ໃນຕອນຄໍ່າວັນທີ 21 ມັງກອນ 2021 ນີ້, ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ (ພັກ ປປ ລາວ) ໄດ້ສົນທະນາທາງໂທລະສັບກັບ ສະຫາຍ ສີ ຈິ້ນຜິງ ເລຂາທິການໃຫຍ່ຄະນະກໍາມະການສູນກາງພັກກອມມູນິດຈີນ, ປະທານປະເທດ ແຫ່ງ ສປ ຈີນ.

ໃນໂອກາດດັ່ງກ່າວ, ສະຫາຍ ທອງລຸນ ສີສຸລິດ ໄດ້ສະແດງຄວາມປິຕິຍິນດີເປັນຢ່າງຍິ່ງ ທີ່ໄດ້ມີໂອກາດສົນທະນາທາງໂທລະສັບໃນຄັ້ງນີ້ ເປັນຄັ້ງທໍາອິດກັບສະຫາຍເລຂາທິການໃຫຍ່, ປະທານປະເທດ ສີ ຈິ້ນຜິງ ພາຍຫລັງທີ່ ພັກ ປປ ລາວ ຫາກໍສໍາເລັດການດໍາເນີນກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XI ຂອງຕົນ, ສະຫາຍໄດ້ແຈ້ງໃຫ້ການນໍາສູງສຸດຂອງຈີນ ຊາບກ່ຽວກັບຜົນສໍາເລັດຂອງກອງປະຊຸມໃຫຍ່ ຄັ້ງທີ XI ຂອງພັກ ປປ ລາວ ແລະ ໄດ້ສະແດງຄວາມຂອບໃຈ ຄະນະກໍາມະການສູນກາງພັກກອມມູນິດຈີນ ກໍຄື ສະຫາຍເລຂາທິການໃຫຍ່ ສີ ຈິ້ນຜິງ ທີ່ໄດ້ສົ່ງຄໍາອວຍພອນ ແລະ ຊົມເຊີຍກອງປະຊຸມໃຫຍ່ ຄັ້ງທີ XI ຂອງ ພັກ ປປ ລາວ ແລະ ຊົມເຊີຍ ເລຂາທິການໃຫຍ່ ຄະນະບໍລິຫານງານສູນກາງພັກ ປປ ລາວ, ເຊິ່ງເປັນການປະກອບສ່ວນສໍາຄັນເຂົ້າໃນຜົນສໍາເລັດ ຂອງກອງປະຊຸມໃຫຍ່ ຄັ້ງທີ XI ຂອງ ພັກ ປປ ລາວ.

ສະຫາຍ ສີ ຈິ້ນຜິງ ໄດ້ສະແດງຄວາມຊົມເຊີຍຕໍ່ຜົນສໍາເລັດຂອງກອງປະຊຸມໃຫຍ່ ຄັ້ງທີ XI ຂອງພັກ ປປ ລາວ ແລະ ສະແດງຄວາມຊົມເຊີຍ ສະຫາຍ ທອງລຸນ ສີສຸລິດ ທີ່ໄດ້ຮັບເລືອກຕັ້ງເປັນ ເລຂາທິການໃຫຍ່ ຄະນະບໍລິຫານງານສູນກາງພັກ ປປ ລາວ ສະໄໝທີ XI, ທັງໄດ້ສະແດງຄວາມເຊື່ອໝັ້ນວ່າ ຄະນະບໍລິຫານງານສູນກາງພັກ ຊຸດໃໝ່ ທີ່ມີ ສະຫາຍເລຂາທິການໃຫຍ່ ທອງລຸນ ສີສຸລິດ ເປັນຜູ້ນໍານັ້ນ, ປະຊາຊົນລາວຈະສາມາດສືບຕໍ່ພາລະກິດການປົກປັກຮັກສາ ແລະ ສ້າງສາພັດທະນາປະເທດຊາດ ແລະ ຍາດໄດ້ຜົນສໍາເລັດອັນໃຫຍ່ຫລວງກວ່າເກົ່າ ຕາມມະຕິກອງປະຊຸມໃຫຍ່ ຄັ້ງທີ XI ໄດ້ກໍານົດໄວ້.

