແລະ 3 ຂອງແຕ່ລະວິຊາ ພ້ອມທັງເນັ້ນໜັກໃຫ້ຄູ-ອາຈານ ເອົາໃຈໃສ່ທຸ້ມເທເຫື່ອແຮງສະຕິປັນຍາອັນແຫຼມຄົມເຂົ້າໃສ່ໃນການສິດສອນ ແລະ ສົ່ງຄວາມຮູ້ໃຫ້ແກ່ນັກຮຽນພາຍໃນໂຮງຮຽນຂອງຕົນ ໂດຍສະເພາະແມ່ນການບຳລຸງນັກຮຽນເກັ່ງ ທີ່ເປັນຕົວແທນຂອງເມືອງ ເຂົ້າຮ່ວມການແຂ່ງຂັນລະດັບແຂວງ ແນໃສ່ຍາດເອົາໄຊຊະນະມາສູ່ເມືອງ.

Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)