ໃນໄລຍະ 5 ປີຜ່ານມາ ກະຊວງໂຍທາທິການ ແລະ ຂົນສົ່ງ ໄດ້ຕັ້ງໜ້າປະກອບສ່ວນຢ່າງໜັກແໜ້ນເຂົ້າໃນການພັດທະນາເສດຖະກິດ-ສັງຄົມ ແຫ່ງຊາດ ໂດຍສະເພາະແມ່ນ ການຍົກລະດັບ ແລະ ພັດທະນາໂຄງລ່າງພື້ນຖານຄົມມະນາຄົມ-ຂົນສົ່ງ ທັງທາງບົກ, ທາງນໍ້າ ແລະ ທາງອາກາດ ເພື່ອອຳນວຍຄວາມສະດວກໃຫ້ແກ່ການພັດທະນາເສດຖະກິດ-ສັງຄົມ ກໍຄື ການຂົນສົ່ງ, ການຄ້າ, ການລົງທຶນ ແລະ ອື່ນໆ.ສະຫາຍ ວຽງສະຫວັດ ສີພັນດອນ ເລຂາຄະນະບໍລິຫານງານພັກ ກະຊວງໂຍທາທິການ ແລະ ຂົນສົ່ງ(ຍທຂ) ໄດ້ປະກອບຄຳເຫັນ ຕໍ່ກອງປະຊຸມໃຫຍ່ຄັ້ງທີ XI ຂອງພັກປະຊາຊົນ ປະຕິວັດລາວ ໃນວັນທີ 13 ມັງກອນ 2021 ກ່ຽວກັບ”ການເຊື່ອມຈອດດ້ານຄົມມະນາຄົມ-ຂົນສົ່ງ ແລະ ພັດທະນາຄວາມສາມາດ ໃນການຂົນສົ່ງສິນຄ້າຂ້າມແດນ” ໂດຍສະຫາຍໄດ້ໃຫ້ຮູ້ວ່າ: ໃນໄລຍະ 5 ປີຜ່ານມາ ກະຊວງໂຍທາທິການ ແລະ ຂົນສົ່ງ ໄດ້ຕັ້ງໜ້າປະກອບສ່ວນຢ່າງໜັກແໜ້ນໃຫ້ແກ່ການພັດທະນາເສດຖະກິດ-ສັງຄົມ ແຫ່ງຊາດ, ເຊິ່ງສະແດງອອກໃນຜົນສໍາເລັດອັນພົ້ນເດັ່ນຫລາຍດ້ານ ເປັນຕົ້ນໄດ້ນໍາພາ-ຊີ້ນໍາຍົກລະດັບ ແລະ ພັດທະນາໂຄງລ່າງພື້ນຖານຄົມມະນາຄົມ-ຂົນສົ່ງ; ພັດທະນາດ້ານໂຍທາທາງນ້ໍາ ໂດຍເຊັນສັນຍາການຮ່ວມມືລົງທຶນພັດທະນາ ທ່າທຽບເຮືອຂອງທ່າເຮືອຫວຸງອ່າງ ກັບ ສສ ຫວຽດນາມ ໃນການເພີ່ມຮຸ້ນໃຫ້ແກ່ ສປປລາວ ຈາກ 20% ມາເປັນ 60%, ປັບປຸງເຄື່ອງໝາຍການເດີນເຮືອ ແລະ ສໍາເລັດການສໍາຫລວດເສດຖະກິດເຕັກນິກການປັບປຸງຄອງເດີນເຮືອແຕ່ຫ້ວຍຊາຍຫາຫລວງພະບາງ ໃຫ້ໄດ້ມາດຕະຖານເຮືອ 500 ໂຕນ ສາມາດແລ່ນໄດ້ຕະຫລອດປີ; ຍົກສູງຄຸນນະພາບດ້ານການບິນພົນລະເຮືອນ, ສໍາເລັດການກໍ່ສ້າງຂະຫຍາຍອາຄານສະໜາມບິນ ສາກົນ ວັດໄຕ ແລະ ກໍາລັງຈັດຕັ້ງປະຕິບັດໂຄງການກໍ່ສ້າງສະໜາມບິນໜອງຄ້າງ, ຄາດວ່າຈະສໍາເລັດໃນທ້າຍ ປີ 2021 ແລະ ໂຄງການປັບປຸງກໍ່ສ້າງສະໜາມບິນຫ້ວຍຊາຍ ເພື່ອຍົກລະດັບສິ່ງອໍານວຍ ຄວາມສະດວກຂອງອາຄານຜູ້ໂດຍສານໃຫ້ທັນສະໄໝເທື່ອລະກ້າວ.ພ້ອມນີ້, ຍັງໄດ້ນໍາພາ-ຊີ້ນໍາພັດທະນາດ້ານທາງລົດໄຟ ໂດຍສຸມໃສ່ຈັດຕັ້ງປະຕິບັດໂຄງການກໍ່ສ້າງທາງ ລົດໄຟລາວ-ຈີນ, ມາຮອດປັດຈຸບັນການກໍ່ສ້າງໂຄງລ່າງພື້ນຖານ ປະຕິບັດໄດ້ 94,15%,ກໍາລັງຈັດຕັ້ງປະຕິບັດໂຄງການກໍ່ສ້າງທາງລົດໄຟເຊື່ອມຕໍ່ລາວ-ໄທ ໄລຍະ II (ຕອນທີ 2) ແຕ່ສະຖານີທ່ານາແລ້ງສະຖານີວຽງຈັນ (ບ້ານຄໍາສະຫວາດ) ປະຕິບັດໄດ້ 21,81%, ພ້ອມກັນນີ້ກໍໄດ້ເປີດການແລ່ນລົດໄຟ ຂົນສົ່ງສິນຄ້າ ລາວ-ໄທ ແລະ ໄດ້ນໍາພາ-ຊີ້ນໍາພັດທະນາການຂົນສົ່ງທາງບົກ ແລະ ການຂົນສົ່ງຂ້າມແດນ.ສຳລັບການຂົນສົ່ງໂດຍສານ ບັນດາແຂວງໃນຂອບເຂດທົ່ວປະເທດມີທັງໝົດ 119 ສາຍທາງ; ລະຫວ່າງ ສປປ ລາວ ກັບບັນດາປະເທດໃກ້ຄຽງ ມີສາຍທາງການແລ່ນລົດໂດຍສານປະຈໍາທາງ ລາວ-ໄທ, ລາວ-ຈີນ, ລາວ-ຫວຽດນາມ ແລະ ລາວ-ກໍາປູເຈຍ ລວມທັງໝົດມີ 81 ສາຍທາງ, ໃນ 5 ປີຜ່ານມາ ການບໍລິການຂົນສົ່ງໂດຍສານເພີ່ມຂຶ້ນ 15% ໃນນັ້ນ ບໍລິມາດຂົນສົ່ງໂດຍສານລະຫວ່າງປະເທດໄດ້ 7,5 ລ້ານກວ່າເທື່ອຄົນ ເພີ່ມຂຶ້ນສະເລ່ຍ 4,5% ຕໍ່ປີ.

ພາບ-ຂ່າວ: ສຳນັກຂ່າວສານປະເທດລາວ