ໃນໂອກາດທີ່ໄປຮ່ວມງານວິວາຫະມຸງຄຸນຂອງເພື່ອນຮ່ວມອາຊີບດຽວກັນຢູ່ບ້ານໂພນຄໍາ ເມືອງແກ້ວອຸດົມ ແຂວງວຽງຈັນ ໂດຍຜ່ານທາງດ່ວນລາວ-ຈີນ ໄປລົງເມືອງໂພນໂຮງໄປບ້ານດັ່ງກ່າວໃຊ້ເວລາ 45 ນາທີ ພວກເຮົາກໍ່ຍາດເວລາໄປເບິ່ງການຜະລິດກະສິກຳຂອງປະຊາຊົນ ແລະ ແຫຼ່ງທ່ອງທ່ຽວຕາມແຄມນໍ້າລີກ ເຊິ່ງມີຫຼາຍຫາດຄື: ຫາດຊາຍງາມ, ຫາດກົກກ້ຽງ, ຫາດວຽງຄໍານໍ້າລີກ, ຫາດທາ…

ແຕ່ລະບ່ອນແມ່ນສະຖານທີ່ທຳມະຊາດທີ່ສວຍງາມທີ່ບໍ່ສາມາດພັນລະນານັບໄດ້ ແລະ ບໍ່ທັນມີນັກທຸລະກິດຄົນໃດໄປລົງທຶນພັດທະນາໄດ້ຕາມມາດຖານຂອງມັນ ແຕ່ດ້ວຍໃຈມັກ ແລະ ສະອອນຄວາມງາມດັ່ງກ່າວນັ້ນ ນັກທຸລະກິດ ຫຼື ຜູ້ປະກອບການແບບຊາວບ້ານຈໍານວນໜຶ່ງກໍ່ໄດ້ພາກັນລົງທຶນໃສ່ຕາມຄວາມສາມາດຂອງຕົນ ຄືຫາດວຽງຄຳນໍ້າລີກທີ່ເປັນບ່ອນຊົມວິວນໍ້າລີກຂອງເມືອງແກ້ວອຸດົມ ກໍ່ແມ່ນຫົວໜ້າວົງດົນຕີຮ່ວມມິດ ມາຂໍອະນຸຍາດນຳເມືອງມາເຮັດເປັນບ່ອນພັກຜ່ອນຊົມວິວ ແລະ ຟັງດົນຕີ ໃນຍາມວັນເສົາ ວັນທິດ ເພື່ອຮອງຮັບແຂກພາຍໃນແຂວງ ທ້ອງຖິ່ນ ແລະ ຈາກສູນກາງກໍ່ຄືນະຄອນຫລວງວຽງຈັນ ເພາະມີທາງດ່ວນແລ້ວຂີ່ລົດອອກມາກໍ່ພຽງ 40 ກວ່ານາທີກໍ່ຮອດແລ້ວບໍ່ແມ່ນເປັນສອງສາມຊົ່ວໂມງຄືແຕ່ກ່ອນອີກແລ້ວ.

ທ່ານ ດາວວອນ ສໍຜາບມີໄຊ ຜູ້ມາບູລະນະຫາດວຽງຄໍາວິວນໍ້າລີກ ທີ່ມີປະມານ 4 ເຮັກຕາຫາກໍ່ເປັນການເລີ້ມຕົ້ນບຸກເບີກ ເຊິ່ງຈະມີກິດຈະກຳລ່ອງເຮືອທ່ອງທ່ຽວ, ຕູບພັກຜ່ອນແຄມນໍ້າລີກ, ໂອນຊາເດັກນ້ອຍ, ສ້າງຝາຍນໍ້າລົ້ນຫາດວຽງຄໍາ ແລະ ຂີ່ກົງເບັງລ່ອງລອຍໄປຕາມກະແສນໍ້າ ສ່ວນເມນູອາຫານກໍ່ແມ່ນ: ປິ້ງໄກ່ລາດທາປາແດກ, ໃສ່ໝາກແຄ່ນ, ປີ້ງປາ ແລະ ອາຫານປານໍ້າລີກທຸກຊະນິດ ແລະ ຕຳໝາກຫຸ່ງພື້ນບ້ານ.

ທ່ານ ດາວວອນ ສໍຜາບມີໄຊ ເວົ້າວ່າ:ໃນໂອກາດປີໃໝ່ລາວທີ່ຈະມາເຖິງນີ້ກໍ່ຈະມີກິດຈະກຳທ່ຽວຫາດຜ່ານດອນຂ້າມຟາກນໍ້າລີກ, ມີການເສບດົນຕີ, ຟ້ອນລໍາວົງ, ຮ້ອງເພງ, ນັກຮ້ອງສະໝັກຫຼີ້ນ, ລ່ອງເຮືອ, ຂີ່ກົງຢາງເບັງ….

ສະນັ້ນ ຈຶ່ງຂໍເຊີນຊວນບັນດາທ່ານໄປທ່ຽວຊົມຫາດວຽງຄຳນໍ້າລີກ, ວິວນໍ້າລີກ ,ພວກເຮົາຍິນດີຕ້ອນຮັບບັນດາທ່ານດ້ວຍນໍ້າໃຈໄມຕຣີຈິດມິດຕະພາບອັນດູດດື່ມ ແລະ ເປັນກັນເອງດ້ວຍນໍ້າໃຈໃສງາມດັ່ງສາຍນໍ້າລີກ ທີ່ສົດໃສສວຍງາມເຫັນມັດສາລ່ອງລອຍໃນທຸກເວລານາທີ.

ພາບ-ຂ່າວ: ສີພາ ນົງລາດ