ສື່ມວນຊົນລາວທັງພາຍໃນ ແລະ ຕ່າງປະເທດປະຕິບັດໜ້າທີ່ຢ່າງແຂງແຮງ ແລະ ຫ້າວຫັນ ເພື່ອສະໜອງຂໍ້ມູນຂ່າວສານກ່ຽວກັບການດຳເນີນກອງປະຊຸມໃຫ່ຍຜູ້ແທນທົ່ວປະເທດ ຄັ້ງທີ XI ຂອງພັກໃຫ້ສັງຄົມໄດ້ຮັບຮູ້ຢ່າງກວ້າງຂວາງ ແລະ ວ່ອງໄວ ທັງຮັບປະກັນໄດ້ຄວາມຖືກຕ້ອງ.
ທ່ານ ສະຫວັນຄອນ ຣາຊມຸນຕີ, ຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໃຫ້ສຳພາດຕໍ່ນັກຂ່າວວິທະຍຸກະຈາຍສຽງແຫ່ງຊາດລາວວ່າ: ສື່ມວນຊົນທຸກຂະແໜງການໄດ້ປະຕິບັດໜ້າທີ່ດ້ວຍຄວາມຮັບຜິດຊອບສູງ ເພື່ອຮັບໃຊ້ກອງປະຊຸມຜູ້ແທນທົ່ວປະເທດ ຄັ້ງທີ XI ຂອງພັກຢ່າງສົມກຽດ ໃນການສະໜອງຂໍ້ມູນຂ່າວສານຕ່າງໆຕະຫລອດໄລຍະດຳເນີນກອງປະຊຸມໄດ້ເປັນຢ່າງດີ ສະແດງອອກປະຊາຊົນລາວບັນດາເຜົ່າໄດ້ຕິດຕາມຮັບຟັງ, ເຂົ້າຊົມ ແລະ ບໍລິໂພກບັນດາເນື້ອໃນ, ການເຄື່ອນໄຫວຕ່າງໆ ຜ່ານຂອງກອງປະຊຸມຜ່ານສື່ຫລັກຫລາຍຂື້ນ.
ໂອກາດນີ້ຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະທ່ອງທ່ຽວ ໄດ້ສະແດງຄວາມຊົມເຊີຍນັກຂ່າວຈາກທຸກພາກສ່ວນທີ່ປະຈຳຢູ່ສູນຂ່າວກໍ່ຄືຜູ້ຢຸ່ແນວຫລັງປະຈໍາຢູ່ສຳນັກງານ ລ້ວນແຕ່ມີໜ້າທີ່ສໍາຄັນປະກອບສ່ວນຮັບໃຊ້ເຫດການສຳຄັນຂອງພັກຂອງຊາດໃນຄັ້ງນີ້ ແລະ ພາຍຫລັງສຳເລັດກອງປະຊຸມສື່ມວນຊົນຕ້ອງໄດ້ສືບຕໍ່ເຜີຍແຜ່ເນື້ອໃນຈິດໃຈກໍ່ຄືມະຕິຕ່າງໆ ທີ່ຮັບຮອງໃນກອງປະຊຸມໃຫ່ຍຜູ້ແທນທົ່ວປະເທດ ຄັ້ງທີ XI ຂອງພັກໃຫ້ກວ້າງຂວາງ ແລະ ທົ່ວເຖິງທ້ອງຖີ່ນຮາກຖານ ເພື່ອພ້ອມກັນຈັດຕັ້ງປະຕິບັດໃຫ້ມີປະສິດທິຜົນສູງສຸດ.