ກຸ່ມຜູ້ຂະຫຍາຍແນວພັນເຂົ້າ ບ້ານຜັກອີ່ຕູ່ ເມືອງໜອງບົກ ແຂວງຄຳມ່ວນ ເປັນຕົວແບບໃນການຂະຫຍາຍແນວພັນເຂົ້າຮຸ້ນ 3 (ທ່າດອກຄຳ 8 ແລະ ທ່າດອກຄຳ 8 ຫອມ) ທີ່ມີຄຸນນະພາບດີ ເພື່ອສະໜອງໃຫ້ແກ່ປະຊາຊົນ ກໍຄື ຊາວນາທົ່ວເມືອງໜອງບົກ ໄດ້ນໍາໄປຜະລິດເຂົ້າ ທີ່ມີຄຸນນະພາບ ເພື່ອບໍລິໂພກ ແລະ ຂາຍເປັນສິນຄ້າ, ເຊິ່ງສາມາດສ້າງລາຍຮັບໃຫ້ສະມາຊິກພາຍໃນກຸ່ມໄດ້ 20 ລ້ານກີບຕໍ່ຄອບຄົວຕໍ່ປີ. ໃນຂະນະທີ່ ໃນຊຸມປີຕໍ່ໜ້າ ກຸ່ມຜູ້ຂະຫຍາຍແນວພັນເຂົ້າ ບ້ານຜັກອີ່ຕູ່ ຈະສືບຕໍ່ປັບປຸງ, ຂະຫຍາຍແນວພັນເຂົ້າ ໃຫ້ພຽງພໍກັບຄວາມຮຽກຮ້ອງຕ້ອງການ ຂອງປະຊາຊົນພາຍໃນເມືອງໜອງບົກ ແລະ ສາມາດສົ່ງອອກຂາຍຕ່າງເມືອງ, ຕ່າງແຂວງ ຕື່ມອີກ.

ທ່ານ ສີຮອງ ໂຄດຕະວົງ ຕາງໜ້າກຸ່ມຜູ້ຂະຫຍາຍແນວພັນເຂົ້າ ບ້ານຜັກອີ່ຕູ່ ລາຍງານໃຫ້ຮູ້ໃນກອງປະຊຸມໃຫຍ່ ຄັ້ງທີ X ຂອງອົງຄະນະພັກແຂວງຄໍາມ່ວນ ເມື່ອບໍ່ດົນມານີ້ວ່າ: ກຸ່ມຂະຫຍາຍແນວພັນເຂົ້າ ບ້ານຜັກອີ່ຕູ່ ເມືອງໜອງບົກ ມີສະມາຊິກທັງໝົດ 11 ຄອບຄົວ, ມີເນື້ອທີ່ການຜະລິດ ນາແຊງ 22,5 ເຮັກຕາ, ນາປີ 38,5 ເຮັກຕາ, ໃນໄລຍະຜ່ານມາ ສາມາດຂະຫຍາຍແນວພັນເຂົ້າລຸ້ນ 3 ໄດ້ສະເລ່ຍ 142 ໂຕນຕໍ່ປີ, ໃນນັ້ນ, ໄດ້ຈຳໜ່າຍຢູ່ພາຍໃນກຸ່ມ, ສະໜອງໃຫ້ຜູ້ປະກອບການ ແລະ ບັນດາໂຄງການຕ່າງໆ, ສາມາດສ້າງລາຍຮັບໃຫ້ແກ່ຄອບຄົວ ຂອງສະມາຊິກກຸ່ມ ໄດ້ປະມານ 20 ລ້ານກີບຕໍ່ຄອບຄົວຕໍ່ປີ ແລະ ໄດ້ສ້າງເປັນກອງທຶນລວມຂອງກຸ່ມຕື່ມອີກ, ປັດຈຸບັນ ມີເງິນກອງທຶນ 55 ລ້ານກີບ, ສັງລວມແລ້ວ ການຂະຫຍາຍແນວພັນ ໃນ 1 ເຮັກຕາ ຈະໃຊ້ຕົ້ນທຶນປະມານ 9-10 ລ້ານກີບ ແລະ ມີກໍາໄລປະມານ 8-10 ລ້ານກີບ.

