ສູນຂ່າວປະກອບສ່ວນສໍາຄັນໃນການອຳນວຍຄວາມສະດວກດ້ານຕ່າງໆ ເຮັດໃຫ້ການປະຕິບັດໜ້າທີ່ຂອງສື່ມວນຊົນທັງພາຍໃນ ແລະ ຕ່າງປະເທດ ທີ່ມາເຄື່ອນໄຫວເກັບກຳກອງປະຊຸມໃຫຍ່ຄັ້ງທີ XI ຂອງພັກມີຄວາມສະດວກສະບາຍ ແລະ ສາມາດນຳສະເໜີຂໍ້ມູນຂ່າວສານໄດ້ຢ່າງວ່ອງໄວທັນເຫດການ.

ທ່ານ ສົມສະຫວາດ ພົງສາ ຄະນະພັກກະຊວງ, ຫົວໜ້າກົມສື່ມວນຊົນ, ກະຊວງຖະະແຫຼງຂ່າວ, ວັດທະນະທຳ ແລະ ທ່ອງທ່ຽວ ທັງເປັນຮອງຫົວໜ້າຄະນະຮັບຜິດຊອບສູນຂ່າວຮັບໃຊ້ກອງປະຊຸມໃຫຍ່ທົ່ວປະເທດ ຄັ້ງທີ XI ຂອງພັກ ໃຫ້ສໍາພາດວ່າ: ສູນຂ່າວຮັບໃຊ້ກອງປະຊຸມພັກຄັ້ງນີ້ໄດ້ເຮັດໜ້າທີ່ສະໜອງຂໍ້ມູນເອກະສານຕ່າງໆ ທີ່ສຳຄັນ, ຮູບນີ້ງ, ວິດີໂອ, ອິນເຕີເນັດ, ຄອມພິວເຕີ, ອຸປະກອນຮັບໃຊ້ໃນການເຮັດວຽກ ກ່ຽວກັບການດຳເນີນກອງປະຊຸມ ລວມເຖິງການຖ່າຍທອດສົດຜ່ານສື່ວິທະຍຸ, ໂທລະພາບ ເພື່ອສະໜອງໃຫ້ສື່ທັງພາຍໃນ ແລະ ຕ່າງປະເທດ ສາມາດຕິດຕາມເອົາທຸກບັນຍາ ກາດການເຄື່ອນໄຫວຕ່າງໆ ທີ່ເກີດຂື້ນໃນກອງປະຊຸມແລ້ວນໍາສະເໜີໃຫ້ສັງຄົມຮັບຮູ້ຢ່າງກ້ວາງຂວາງຜ່ານສື່ຂອງຕົນ ແນໃສ່ເຮັດໃຫ້ບັນຍາດກອງປະຊຸມຄັ້ງສຳຄັນນີ້ຟົດຟື້ນໃນທົ່ວສັງຄົມ.

ໃນໂອກາດນີ້ທ່ານ ສົມສະຫວາດ ພົງສາ ຍັງໄດ້ສະແດງຄວາມຮູ້ສຶກດີໃຈທີ່ໄດ້ປະກອບສ່ວນປະຕິບັດໜ້າທີ່ຮັບໃຊ້ກອງປະຊຸມສຳຄັນຂອງຊາດໃນຄັ້ງນີ້ ຊື່ງກອງປະຊຸມພັກຈະຈັດຂື້ນທຸກໆ 5 ປີ ເພື່ອກຳນົດແນວທາງນະໂຍບາຍກໍ່ຄືແຜນພັດທະນາເສດຖະກິດ-ສັງຄົມ ຂອງປະເທດໃນແຕ່ລະໄລຍະ ແລະ ປະເທດຊາດມີໃບໜ້າໃໝ່, ຊີວິດການເປັນຢູ່ຂອງປະຊາຊົນລາວບັນດາເຜົ່າໄດ້ຮັບການປັບປຸງໃຫ້ດີຂື້ນເປັນກ້າວໆ.