ໃນປີ 2020 ຜ່ານມາ, ສປປ ລາວ ໄດ້ຮັບຜົນກະທົບຈາກ ໄພພິບັດທາງທຳມະຊາດ ຢ່າງໜັກໜ່ວງ ເຊັ່ນ: ນໍ້າຖ້ວມ, ແຫ້ງແລ້ງ, ດິນເຈື່ອນ, ລົມພາຍຸ, ໄຟໄໝ້, ແຜ່ນດິນໄຫວ, ຟ້າຜ່າ ແລະ ພະຍາດລະບາດສັດ (ອະຫິວາໝູອາຟຣິກາ), ເຊິ່ງໄດ້ເຮັດໃຫ້ການດຳລົງຊີວິດ, ເນື້ອທີ່ທຳການຜະລິດ, ສັດລ້ຽງ ແລະ ຊັບສິນຂອງປະຊາຊົນເສຍຫາຍ ລວມມູນຄ່າທັງໝົດປະມານ 255,7 ຕື້ກວ່າກີບ.

ຄະນະກໍາມະການຄຸ້ມຄອງ ໄພພິບັດຂັ້ນສູນກາງ, ກະຊວງແຮງງານ ແລະ ສະຫວັດດີການສັງຄົມ ໄດ້ໃຫ້ຮູ້ວ່າ: ນັບແຕ່ປີ 2020 ຜ່ານມາ, ສປປ ລາວ ໄດ້ເກີດເຫດການລະບາດ ຂອງພະຍາດອັກເສບປອດ ຈາກເຊື້ອຈຸລະໂລກໂຄໂລນາສາຍພັນໃໝ່ (Covid-19) ແລະ ພະຍາດໄຂ້ຍຸງລາຍ, ໃນໄລຍະ ວັນທີ 2 ມີນາ ຫາ 23 ຕຸລາ 2020, ສປປ ລາວ ຍັງໄດ້ຮັບຜົນກະທົບ ຈາກໄພພິບັດທໍາມະຊາດ ເຊັ່ນ: ນໍ້າຖ້ວມ, ແຫ້ງແລ້ງ, ດິນເຈື່ອນ, ລົມພາຍຸ, ໄຟໄໝ້, ແຜ່ນດິນໄຫວ, ຟ້າຜ່າ ແລະ ພະ ຍາດລະບາດສັດ (ອະຫິວາ ໝູອາຟຣິກາ) ລວມທັງໝົດ 177 ຄັ້ງ. ໃນນີ້, ເຫດການລົມພາຍຸ 55 ຄັ້ງ, ໄຟໄໝ້ 37 ຄັ້ງ, ເຫດການນໍ້າຖ້ວມ 13 ຄັ້ງ, ຟ້າຜ່າ 2 ຄັ້ງ, ແຫ້ງແລ້ງ 3 ຄັ້ງ, ດິນເຈື່ອນ 1 ຄັ້ງ ແລະ ເຫດແຜ່ນດິນໄຫວ 64 ຄັ້ງ (ແຕ່ບໍ່ມີຄວາມເສຍຫາຍ) ແລະ ພະຍາດລະບາດສັດ (ອະຫິວາໝູອາຟຣິກາ) 2 ຄັ້ງ, ໄດ້ສົ່ງຜົນກະທົບ ໂດຍກົງຕໍ່ປະຊາຊົນ 17 ແຂວງ ແລະ 1 ນະຄອນຫລວງ ຄື: ນະຄອນຫລວງວຽງຈັນ, ອຸດົມໄຊ, ໄຊຍະບູລີ, ວຽງຈັນ, ຫລວງພະບາງ, ບໍ່ແກ້ວ, ອັດຕະປື, ຜົ້ງສາລີ, ຫລວງນໍ້າທາ, ຄໍາມ່ວນ, ສະຫວັນນະເຂດ, ສາລະວັນ, ຈໍາປາສັກ, ເຊກອງ, ບໍລິຄໍາໄຊ, ຊຽງຂວາງ, ໄຊສົມບູນ ແລະ ແຂວງຫົວພັນ, ລວມມີ 115 ເມືອງ, 917 ບ້ານ, 38.860 ຄອບຄົວ, 175.184 ຄົນ, ຍິງ 85.204 ຄົນ, ບາດເຈັບ 7 ຄົນ.

