ໜ່ວຍງານແພດ-ໝໍເກືອບ 100 ຄົນ ກຽມພ້ອມທຸກດ້ານ ທັງດ້ານຮ່າງກາຍ, ຈິດໃຈ ແລະ ອຸປະ ກອນຮັບໃຊ້ຄົບຊຸດ ເພື່ອບໍລິການຜູ້ແທນ ກໍຄືແຂກທີ່ເຂົ້າຮ່ວມກອງປະຊຸມໃຫ່ຍຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນ ປະຕິວັດລາວ ທີ່ໄດ້ຈັດຂຶ້ນຢູ່ນະຄອນຫລວງວຽງຈັນ ໃນລະຫວ່າງວັນທີ 13-15 ມັງກອນນີ້ ເປັນຕົ້ນ ເຄື່ອງແທກຄື້ນຫົວໃຈ, ເຄື່ອງກະຕຸ້ນຫົວໃຈ, ເຄື່ອງຕິດຕາມອາການຊີວິດກໍ ລະນີສຸກເສີນ, ຖັງອອກຊີເຈນ, ເຄື່ອງຮົ່ມຢາກໍລະນີສຸກເສີນ ແລະ ລົດຮັບ-ສົ່ງຄົນເຈັບ ໂດຍທີມແພດໄດ້ເຂົ້າປະຈໍາການນັບແຕ່ວັນທີ 9 ມັງກອນ ເປັນຕົ້ນມາເພື່ອບໍລິການຮັບໃຊ້ບັນຜູ້ແທນຢ່າງເຕັມທີ່ຕະຫລອດໄລຍະການດຳເນີນກອງປະຊຸມ.

ໃນໂອກາດນີ້ ຮອງສາດ ສະດາຈານ ດຣ. ນາງ ບົວເທບ ພູມິນ ຊ່ຽວຊານດ້ານຟື້ນຟູໜ້າທີ່ການ, ຮອງຫົວໜ້າກົມປີ່ນປົວ ແລະ ຟື້ນຟູໜ້າທີ່ການ ກະຊວງສາທາລະນະສຸກ ໄດ້ໃຫ້ສຳພາດຕໍ່ນັກຂ່າວສຳນັກຂ່າວສານປະເທດລາວ ວ່າ: ກົມປິ່ນປົວ ແລະ ໜ້າທີ່ການ ໄດ້ຈັດສັນແພດໝໍ ເຂົ້າຮ່ວມຮັບໃຊ້ກອງປະຊຸມໃຫ່ຍຄັ້ງນີ້ ຈໍານວນ 4 ທີມ, ສ່ວນທີມຮັກສາສຸຂະພາບປະຈຳຢູ່ຫໍປະຊຸມແຫ່ງຊາດປະກອບມີ 2 ຈຸດ ຄື: ຈຸດບໍລິການຮັບໃຊ້ບັນດາສະເພາະກົມການເມືອງການນໍາ ແລະ ແຂກພິເສດ, ຈຸດບໍລິການຮັບໃຊ້ທົ່ວໄປ. ນອກຈາກນີ້, ຍັງໄດ້ແຕ່ງຕັ້ງພະນັກງານແພດໝໍປະຈຳຢູ່ໂຮງແຮມ ທີ່ມີຜູ້ແທນກອງປະຊຸມພັກຢູ່ ຈຳນວນ 7 ຈຸດ, ໜ່ວຍລົດແພດ ມີ 5 ຈຸດ, ປະຈຳຢູ່ໂຮງໝໍມີ 3 ຈຸດ ພ້ອມດ້ວຍຢາສຸກເສີນ ແລະ ອຸປະກອນການແພດກຽມພ້ອມຄົບຊຸດ.

ຮອງ ສາດສະດາຈານ ດຣ ນາງ ບົວເທບ ພູມິນ ແຈ້ງໃຫ້ຮູ້ຕື່ມວ່າ: ໄລຍະຜ່ານມາຄະນະແພດໝໍເຫລົ່ານີ້ ໄດ້ປະກອບສ່ວນຮັບໃຊ້ງານສໍາຄັນຕ່າງໆ ມາແລ້ວຫລາຍຄັ້ງ ເປັນຕົ້ນງານກິລາແຫ່ງຊາດ ແລະ ກອງປະຊຸມສຳຄັນອື່ນໆ ການເຂົ້າຮ່ວມຮັບໃຊ້ກອງປະຊຸມໃຫ່ຍຜູ້ແທນທົ່ວປະເທດ ຄັ້ງທີ XI ຂອງພັກ ຄັ້ງ ນີ້ຖືເປັນກຽດຢ່າງຍິ່ງໃຫ່ຍໃນຊີວິດ ແລະ ປຸກລະດົມອ້າຍນ້ອງແພດ-ໝໍ ທີ່ເຂົ້າຮ່ວມຮັບໃຊ້ໃນຄັ້ງນີ້ຈົ່ງມີຄວາມຮັບຜິດຊອບສູງທີ່ສຸດ ເພື່ອເຮັດໃຫ້ກອງປະຊຸມຄັ້ງນີ້ ບັນລຸຜົນສຳເລັດຕາມຄາດໝາຍທີ່ວາງໄວ້.

ພາບ-ຂ່າວ: ສຳນັກຂ່າວສານປະເທດລາວ