ນອກຈາກຂະຫຍາຍແນວພັນເຂົ້າແລ້ວ, ກຸ່ມຂະຫຍາຍແນວພັນເຂົ້າ ບ້ານຜັກອີ່ຕູ່ ຍັງໄດ້ຜະ ລິດເຂົ້າຕາມມາຕະຖານກະສິກໍາທີ່ດີ (GMP) ເຊິ່ງໄດ້ຮັບການສະໜັບສະໜູນ ຈາກໂຄງການຜະລິດເຂົ້າສະອາດ ເປັນມິດກັບສິ່ງແວດລ້ອມ ໃນມູນຄ່າ 50.000 ໂດລາສະຫະລັດ. ນອກນັ້ນ, ບັນດາສະ ມາຊິກພາຍໃນກຸ່ມ ຍັງໄດ້ມີການລ້ຽງສັດ ແລະ ປູກພືດອື່ນໆຕື່ມອີກ ເຊັ່ນ: ລ້ຽງປາ, ກົບ, ເປັດ, ໄກ່, ປູກພືດຜັກຊະນິດຕ່າງໆ ເພື່ອບໍລິໂພກ ແລະ ຂາຍເປັນລາຍຮັບເພີ່ມໃຫ້ແກ່ຄອບຄົວ ແລະ ສິ່ງໜຶ່ງທີ່ເປັນການຢັ້ງຢືນວ່າ: ກຸ່ມຂະຫຍາຍແນວພັນເຂົ້າ ບ້ານຜັກອີ່ຕູ່ ມີຜົນສໍາເລັດນັ້ນ ກໍຄື ໃນປີ 2017 ມີສະມາຊິກຂອງກຸ່ມໄດ້ຮັບຫລຽນກາຊາວນາດີເດັ່ນ ຂອງອາຊຽນ ເຊິ່ງເປັນຄົນທໍາອິດ ຂອງ ສປປ ລາວໂດຍພິທີມອບ-ຮັບຫລຽນດັ່ງກ່າວ ແມ່ນຈັດຂຶ້ນຢູ່ປະເທດ ຟີລິປິນ. ທ່ານ ສີຮອງ ໂຄດຕະວົງ ໄດ້ກ່າວອີກວ່າ: ຜົນສໍາເລັດທັງໝົດ ທີ່ກຸ່ມຂະຫຍາຍແນວພັນເຂົ້າ ບ້ານຜັກອີ່ຕູ່ ຍາດມາໄດ້ນັ້ນ, ກໍ່ຍ້ອນ ໄດ້ຮັບການສະໜັບສະໜູນ ຈາກຫລາຍພາກສ່ວນ ທັງພາກລັດ ແລະ ຜູ້ປະກອບການຕ່າງໆ ໂດຍສະເພາະແມ່ນ ພະແນກກະສິກໍາ ແລະ ປ່າໄມ້ແຂວງ, ຫ້ອງການກະສິກໍາ ແລະ ປ່າໄມ້ເມືອງ ເຊິ່ງໄດ້ເອົາໃຈໃສ່ຢ່າງຕໍ່ເນື່ອງ ໃນການຊຸກຍູ້, ສົ່ງເສີມ, ສ້າງຄວາມເຂັ້ມ ແຂງໃຫ້ແກ່ກຸ່ມ ເປັນຕົ້ນ ການຝຶກອົບຮົມ, ການນໍາພາໄປທັດສະນະສຶກສາຢູ່ຕ່າງແຂວງ ແລະ ຕ່າງ ປະເທດ ເພື່ອນໍາເອົາບົດຮຽນ ທີ່ດີມານໍາໃຊ້ເຂົ້າໃນການຈັດຕັ້ງປະຕິບັດຕົວຈິງ.

ພ້ອມນັ້ນ, ຍັງໄດ້ຮັບການຊ່ວຍເຫລືອ ອຸປະກອນຮັບໃຊ້ການຜະລິດ ທີ່ຈໍາເປັນຈໍານວນໜຶ່ງ ເຊັ່ນ: ລົດດໍານາ, ເຄື່ອງຄັດເມັດເຂົ້າ, ເຄື່ອງອົບເຂົ້າ, ລົດປັ່ນເຂົ້າ, ໂຮງຮຽນຊາວນາ (ຝຶກອົບຮົມເຕັກນິດການປູກ, ການບົວລະບັດຮັກສາ ແລະ ອື່ນໆ) ໂດຍການສົມທົບທຶນຂອງກຸ່ມ 50%.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)