ວັນທີ 13 ມັງກອນ 2021 ທີ່ນະຄອນຫຼວງວຽງຈັນ ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກ ໄດ້ໄຂຂຶ້ນຢ່າງເປັນທາງການ ໂດຍການເປັນປະທານ ຂອງສະຫາຍ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກ ເຊີ່ງມີກຳມະການກົມການເມືອງສູນກາງພັກ, ຄະນະເລຂາທິການສູນກາງພັກ, ກຳມະການສູນກາງພັກ, ນັກປະຕິວັດອາວຸໂສ, ວິລະຊົນແຫ່ງຊາດ ພ້ອມດ້ວຍບັນດາສະມາຊິກພັກສົມບູນ ຈຳນວນ 768 ກວ່າສະຫາຍ, ຍິງ 116 ສະຫາຍ ທີ່ໄດ້ຖືກຄັດເລືອກໃຫ້ຕາງໜ້າອົງຄະນະພັກຂະແໜງການ, ອົງການ ແລະ ທ້ອງຖິ່ນ ໃນຂອບເຂດທົ່ວປະເທດ ແລະ ແຂກຖືກເຊີນ ຈຳນວນ 147 ສະຫາຍ ທີ່ຕາງໜ້າໃຫ້ແກ່ພາກສ່ວນຕ່າງໆ ທັງພາກລັດ ແລະ ເອກະຊົນ ກໍຄືປະຊາຊົນລາວບັນດາເຜົ່າ ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ ແມ່ນເຫດການການເມືອງທີ່ສຳຄັນຍິ່ງ ແລະ ທັງເປັນຂີດໝາຍປະຫວັດສາດແຫ່ງການເຕີບໃຫຍ່ຂະຫຍາຍຕົວດ້ານປະລິມານ ແລະ ຄຸນນະພາບຂອງພັກເຮົາ ໃນໄລຍະໃໝ່ຢູ່ໃນສະພາບແວດລ້ອມພາຍໃນປະເທດ ແລະ ໃນໂລກທີ່ມີການຜັນແປຢ່າງສະສັບສັບຊ້ອນ ເຊິ່ງມີທັງກາລະໂອກາດ, ສິ່ງອຳນວຍ ແລະ ມີທັງສິ່ງທ້າທາຍທົດສອບອັນໃຫຍ່ຫຼວງຫຼາຍຢ່າງທີ່ພວກເຮົາຕ້ອງສືບຕໍ່ຜ່ານຜ່າ.

ສະຫາຍ ບຸນຍັງ ວໍລະຈິດ ໄດ້ກ່າວສູນທອນພົດ ໃນພິທີໄຂກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກ ວ່າ: ມາຮອດປະຈຸບັນການ​ສະຖາປະນາ​ລະບອບ​ປະຊາທິປະ​ໄຕ​ປະຊາຊົນ​ຢູ່​ປະ​ເທດ​ເຮົາ​​ໄດ້​ຢ່ວງ​ເຂົ້າສູ່​ປີ​ທີ 45 ​ແລະ ​ການປະຕິບັດພາລະກິດ​ປ່ຽນ​ແປງ​ໃໝ່ກໍ່​ໄດ້​ດໍາ​ເນີນ​ມາ​ເປັນ​ເວລາ 35 ປີ​ແລ້ວ ຕະຫຼອດ​ໄລຍະ​ດັ່ງກ່າວ ກໍ່ມີຜົນສໍາເລັດໃຫຍ່ຫຼວງຫຼາຍດ້ານ ແຕ່ກໍ່ຍັງມີ​ຫຼາຍ​ບັນຫາ​ສໍາຄັນ​ທີ່​ພັກ​ເຮົາ​ຕ້ອງໄດ້​ສະ​ຫຼຸບຕີ​ລາຄາຄືນ​ໃຫ້​ຖືກຕ້ອງ, ​ເລິກ​ເຊິ່ງ​, ຮອບດ້ານ ແລະ ພາວະວິໄສ ເພື່ອ​ເປັນ​ພື້ນຖານອັນໜັກແໜ້ນໃຫ້ແກ່​ການ​ກໍານົດ​ທິດ​ທາງ ​ໜ້າ​ທີ່​ການເມືອງ​ເພື່ອສືບຕໍ່ບູລະນະລະບອບປະຊາທິປະໄຕປະຊາຊົນໃນ​ຕໍ່ໜ້າຕາມຈຸດໝາຍຂອງພັກເຮົາທີ່ວາງໄວ້​ໃຫ້ນັບມື້ມີຄວາມ​ເຂັ້ມ​ແຂງ ​ແລະ ​ໜັກ​ແໜ້ນ​ຂື້ນເທື່ອ​ລະ​ກ້າວເມື່ອຫວນ​ເບິ່ງ​ຄືນ​ການນໍາພາ​-ຊີ້​ນໍາ​ຂອງ​ສູນ​ກາງ ​ໃນ​ການຈັດ​ຕັ້ງ​ປະຕິບັດ​ມະຕິ X ຂອງ​ພັກ​

