ໃນໂອກາດດຳເນີນກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນປະຕິວັດລາວ ແລະ ເປັນການປະກອບສ່ວນອັນສຳຄັນ ເຂົ້າໃນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງ IX (2021-2025) ໃຫ້ບັນລຸຕາມຈຸດປະສົງລະດັບຄາດໝາຍ, ທັງພາກລັດ ແລະ ພາກເອກະຊົນ ມີທັງໝົດ 34 ພາກສ່ວນ ໄດ້ມອບເງິນ ແລະ ວັດຖຸ ເພື່ອປະກອບສ່ວນຊຸກຍູ້ ເຊິ່ງນັບແຕ່ວັນທີ 7-15 ມັງກອນ 2021 ລວມມູນຄ່າທັງໝົດ 14,53 ຕື້ກີບ, ໃນນັ້ນເປັນເງິນສົດ ຈຳນວນ 14,28 ຕື້ກີບ ແລະ ເປັນວັດຖຸມູນຄ່າ 254 ລ້ານກີບ.

ທ່ານ ບຸນໂຈມ ອຸບົນປະເສີດ ເລຂາຄະນະບໍລິຫານງານພັກກະຊວງການເງິນ, ທັງເປັນຫົວໜ້າອະນຸກໍາມະການງົບປະມານ ຮັບໃຊ້ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນ ປະຕິວັດລາວ ແຈ້ງໃຫ້ຮູ້ວ່າ: ພາກສ່ວນຕ່າງໆ ໄດ້ໃຫ້ຄວາມສຳຄັນຊຸກຍູ້ເນື່ອງໃນໂອກາດດຳເນີນກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນປະຕິວັດລາວ ແລະ ເປັນການປະກອບ ສ່ວນອັນສຳຄັນ ເຂົ້າໃນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງ IX (2021-2025) ໃຫ້ບັນລຸຕາມຈຸດປະສົງລະດັບຄາດໝາຍ.

ພາກສ່ວນຕ່າງໆ ທີ່ໃຫ້ການປະກອບສ່ວນ ມີ: ເຂດເສດຖະກິດພິເສດສາມຫລ່ຽມຄໍາ ແລະ ກຸ່ມບໍລິສັດ ດອກງິ້ວຄໍາ ຈໍາກັດ ຈຳນວນ 1,3 ຕື້ກີບ, ບໍລິສັດ ເອັສທີ ກຣຸບ ແລະ ທະນາຄານ ເອັສທີ 1,2 ຕື້ກີບ, ບໍລິສັດ ລາວໂທລະຄົມມະນາຄົມ ມະຫາຊົນ 1,1 ຕື້ກີບ, ບໍລິສັດ ທີ່ປຶກສາດ້ານການລົງທຶນ ແລະ ກໍ່ສ້າງເຂື່ອນໄຟຟ້າ ຈໍາກັດຜູ້ດຽວ 1 ຕື້ກີບ, ບໍລິສັດ ຈະເລີນເຊກອງ ພະລັງງານ ຈໍາກັດ 1 ຕື້ກີບ, ກຸ່ມບໍລິສັດ ພົງຊັບທະວີ ຈໍາກັດຜູ້ດຽວ 1 ຕື້ກີບ, ບໍລິສັດ ຫລວງພະບາງພາວເວີ ຈໍາກັດ 1 ຕື້ກີບ, ກຸ່ມບໍລິສັດ ຄໍາໄພຊະນະ ຈໍາກັດຜູ້ດຽວ 1 ຕື້ກີບ, ກຸ່ມບໍລິສັດ ພົງສະຫວັນ 1 ຕື້ກີບ, ທະນາຄານ ຮ່ວມພັດທະນາ (JDB) 800 ລ້ານກີບ, ບໍລິສັດ ເບຍລາວ ຈໍາກັດ 596 ລ້ານກີບ (ເປັນເງິນສົດ 500 ລ້ານກີບ, ວັດຖຸ 96 ລ້ານກີບ), ບໍລິສັດ ພະລັງງານໄຟຟ້າຄວາມຮ້ອນເຊກອງ ຈໍາກັດ ”XTPPL” ບໍລິສັດໃນເຄືອຂອງກຸ່ມ ບໍລິສັດ ພອນສັກ ຈໍາກັດ 500 ລ້ານກີບ, ທະນາຄານ ແຫ່ງ ສປປ ລາວ 500 ລ້ານກີບ, ທະນາຄານ ການຄ້າຕ່າງປະເທດລາວ 500 ລ້ານກີບ, ບໍລິສັດ ລັດວິສາຫະກິດ ນໍ້າມັນເຊື້ອໄຟລາວ 500 ລ້ານກີບ, ບໍລິສັດ ລັດວິສາຫະກິດຫວຍພັດທະນາ 300 ລ້ານກີບ, ບໍລິສັດ ວັງຕັດຂຸດຄົ້ນບໍ່ແຮ່ 300 ລ້ານກີບ, ອົງຄະນະພັກ ນະຄອນຫລວງວຽງຈັນ 150 ລ້ານກີບ, ກຸ່ມບໍລິສັດ ດາວເຮືອງ ມອບເປັນວັດຖຸມູນຄ່າ 120 ລ້ານກີບ, ບໍລິສັດ ເອັສວີກຣຸບ ຈໍາກັດ 100 ລ້ານກີບ, ບໍລິສັດ ພັດທະນາສວນວັດທະນາທໍາລ້ານຊ້າງ 100 ລ້ານກີບ, ບໍລິສັດ ເພັດສະໝອນ ກໍ່ສ້າງ ເຄຫາສະຖານ ຂົວທາງ ຊົນລະປະທານ ຈໍາກັດຜູ້ດຽວ 100 ລ້ານກີບ, ກຸ່ມບໍລິສັດ ດີເອັມ ຈໍາກັດຜູ້ດຽວ 50 ລ້ານກີບ, ອົງຄະນະພັກ ແຂວງຈໍາປາສັກ 50 ລ້ານກີບ, ອົງຄະນະພັກ ແຂວງສາລະວັນ 30 ລ້ານ ກີບ, ອົງຄະນະພັກ ແຂວງອຸດົມໄຊ 30 ລ້ານກີບ, ອົງຄະນະພັກ ແຂວງສະຫວັນນະເຂດ 30 ລ້ານກີບ, ອົງຄະນະພັກ ແຂວງຊຽງຂວາງ 20 ລ້ານກີບ, ອົງຄະນະພັກ ແຂວງຫົວພັນ 20 ລ້ານກີບ, ອົງຄະນະພັກ ແຂວງເຊກອງ 20 ລ້ານກີບ, ອົງຄະນະພັກ ແຂວງໄຊຍະບູລີ 20 ລ້ານກີບ, ອົງຄະນະພັກ ແຂວງບໍ່ແກ້ວ 20 ລ້ານກີບ, ອົງຄະນະພັກ ແຂວງຫລວງນໍ້າທາ 20 ລ້ານກີບ, ອົງຄະນະພັກ ແຂວງຜົ້ງສາລີ 20 ລ້ານກີບ.