ສຳລັບຜູ້ເສຍຊີວິດມີທັງໝົດ 27 ຄົນ ຈາກເຫດດິນເຈື່ອນ 7 ຄົນ ຢູ່ແຂວງຫລວງພະບາງ, ໄຟໄໝ້ 7 ຄົນ ຢູ່ແຂວງອຸດົມໄຊ 4 ຄົນ ແລະ ຢູ່ແຂວງໄຊຍະບູລີ 3 ຄົນ, ຟ້າຜ່າ 2 ຄົນ ຢູ່ແຂວງໄຊຍະບູລີ ແລະ ນໍ້າຖ້ວມ 7 ຄົນ ຢູ່ເມືອງເງິນ ແຂວງໄຊຍະບູລີ 1 ຄົນ, ຢູ່ແຂວງເຊກອງ 2 ຄົນ, ແຂວງສະຫວັນນະເຂດ 2 ຄົນ ແລະ ຢູ່ເມືອງສະໝ້ວຍ ແຂວງສາລະວັນ 2 ຄົນ, ສູນຫາຍ 3 ຄົນ ຢູ່ເມືອງກະລຶມ ແຂວງເຊກອງ ແລະ ໄດ້ມີການຍົກຍ້າຍປະຊາຊົນ ໄປຢູ່ເຂດປອດໄພ 77 ບ້ານ, 7.064 ຄອບຄົວ, 42.963 ຄົນ, ຍິງ 20.608 ຄົນ, ເຮືອນເສຍຫາຍ 100% ຈໍານວນ 132 ຫລັງ ແລະ ເສຍຫາຍບາງສ່ວນ 1.459 ຫລັງ, ເລົ້າເຂົ້າເສຍຫາຍ 100% ຈໍານວນ 5 ຫລັງ ແລະ ເສຍຫາຍບາງສ່ວນ 224 ຫລັງ, ເສັ້ນທາງໄດ້ຮັບຄວາມເສຍຫາຍ 223 ຈຸດ, ຂົວເສຍຫາຍ 27 ແຫ່ງ, ຂົວໄມ້ 7 ແຫ່ງ, ທໍ່ນໍ້າລອດທາງ 18 ແຫ່ງ, ຂົວອູ່ 2 ແຫ່ງ, ສໍານັກງານອົງການລັດ ເສຍຫາຍບາງສ່ວນ 13 ແຫ່ງ, ໂຮງຮຽນ 168 ແຫ່ງ, ວັດ 26 ແຫ່ງ, ເນື້ອທີ່ນາເສຍຫາຍ 26.607,97 ເຮັກຕາ, ເນື້ອທີ່ໄຮ່ 4.901,9 ເຮັກຕາ ແລະ ເນື້ອທີ່ສວນກະສິກໍາອື່ນໆ 19.523,18 ເຮັກຕາ, ໜອງປາເສຍຫາຍ 3.002 ໜອງ, ປາ 92.139.800 ໂຕ, ງົວຕາຍ 199 ໂຕ, ຄວາຍ 89 ໂຕ, ໝູ 4.582 ໂຕ, ແບ້ 312 ໂຕ, ສັດປີກ 407.834 ໂຕ. ນອກນີ້, ຍັງມີຊົນລະປະທານ 137 ແຫ່ງ, ອ່າງເກັບນໍ້າ 14 ແຫ່ງ, ປະ ຕູນໍ້າ 5 ແຫ່ງ, ຄອງເໝືອງ 11 ແຫ່ງ, ນໍ້າລິນ 29 ແຫ່ງ, ນໍ້າບາດານ 2.049 ແຫ່ງ, ນໍ້າສ້າງ 660 ແຫ່ງ, ວິດຖ່າຍ 6.113 ແຫ່ງ, ລວມມູນຄ່າເສຍຫາຍທັງໝົດ ປະມານ 255.704.924.973 ກີບ.

ເຖິງວ່າເຫດການໄພພິ ບັດທາງທໍາມະຊາດ ທີ່ເກີດຂຶ້ນໃນປີ 2020 ຜ່ານມາ, ຖ້າປຽບທຽບໃສ່ເຫດການ ໄພພິບັດນໍ້າຖ້ວມໃນປີ 2018 ແລະ 2019 ເຫັນວ່າຍັງບໍ່ຮຸນແຮງປານໃດ ແລະ ເປັນເຫດ ການໄພພິບັດລະດັບທ້ອງຖິ່ນ ໃນລະດັບການຮັບມື ແລະ ແກ້ໄຂສຸກເສີນ ຂອງຂັ້ນທ້ອງຖິ່ນ, ຂັ້ນແຂວງ ແລະ ເມືອງ, ເຊິ່ງອໍານາດການປົກຄອງຂັ້ນທ້ອງຖິ່ນ ແລະ ຄະນະກໍາມະການຄຸ້ມຄອງໄພພິບັດ ຂັ້ນແຂວງ, ເມືອງ ແລະ ບ້ານ ໄດ້ປະຕິບັດໃຫ້ການ ຊ່ວຍເຫລືອເບື້ອງຕົ້ນ. ເຖິງຢ່າງໃດກໍຕາມພັກ-ລັດ ຖະບານ ລວມທັງພາກເອກະຊົນ, ອົງການຈັດຕັ້ງສາກົນຕ່າງໆ ແລະ ປະຊາຊົນລາວບັນດາເຜົ່າ ກໍບໍ່ໄດ້ປະຖິ້ມກັນ ແລະ ໄດ້ພ້ອມກັນລະດົມວັດຖຸປັດໄຈ, ເຄື່ອງບັນເທົາທຸກຕ່າງໆ ເປັນຂະບວນການ   ກ້ວາງຂວາງ. ພ້ອມນີ້, ກໍໄດ້ສົ່ງກຳລັງພົນ, ພາຫະນະ, ສະບຽງອາຫານ, ເຄື່ອງອຸປະໂພກ, ບໍລິໂພກ, ທີ່ຢູ່ອາໃສຊົ່ວຄາວອື່ນໆ ເພື່ອຊ່ວຍເຫລືອບັນເທົາທຸກສຸກເສີນ ໃຫ້ຜູ້ປະສົບໄພທໍາມະຊາດ ໄດ້ທັນເວລາ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)