ຕອນເຊົ້າວັນທີ 7 ມັງກອນ 2021 ທີ່ ຫໍປະຊຸມແຫ່ງຊາດ ຄະນະລັດຖະບານ ພ້ອມດ້ວຍ ບັນດາເຈົ້າແຂວງ, ຮອງເຈົ້າແຂວງ ເຂົ້າຮ່ວມກອງປະຊຸມລັດຖະບານຊຸດທີ VIII ເປີດກ້ວາງທ້າຍສະໄໝ ເພື່ອສັງລວມຄືນຜົນການຈັດຕັ້ງປະຕິບັດແຜນງານ 2016-2020 ແລະ ບັນຫາສໍາຄັນຕິດພັນກັບແຜນຍຸດທະສາດການພັດທະນາ.

ກອງປະຊຸມລັດຖະບານຊຸດທີ VIII ເປີດກ້ວາງທ້າຍສະໄໝ ດໍາເນີນໂດຍການເປັນປະທານ ຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ, ມີສະມາຊິກລັດຖະບານ, ເຈົ້າຄອງນະຄອນຫລວງວຽງຈັນ, ບັນດາເຈົ້າແຂວງ, ຮອງເຈົ້າແຂວງ ເຂົ້າຮ່ວມເພື່ອທົບທວນຄືນຜົນການຈັດຕັ້ງປະຕິບັດວຽກງານຂອງລັດຖະບານ ຊຸດທີ VIII ( 2016-2020); ສະຫລຸບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII ( 2016-2020) ແລະ ຜ່ານຮ່າງເບື້ອງຕົ້ນແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ VIIII ( 2021-2025); ຄວາມຄືບໜ້າການປັບປຸງກົນໄກການອໍານວຍຄວາມສະດວກ ແລະ ບັນດາຕົວຊີ້ວັດຕ່າງໆໃນການດໍາເນີນທຸລະກິດຢູ່ ສປປລາວ ແລະ ການຈັດຕັ້ງປະຕິບັດຄໍາສັ່ງ ວ່າດ້ວຍການປັບປຸງການບໍລິການ, ການອອກໃບອະນຸຍາດລົງທຶນ ແລະ ການອອກໃບອະນຸຍາດດໍາເນີນທຸລະກິດ; ຮ່າງແຜນຍຸດທະສາດການສົ່ງເສີມການຜະລິດເປັນສິນຄ້າ ຕິດພັນກັບກົນໄກການເຂົ້າເຖິງຕະຫລາດຈໍາໜ່າຍສິນຄ້າ ແລະ ການຄ້າຊາຍແດນ; ການຄົ້ນຄ້ວາການຫັນຊັບສິນຂອງລັດເປັນທຶນ; ຜົນການຕິດຕາມຊຸກຍູ້ການຈັດຕັ້ງປະຕິບັດຄໍາສັ່ງເລກທີ 15/ນຍປີ 2020; ລາຍງານການກະກຽມໃຫ້ແກ່ການຫລຸດພົ້ນອອກຈາກສະຖານະພາບປະເທດດ້ອຍພັດທະນາ; ລາຍງານຜົນການຈັດຕັ້ງປະຕິບັດ ແຜນແກ້ໄຂບັນຫາຄົນຕ່າງປະເທດທີ່ເຄື່ອນໄຫວເຂົ້າເມືອງບໍ່ຖືກຕ້ອງຕາມກົດໝາຍຂອງ ສປປລາວ; ລາຍງານການຈັດຕັ້ງປະຕິບັດການແກ້ໄຂຜົນກະທົບ ແລະ ຜັນຂະຫຍາຍນະໂຍບາຍ, ມາດຕະການເພື່ອຫລຸດຜ່ອນຜົນກະທົບຈາກການລະບາດຂອງພະຍາດໂຄວິດ-19ຕໍ່ເສດຖະກິດຂອງລາວ; ການຜັນຂະຫຍາຍຜົນຂອງກອງປະຊຸມຄະນະກໍາມະການຮ່ວມມືທະວິພາຄີ ລະຫວ່າງ ລັດຖະບານ ແຫ່ງ ສປປລາວ ແລະ ລັດຖະບານ ແຫ່ງ ສສ ຫວຽດນາມ ຄັ້ງທີ 43 ປະຈໍາປີ 2020.

ໂດຍກອງປະຊຸມຈະດໍາເນີນເປັນເວລາ 2 ວັນຄືວັນທີ 7 ແລະວັນທີ 8 ມັງກອນ 2021.

Medialaos MMD (ແຫຼ່ງຂໍ້ມູນຈາກ: ໂທລະພາບແຫ່ງຊາດລາວ)