ໃນການສົນທະນາ, ການນໍາສູງສຸດຂອງສອງພັກ ລາວ-ຈີນ ໄດ້ຕີລາຄາສູງຕໍ່ການພົວພັນຮ່ວມມືສອງຝ່າຍ ໃນໄລຍະຜ່ານມາ, ໄດ້ແລກປ່ຽນຄວາມຄິດເຫັນກ່ຽວກັບທິດທາງໃນການເສີມຂະຫຍາຍສາຍພົວ ພັນຮ່ວມມືໃນຕໍ່ໜ້າ ໂດຍໄດ້ເປັນເອກະພາບກັນໃນການຖືເອົາ ການຈັດຕັ້ງປະຕິບັດແຜນແມ່ບົດວ່າດ້ວຍການສ້າງຄູ່ຮ່ວມຊາຕາກໍາ ລາວ-ຈີນ ເປັນແຜນປະຕິບັດງານຕົວຈິງ ໃນການສືບຕໍ່ລົງເລິກການຮ່ວມມືສອງຝ່າຍໃນສະພາບການໃໝ່ ດ້ວຍປະສິດທິຜົນ ແລະ ຄຸນນະພາບທີ່ສູງຂຶ້ນກວ່າເກົ່າ ໂດຍສະເພາະແມ່ນການຮ່ວມມືກັນຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ທີ່ພວມແຜ່ລະບາດຢູ່ປະເທດຕ່າງໆໃນໂລກປັດຈຸບັນ, ສະຫາຍເລຂາທິການໃຫຍ່ ທອງລຸນ ສີສຸລິດ ໄດ້ສະແດງຄວາມຂອບໃຈເປັນຢ່າງສູງຕໍ່ ພັກ, ລັດຖະບານຈີນ ທີ່ໄດ້ໃຫ້ການຊ່ວຍເຫລືອທາງດ້ານອຸປະກອນການແພດ ແລະ ວັກແຊັງປ້ອງກັນພະຍາດໂຄວິດ-19 ຕະຫລອດໄລຍະທີ່ຜ່ານມາ, ເຊິ່ງເປັນການປະກອບສ່ວນສໍາຄັນໃນການຄວບຄຸມ ແລະ ຕ້ານພະຍາດໂຄວິດ-19 ຢູ່ ສປປ ລາວ.

ການນໍາສູງສຸດຂອງສອງຝ່າຍ ຍັງໄດ້ເອກະພາບກັນໃນການກໍານົດເອົາປີ 2021 ເປັນປີມິດຕະພາບ ລາວ-ຈີນ ເພື່ອສະເຫລີມສະຫລອງວັນສ້າງຕັ້ງສາຍພົວພັນການທູດ ລາວ-ຈີນ ຄົບຮອບ 60 ປີ (25 ເມສາ 1961-25 ເມສາ 2021); ສະຫາຍເລຂາທິການໃຫຍ່ ທອງລຸນ ສີສຸລິດ ໄດ້ອວຍພອນໃຫ້ປະຊາຊົນຈີນ ພາຍໃຕ້ການນໍາພາອັນເດັດດ່ຽວ ຂອງ ພັກກອມມູນິດຈີນ ຈົ່ງປະສົບຜົນສໍາເລັດໃໝ່ ໃຫຍ່ຫລວງກວ່າເກົ່າໃນພາລະກິດສ້າງສັງຄົມນິຍົມທີ່ທັນສະໄໝຮອບດ້ານ, ບັນລຸເປົ້າໝາຍ “100 ປີສອງເຫດການ” ໃນຕໍ່ໜ້າ, ພ້ອມທັງໄດ້ອວຍພອນໃຫ້ສະຫາຍເລຂາທິການໃຫຍ່, ປະທານປະເທດ ສີ ຈິ້ນຜິງ, ການນໍາຂັ້ນສູງ ພັກ-ລັດ ແລະ ປະຊາຊົນຈີນ ໃນໂອກາດບຸນປີໃໝ່ປະເພນີຂອງປະຊາຊົນຈີນ ທີ່ຈະມາເຖິງໃນມໍ່ໆນີ້.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)