ຕະຫຼອດໄລຍະ 5 ປີຜ່ານ​ມາ ໃນທ່າມກາງສະພາບແວດລ້ອມສາກົນ ແລະ ພາກພື້ນມີການຜັນແປໄປ ທີ່ຄາດການໄດ້ຍາກ ແລະ ການແຜ່ລະບາດຢ່າງໜັກໜ່ວງຂອງພະຍາດໂຄວິດ-19 ເຊິ່ງເຕັມໄປດ້ວຍກາລະໂອກາດ ແລະ ສິ່ງທ້າທ້າຍນັ້ນບັນຍາກາດລວມກໍ່​ຄື​ຂະ​ບວນການພັດທະນາສ້າງສາປະເທດແມ່ນໄດ້ມີບາດກ້າວຂະຫຍາຍຕົວ ແລະ ມີຜົນສຳເລັດພົ້ນເດັ່ນຫຼາຍດ້ານ ຮັບປະກັນໃຫ້​ປະ ເທດຊາດ ສືບຕໍ່ມີ​ສະຖຽນ​ລະ​ພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ, ຄວາມເປັນເອກະລາດ,​ ອໍານາດອະທິປະໄຕ ແລະ ໝາກຜົນຂອງການປະຕິວັດໄດ້ຮັບການປົກປ້ອງຢ່າງເຂັ້ມແຂງ ເຖິງວ່າ​ມີ​ຄວາມ​ຫຍຸ້ງຍາກທາງ​ດ້ານ​ການ​ເງິນ-​ເງິນຕາ, ບັນຫາໜີ້​ສິນ ແລະ ໄດ້ຮັບຜົນກະທົບຢ່າງໜັກໜ່ວງຈາກການແຜ່ລະບາດຂອງພະຍາດໂຄວິດ 19, ​​ແຕ່ພວກເຮົາຍັງສາມາດຢັບຢັ້ງບໍ່ໃຫ້ເກີດເຫດການທົດຖອຍຮ້າຍແຮງຕໍ່ເສດຖະກິດ-ສັງຄົມ, ບັນດາໂຄງການໃຫຍ່ຍັງສືບຕໍ່ຈັດຕັ້ງປະຕິບັດ, ທາງດ່ວນລາວ-ຈີນ ໄລຍະທີ່ໜື່ງແຕ່ວຽງຈັນ-ວັງວຽງ ໄດ້ເປີດການນຳໃຊ້ເປັນທາງການກາຍເປັນເສັ້ນທາງດ່ວນສາຍທຳອິດ ທີ່ມີຄວາມໝາຍປະຫວັດສາດຂອງປະເທດເຮົາ; ຄຸນ​ນະພາ​ບຊີວິດຂອງປະຊາຊົນບັນດາເຜົ່າ ໄດ້ຮັບການປັບປຸງ ແລະ​ ຍົກ​ລະດັບດີຂຶ້ນເປັນກ້າວໆ​.

ຕະຫຼອດໄລຍະ 5 ປີຜ່ານມາ ເຖິງວ່າພັກ ແລະ ລັດໄດ້ສຸມໃສ່ນໍາພາ-ຊີ້ນຳການຈັດຕັ້ງປະຕິບັດມະຕິ X ຂອງພັກ ດ້ວຍຄວາມບຸກບືນ, ສູ້ຊົນປານໃດກໍ່ຕາມ ແຕ່ເມື່ອເບີ່ງເລິກລົງໄປແລ້ວກໍ່ຍັງມີຂໍ້ຄົງຄ້າງຈໍານວນ​ໜຶ່ງທີ່​ທ້າ​ທາຍ​ຕໍ່​ບົດບາດການ​ນໍາພາ​ຂອງ​ພັກ ແລະ ການຄຸ້ມຄອງຂອງ​ລັດ​ ດັ່ງທີ່ພວກເຮົາໄດ້ຕີລາຄາກັນກ່ອນໜ້ານີ້ແລ້ວທັງໝົດ​ບັນຫາ​ເຫຼົ່າ​ນັ້ນລ້ວນແຕ່ຊີ້​ບອກ​ເຖິງ​ສະພາວະ​ຄວາມ​ເປັນ​ຈິງທາງ​ດ້ານ​ການ​ເມືອງ, ​ເສດຖະກິດ, ວັດທະນະ​ທໍາ-ສັງຄົມ, ການ​ປ້ອງ​ກັນຊາ​ດ-ປ້ອງ​ກັນ​ຄວາມ​ສະຫງົບ, ການສ້າງພັກ-ພະນັກງານ ທີ່ຮຽກຮ້ອງໃຫ້​ພວກ​ເຮົາ​ຕ້ອງ​ກໍາ​ແໜ້ນ ​ແລະ ​ພິຈາລະນາ ​ຢ່າງ​ເປັນ​ລະບົບ, ຄົບຖ້ວນ, ພາວະວິໄສ ເພື່ອເປັນພື້ນຖານໃນການວາງທິດທາງໃນພາລະກິດປົກປັກຮັກສາ ແລະ ສ້າງສາປະເທດຊາດ ຂອງພວກເຮົາ ໃນຊຸມປີຕໍ່ໜ້ານີ້ ໃຫ້ມີການຫັນປ່ຽນໄປສູ່ລວງເລິກໄດ້ຢ່າງແທ້ຈິງ ກອງປະຊຸມໃຫຍ່ຜູ້ແທນທົ່ວປະເທດໃນຄັ້ງນີ້ຈະດຳເນີນຈະດຳເນີນໄປເປັນເວລາ 3 ວັນ ແຕ່ວັນທີ 13-15 ມັງກອນ 2021.