ໃນວັນທີ 27 ມັງກອນ 2021 ທ່ານ ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໄດ້ລາຍງານ ໃຫ້ຮູ້ວ່າ: ປັດຈຸບັນ ສະພາບການລະບາດ ຂອງພະຍາດໄຂ້ຍຸງລາຍ ຍັງມີການເພີ່ມຂຶ້ນ ນັບແຕ່ວັນທີ 26 ທັນວາ 2020 ຫາ ວັນທີ 26 ມັງກອນ 2021 ມີຜູ້ຕິດເຊື້ອພະຍາດໄຂ້ຍຸງລາຍ 67 ຄົນ, ໃນ 11 ແຂວງ, ແຂວງ ທີ່ມີການແຜ່ລະ ບາດຫລາຍກວ່າໝູ່ ແມ່ນນະຄອນຫລວງວຽງຈັນ 23 ຄົນ, ອັດຕະປື 14 ຄົນ, ວຽງຈັນ 7 ຄົນ, ຫລວງພະບາງ 7 ຄົນ, ເຊກອງ 4 ຄົນ, ສະຫວັນນະເຂດ 3 ຄົນ, ຄຳມ່ວນ 2 ຄົນ, ບໍລິຄຳໄຊ 2 ຄົນ, ອຸດົມໄຊ 2 ຄົນ ແລະ ຫລວງນໍ້າທາ 1 ຄົນ.

ທ່ານ ສີສະຫວາດ ສຸດທານີລະໄຊ ກ່າວຕື່ມວ່າ: ການທຳລາຍແຫລ່ງເພາະພັນ ໜອນນ້ຳຍຸງລາຍ ແມ່ນວຽກງານໜຶ່ງທີ່ສຳຄັນ ທີ່ຈະຕ້ອງໄດ້ ຈັດຕັ້ງປະຕິບັດ ໃຫ້ເປັນປະຈຳທຸກອາທິດ, ທັງນີ້ແນໃສ່ຕອບໂຕ້ ການລະບາດຂອງ ພະຍາດໄຂ້ຍຸງລາຍ ກະຊວງສາທາລະນະສຸກ ຈຶ່ງໄດ້ຮຽກຮ້ອງໃຫ້ປະຊາຊົນ ພ້ອມກັນກຳຈັດ ແລະ ທຳລາຍແຫລ່ງເພາະພັນ ໜອນນ້ຳຍຸງລາຍ ທີ່ເປັນພາຫະນຳເຊື້ອ ໂດຍສະເພາະ ປິດຝາພາຊະນະ ທີ່ກັກເກັບນ້ຳໃນເຮືອນ ແລະ ນອກເຮືອນ,  ໝັ້ນປ່ຽນນ້ຳ ໃນເຕົ້າດອກໄມ້, ນ້ຳຮອງຕີນຕູ້, ຖ້ານຮອງຈອກນ້ຳ, ປ່ອຍປາຫາງນົກຍຸງ ເພື່ອກິນໜອນນ້ຳ, ປັບປຸງອະນາໄມ ສິ່ງແວດລ້ອມ ອ້ອມເຮືອນ ບໍ່ໃຫ້ມີກະໂປະກະປ໋ອງ, ຢາງຕີນລົດເກົ່າທີ່ມີນ້ຳຂັງ ແລະ ອື່ນໆ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)