ພະແນກສຶກສາທິການ ແລະ ກິລາ ແຂວງຫລວງພະບາງ ມອບເຄື່ອງນຸ່ງນັກຮຽນ ໃຫ້ໂຮງຮຽນມັດທະຍົມສົມບູນເດັກກໍ່າພ້າ, ໂຮງຮຽນຊົນເຜົ່າສວນຫລວງ ແລະ ໂຮງຮຽນຊົນເຜົ່ານໍ້າບາກ.

ພິທີມອບເຄື່ອງດັ່ງກ່າວ, ໄດ້ມີຂຶ້ນເມື່ອບໍ່ດົນຜ່ານມານີ້ ໂດຍການກ່າວມອບຂອງ ທ່ານ ຊາຍສະຫວັນ ຈັນມານິດ ຮອງຫົວໜ້າພະແນກສຶກສາທິການ ແລະ ກິລາ ແຂວງຫລວງພະບາງ ເຂົ້າຮ່ວມມີ ຜູ້ອຳນວຍການໂຮງຮຽນ, ຄູ-ອາຈານ, ນ້ອງນັກຮຽນ ແລະ ພະນັກງານທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.

ເຄື່ອງນັກຮຽນ ທີ່ນຳມາມອບໃນຄັ້ງນີ້ປະກອບມີ: ເສື້ອຂາວແຂນສັ້ນ, ໂສ້ງ ແລະ ສີ້ນນັກຮຽນ.

ໃນນັ້ນ, ໂຮງຮຽນມັດທະຍົມສົມບູນເດັກກໍ່າພ້າ ໄດ້ຮັບເສື້ອຂາວແຂນສັ້ນ ຈຳນວນ 428 ຜືນ, ໂສ້ງນັກຮຽນ 249 ຜືນ ແລະ ສີ້ນນັກຮຽນ 179 ຜືນ, ໂຮງຮຽນຊົນເຜົ່າສວນຫລວງ ໄດ້ຮັບເສື້ອຂາວແຂນສັ້ນ ຈຳນວນ 628 ຜືນ, ໂສ້ງນັກຮຽນ 339 ຜືນ ແລະ ສີ້ນນັກຮຽນຈຳນວນ 298 ຜືນ, ໂຮງຮຽນ ຊົນເຜົ່ານໍ້າບາກ ໄດ້ຮັບເສື້ອຂາວແຂນສັ້ນ ຈຳນວນ 600 ຜືນ, ໂສ້ງນັກຮຽນ 328 ຜືນ ແລະ ສີ້ນນັກຮຽນ ຈຳນວນ 272 ຜືນ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)