ສະຫາຍ ພັນຕີ ງ່າ ໄຕຍະວົງ ຮອງຫົວໜ້າພະແນກທາງຫຼວງ ກົມຕຳຫຼວດຈະລາຈອນ ໄດ້ກ່າວສະແດງຄວາມຮູ້ສຶກໃນໂອກາດເຂົ້າຮ່ວມປ້ອງກັນກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກ ປະຊາຊົນ ປະຕິວັດລາວ ຊຶ່ງທ່ານກ່າວວ່າ: ໃນນາມສ່ວນຕົວມີຄວາມຮູ້ສຶກພາກພູມໃຈ ດີໃຈຫຼາຍທີ່ໄດ້ປະກອບສ່ວນຮັບໃຊ້ໃນກອງປະຊຸມໃຫຍ່ຄັ້ງນີ້ ຖືເປັນກຽດອັນສູງສົ່ງ ແລະ ຍິ່ງໃຫຍ່ທີ່ສຸດທີ່ໄດ້ຮັບໃຊ້ຊາດ, ຮັບໃຊ້ກອງປະຊຸມ.

ທ່ານ ກ່າວໃຫ້ຮູ້ອີກວ່າ: ສຳລັບການມາຮັບໃຊ້ກອງປະຊຸມຄັ້ງນີ້ ກຳລັງຕຳຫຼວດຈະລາຈອນພວກເຮົາໄດ້ມີຄວາມພ້ອມ 100% ຊຶ່ງໄດ້ເລີ່ມເຂົ້າມາປະຕິບັດໜ້າທີ່ປ້ອງກັນຄວາມສະຫງົບນັບແຕ່ວັນທີ 8 ມັງກອນຜ່ານມາ, ໃນການປ້ອງກັນພວກເຮົາໄດ້ແບ່ງຄວາມຮັບຜິດຊອບລະອຽດເຂົ້າປະຈຳການແຕ່ລະຈຸດ ໂດຍສະເພາະການປ້ອງກັນທາງດ້ານໜ້າ, ດ້ານຂ້າງ, ດ້ານຫຼັງຂອງຫ້ອງປະຊຸມ ໂດຍເນັ້ນໃສ່ລະບາຍການສັນຈອນ, ຈັດສັນຄວາມເປັນລະບຽບຮຽບຮ້ອຍ. ຊຶ່ງເຈົ້າໜ້າທີ່ພວກເຮົາມາຮັບໃຊ້ກອງປະຊຸມມີຈຳນວນ 30 ສະຫາຍ, ຍິງ 5 ສະຫາຍ, ພວກເຮົາໄດ້ເລີ່ມປະຕິບັດໜ້າທີ່ແຕ່ 5 ໂມງເຊົ້າຈົນຮອດກອງປະຊຸມເລີກຈິ່ງສາມາດກັບໄດ້, ສ່ວນກຳລັງຕຳຫຼວດຈະລາຈອນທີ່ປະຈຳການໃນຫໍປະຊຸມມ່ນໄດ້ເນັ້ນຄວາມຮັບຜິດຊອບໃນການຈັດສັນລົດ, ພ້ອມກຳນົດສະຖານທີ່ການຈອດລົດລະອຽດ ເວົ້າສະເພາະໃນການປະຕິບັດລະບຽບໃນກອງປະຊຸມໃຫຍ່ຄັ້ງນີ້ເຫັນວ່າທຸກຄົນໄດ້ໃຫ້ຄວາມຮ່ວມມື ແລະ ປະຕິບັດກົດລະບຽບໄດ້ເປັນຢ່າງດີ.

ພາບ-ຂ່າວ: ໜັງສືພິມປະຊາຊົນ