ໂອກາດກາດດັ່ງກ່າວ, ທ່ານ ບຸນໂຈມ ອຸບົນປະເສີດ ໃນນາມຕາງໜ້າໃຫ້ອະນຸກໍາມະການເສດຖະກິດ, ອະນຸກໍາມະການງົບປະມານກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ ໄດ້ຊີ້ແຈງຕື່ມ ຕໍ່ການສະເໜີຂ່າວຜ່ານມາ ໃນການໃຊ້ງົບປະມານຂອງລັດເຂົ້າໃນການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນ ຂັ້ນຮາກຖານພັກຢູ່ກຸ່ມບ້ານໃນຂອບເຂດທົ່ວປະເທດ, ເຊິ່ງອົງຄະນະພັກບັນດາເມືອງ, ນະຄອນ, ອົງຄະນະພັກບັນດາແຂວງ, ນະຄອນຫລວງ, 3 ອົງການຈັດຕັ້ງມະຫາຊົນຂອງພັກແຕ່ລະຂັ້ນ ແລະ ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນປະຕິວັດລາວ ແມ່ນໄດ້ດຳເນີນໃນຫລາຍຂັ້ນ, ຫລາຍລະດັບຂອງອະນຸກຳມະການຕ່າງໆ ກະກຽມກອງປະຊຸມໃຫຍ່ແຕ່ລະຂັ້ນດ້ວຍການປະຢັດການໃຊ້ຈ່າຍຢ່າງເຄັ່ງຄັດ, ໂຈະການໃຊ້ຈ່າຍທີ່ບໍ່ຈໍາເປັນໃນການກະ ກຽມກອງປະຊຸມ ແລະ ງານລ້ຽງງານສະຫລອງຕ່າງໆ ເພື່ອປະຢັດງົບປະມານຂອງລັດລົງເປັນຈໍານວນຫລວງຫລາຍ.

ພ້ອມນັ້ນ, ກໍໄດ້ສະແດງຄວາມຂອບໃຈ ແລະ ຮູ້ບຸນຄຸນມາຍັງພາກສ່ວນຕ່າງໆທີ່ໄດ້ໃຫ້ການປະກອບສ່ວນຊຸກຍູ້ໃນຄັ້ງນີ້, ເຊິ່ງເປັນການປະກອບສ່ວນອັນສໍາຄັນ ເຮັດໃຫ້ການດໍາເນີນກອງປະຊຸມໃຫຍ່ຄັ້ງທີ XI ຂອງພັກ ແລະ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງ IX ປະສົບຜົນສຳເລັດຕາມລະດັບຄາດໝາຍ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)