ກະຊວງການຕ່າງປະເທດ ໄດ້ມອບໂລ້ກຽດຕິຄຸນໃຫ້ແກ່ ທ່ານ ບົວເງິນ ຊາພູວົງ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ທີ່ໄດ້ມີຜົນງານພົ້ນເດັ່ນ ໃນການປະກອບສ່ວນເຂົ້າ ໃນການເຄື່ອນໄຫວວຽກງານ ການຕ່າງປະເທດຢ່າງຍາວນານ ໂດຍສະເພາະແມ່ນ ການທູດວັດທະນະທຳ ແລະ ການທູດປະຊາຊົນ.

ນອກຈາກນີ້, ທ່ານ ຍັງໄດ້ປະກອບສ່ວນເຮັດໃຫ້ ການເຄື່ອນໄຫວຕ່າງປະເທດ ຫລາຍບັ້ນ ທີ່ສຳຄັນປະສົບຜົນສຳເລັດຢ່າງຈົບງາມ, ເຊິ່ງໄດ້ສ້າງຄວາມປະທັບໃຈໃຫ້ຄະນະຜູ້ແທນຂັ້ນສູງຂອງຕ່າງປະເທດທີ່ມາຮ່ວມ, ພິເສດທ່ານໄດ້ປະດິດແຕ່ງບົດເພງ ທີ່ໄດ້ຖືເປັນບົດເພງປະຈຳ ຂອງຂະແໜງການຕ່າງປະເທດ ທີ່ມີຊື່ວ່າ: “ຊື່ລາວດັງກ້ອງ”, ເຊິ່ງເນື້ອໃນບົດເພງດັ່ງກ່າວ ໄດ້ສ້າງຄວາມຮູ້ສຶກພາກພູມໃຈ ແລະ ທະນົງໃຈ ໃນຄວາມເປັນຊາດລາວ ແລະ ເປັນບົດເພງໜຶ່ງທີ່ໄດ້ຮັບຄວາມນິຍົມໃນທົ່ວປວງຊົນລາວທັງຊາດ.

ພິທີມອບ-ຮັບໂລ້ກຽດຕິຄຸນດັ່ງກ່າວ, ໄດ້ຈັດຂຶ້ນໃນວັນທີ 29 ທັນວາ 2020 ທີ່ສູນການຮ່ວມມືສາກົນ ແລະ ການຝຶກອົບຮົມ, ໃນກອງປະຊຸມສະຫລຸບຜົນງານ ການເຄື່ອນໄຫວວຽກງານປະຈໍາປີ 2020 ແລະ ທິດທາງແຜນການ ສຳລັບປີ 2021 ຂອງກະຊວງການຕ່າງປະເທດ. ຕາງໜ້າມອບໂດຍ ທ່ານ ສະເຫລີມໄຊ ກົມມະສິດ ລັດຖະມົນຕີ ກະຊວງການຕ່າງປະເທດ ມີບັນດາຮອງລັດຖະມົນຕີ, ຄະນະກົມ, ພະນັກງານອາວຸໂສບໍານານ ພ້ອມດ້ວຍພະນັກງານ ກະຊວງການ ຕ່າງປະເທດ ເຂົ້າຮ່ວມ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)