ຜູ້ພັດທະນາໂຄງການກໍ່ສ້າງເຂື່ອນໄຟຟ້ານ້ຳອູ 7 ແລະ ພາກສ່ວນທີ່ກ່ຽວຂ້ອງ ຈະເລີ່ມການຟື້ນຟູຊີວິດການເປັນຢູ່ໃຫ້ປະຊາຊົນທີ່ຖືກຜົນກະທົບຈາກໂຄງການ ນັບຕັ້ງແຕ່ວັນທີ 1 ມັງກອນ 2021 ເປັນຕົ້ນໄປ ເຊິ່ງປະກອບມີ 3 ບ້ານຄື: ບ້ານສົມມີໄຊ (ຕາຕຸງ), ບ້ານຈະເລີນ ແລະ ບ້ານໄຊທອງ (ສົບກັ້ງ) ເມືອງຜົ້ງສາລີ, ມີປະຊາຊົນທີ່ໄດ້ຮັບຜົນກະທົບທັງໝົດ 222 ຄອບຄົວ, ພົນລະເມືອງ 1.400 ກວ່າຄົນ, ໃນນັ້ນ ບ້ານສົມມີໄຊ ມີ 77 ຄອບຄົວ, ບ້ານຈະເລີນ ມີ 68 ຄອບຄົວ ແລະ ບ້ານໄຊທອງ ມີ 77 ຄອບຄົວ.

ພິທີເປີດການຟື້ນຟູຊີວິດການເປັນຢູ່ໃຫ້ປະຊາຊົນທີ່ໄດ້ຮັບຜົນກະທົບດັ່ງກ່າວ ໄດ້ຈັດຂຶ້ນໃນວັນ 29 ທັນວາ 2020 ໂດຍການເຂົ້າຮ່ວມຂອງ ທ່ານ ທອງສຸກ ເປົາສຸລີ ເຈົ້າເມືອງຜົ້ງສາລີ, ທ່ານ ທອງ ອາລີ ຫົວໜ້າພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງຜົ້ງສາລີ, ພະນັກງານຈາກຂະແໜງການທີ່ກ່ຽວຂ້ອງ, ພ້ອມດ້ວຍອຳນາດການປົກຄອງທ້ອງຖິ່ນ ແລະ ປະຊາຊົນ.

ໂອກາດນີ້, ທ່ານ ສຸລິຍາ ແສງດາລາ ຮອງຫົວໜ້າພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງຜົ້ງສາລີ, ທັງເປັນຫົວໜ້າໜ່ວຍງານຈັດສັນຍົກຍ້າຍປະຊາຊົນ ທີ່ຖືກຜົນກະທົບຈາກໂຄງການກໍ່ສ້າງເຂື່ອນໄຟຟ້າ ນ້ຳຕົກ ນ້ຳອູ 4 ແລະ ນ້ຳອູ 7 ກ່າວວ່າ: ໃນການຟື້ນຟູຊີວິດການເປັນຢູ່ໃຫ້ປະຊາຊົນປະກອບມີ: ການຈັດສັນທີ່ດິນສຳລັບທຳຜະລິດກະສິກຳ, ການແນະນຳເຕັກນິກໃນການສົ່ງເສີມການປູກຝັງ, ການລ້ຽງສັດ ແລະ ການປະມົງ, ລວມທັງສະໜອງທຶນ ແລະ ແນວພັນຕ່າງໆ.

ພ້ອມກັນນັ້ນ ກໍຈະໄດ້ສະໜອງອຸປະກອນເພື່ອຮັບໃຊ້ສຳລັບຂະແໜງການບໍລິການ, ເຊິ່ງປະຊາຊົນສາມາດຄັດເລືອກອາຊີບຕ່າງໆຕາມທີ່ຕົນເອງມັກ ແລະ ມີຄວາມຖະໜັດ ໃນ 3 ຂະແໜງການຄື: ກະສິກຳ, ການປະມົງ ແລະ ບໍລິການ, ທັງນີ້ ກໍເພື່ອແນໃສ່ເຮັດໃຫ້ຊີວິດການເປັນຢູ່ຂອງປະ ຊາຊົນທີ່ຖືກຜົນກະທົບຈາກໂຄງການ ມີຊີວິດທີ່ດີຂຶ້ນ ແລະ ມີການພັດທະນາຢ່າງຕໍ່ເນື່ອງ.

ໂອກາດນີ້, ທ່ານ ທອງສຸກ ເປົາສຸລີ ແລະ ທ່ານ ທອງ ອາລີ ກໍໄດ້ເນັ້ນໃຫ້ຜູ້ພັດທະນາໂຄງ ການ ຕ້ອງສຸມທຶນຮອນເຂົ້າຊ່ວຍຟື້ນຟູຊີວິດການເປັນຢູ່ໃຫ້ປະຊາຊົນໃນ 3 ບ້ານ ດັ່ງກ່າວຕາມທ່າແຮງບົ່ມຊ້ອນຂອງບ້ານ, ຂະນະດຽວກັນ ອົງການຈັດຕັ້ງ ແລະ ປະຊາຊົນ ກໍຕ້ອງມີຫລັກໝັ້ນທາງດ້ານການເມືອງ, ປະຕິບັດຕາມແນວທາງຂອງພັກ-ລັດ ໃນການພັດທະນາ ແລະ ຮ່ວມມືຢ່າງສະໜິດແໜ້ນກັບທາງໂຄງການ ເພື່ອສຸມໃສ່ໃນການປູກຝັງ, ລ້ຽງສັດ ແລະ ບໍລິການອື່ນໆ ທີ່ເໝາະສົມກັບພື້ນທີ່ຂອງບ້ານ ເພື່ອເຮັດໃຫ້ຊີວິດການເປັນຢູ່ຂອງຕົນດີຂຶ້ນ ແລະ ຫລຸດພົ້ນອອກຈາກຄວາມທຸກຍາກເທື່ອລະກ້າວ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)