ໃນວັນທີ 29 ທັນວາ 2020, ທີ່ນະຄອນຫລວງວຽງຈັນ ທ່ານ ດຣ. ພອນປະເສີດ ໄຊຍະມຸງຄຸນ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ໄດ້ລາຍງານກ່ຽວກັບການລະບາດຂອງພະຍາດໄຂ້ຍຸງລາຍ, ເຊິ່ງໃນວັນທີ 28 ທັນວາ 2020 ສປປ ລາວ ເຮົາ ແມ່ນມີຜູ້ຕິດເຊື້ອໄຂ້ຍຸງເພີ່ມຂຶ້ນ 07 ກໍລະນີ ແຕ່ບໍ່ມີຜູ້ເສຍຊີວິດ.

ແຕ່ວັນທີ 01 ມັງກອນ 2020-28 ທັນວາ 2020 ມີຜູ້ຕິດເຊື້ອກໍລະນີ ສະສົມທັງໝົດ 8.237 ຄົນ (ມີລາຍງານກໍລະນີ ໃນ 18 ແຂວງ, ແຂວງທີ່ມີການລາຍງານ ຫລາຍກວ່າໝູ່ ແມ່ນນະຄອນຫລວງວຽງຈັນ ມີເຖິງ 1.907 ຄົນ, ຖັດລົງມາແມ່ນ ບໍລິຄຳໄຊ 941 ຄົນ, ບໍ່ແກ້ວ 709 ຄົນ ແລະ ວຽງຈັນ 726 ຄົນ). ຈຳນວນຜູ້ເສຍຊີວິດຍ້ອນ ພະຍາດໄຂ້ຍຸງລາຍ ມີທັງໝົດ 13 ຄົນ (ນະຄອນຫລວງ 04 ຄົນ, ບໍລິຄຳໄຊ 02 ຄົນ, ຄຳມ່ວນ 02 ຄົນ, ໄຊຍະບູລີ 01 ຄົນ, ຊຽງຂວາງ 01 ຄົນ, ສະຫວັນນະເຂດ 01 ຄົນ, ຜົ້ງສາລີ 01 ຄົນ ແລະ ອຸດົມໄຊ 01 ຄົນ).

ທ່ານ ດຣ. ພອນປະເສີດ ໄຊຍະມຸງຄຸນ ໄດ້ແນະນຳວ່າ: ຖ້າທ່ານເປັນໄຂ້ໃຫ້ຮີບຮ້ອນ ໄປພົບແພດໝໍ ເພື່ອບົງມະຕິພະຍາດ ແລະ ປິ່ນປົວໄດ້ໂດຍໄວ ແລະ ທັນການ, ພ້ອມຮຽກຮ້ອງໃຫ້ພໍ່ແມ່ປະຊາຊົນ ແລະ ອຳນາດການປົກຄອງທຸກຂັ້ນ ຈົ່ງສືບຕໍ່ເອົາໃຈໃສ່ ຈຳກັດແຫລ່ງເພາະພັນຂອງຍຸງລາຍທີ່ເປັນພາຫະນຳເຊື້ອພະຍາດ ເພື່ອຫລຸດຜ່ອນໂຕຍຸງທີ່ນຳເຊື້ອ ຖ້າຍຸງນຳເຊື້ອຫລຸດລົງຄວາມສ່ຽງຕໍ່ການຕິດເຊື້ອ ແລະ ເສຍຊີວີດຍ້ອນພະຍາດໄຂ້ຍຸງລາຍກໍຈະຫລຸດລົງເຊັ່ນກັນ.

Medialaos MMD (ແຫຼ່ງຂໍ້ມູນຈາກ: )