ວັນທີ 18 ມັງກອນ 2021 ສະພາການຄ້າແຂວງຢຸນນານ ສປຈີນ ລວມທັງ ສະມາຄົມນັກທຸລະກິດຈີນ ຢູ່ນະຄອນຫລວງວຽງຈັນ ແລະ ແຂວງຫລວງພະບາງ ສົມທົບກັບ ຫ້ອງການກອງເລາຂາ ຄະນະກະມາທິການແຫ່ງຊາດ ສົ່ງເສີມຄວາມກ້າວໜ້າຂອງແມ່ຍິງ ແລະ ເດັກ, ພະແນກສຶກສາສົງ, ແນວລາວສ້າງຊາດ ແລະ ສະຫະພັນແມ່ຍິງແຂວງ ຫລວງພະບາງ ໄດ້ໃຫ້ການອຸປະຖັມເຄື່ອງອຸປະໂພກ ແລະ ບໍລິໂພກ ໃຫ້ໂຮງຮຽນປະຖົມສົງ ຢູ່ວັດມະໂນ ໂຮງຮຽນມັດທະຍົມຕົ້ນສົງ ຢູ່ວັດຜາໂອ ແລະ ໂຮງຮຽນມັດທະຍົມສົມບູນສົງ ຢູ່ວັດພູຄວາຍ ແຂວງຫລວງພະບາງ ລວມມູນຄ່າ 156,810,000 ກີບ.

ການນໍາເຄື່ອງບໍລິໂພກ ແລະ ອຸປະໂພກມາມອບໃນຄັ້ງນີ້ແມ່ນເພື່ອບູລະນະ ແລະ ປັກປົກຮັກສາວັດທະນະທຳ, ຮີດຄອງປະເພນີ ແລະ ພຸດທະສາສະໜາ ຂອງ ສປປລາວ ໃຫ້ຍືນຍົງ ແລະ ເປັນການປະກອບຮັດແໜ້ນຄວາມສາມັກຄີການຮ່ວມມືຮອບດ້ານ ລະຫວ່າງປະຊາຊົນສອງຊາດລາວ-ຈີນ ນັບມື້ໃຫ້ເຂົ້າສູ່ລວງເລິກ ແລະ ແໜ້ນແຟ້ນຍິ່ງຂຶ້ນ ອີກປະການໜຶ່ງເພື່ອເປັນການບັນເທົາຄວາມໜາວໃຫ້ບັນດາພະສົງສໍາມະເນນ ໃຫ້ຮ່າງກາຍມີຄວາມອົບອຸນເພື່ອສະດວກໃນການເຮັດກິດຈະກໍາຕ່າງໆ ທາງສາສະໜາ ແລະ ສຶກສາຮໍ່າຮຽນຕື່ມອີກ.